തെന്നിന്ത്യൻ സിനിമയിലെ ജനപ്രിയതാരമാണ് തമിഴ് നടൻ ധനുഷ്. അദ്ദേഹം ഈ വർഷം ഫെബ്രുവരിയിൽ ദക്ഷിണേന്ത്യയിലെ ഏറ്റവും വിലപിടിപ്പുള്ള പ്രദേശങ്ങളിലൊന്നായ ചെന്നൈയിലെ പോയസ് ഗാർഡനിൽ പുതുതായി സ്ഥലം വാങ്ങിയിരുന്നു.

ഇവിടെ ഒരു ആഡംബരവീട് വയ്ക്കാനുള്ള ശ്രമത്തിലാണ് താരം. ഭാര്യ ഐശ്വര്യ, ഭാര്യാപിതാവ് സൂപ്പർതാരം രജനീകാന്ത്, ഭാര്യാമാതാവ് ലത എന്നിവരുടെ സാന്നിധ്യത്തിലാണ് താരം ഈ സ്ഥലത്തിന്റെ ഭൂമിപൂജ നിർവഹിച്ചത്.

ഇവിടെ 150 കോടി രൂപ ചെലവിൽ തന്റെ സ്വപ്നഭവനം നിർമിക്കാനാണ് താരത്തിന്റെ പദ്ധതിയെന്നാണ് പുറത്ത് വരുന്ന വാർത്തകൾ. അന്തരിച്ച മുൻ തമിഴ്നാട് മുഖ്യമന്ത്രി ജയലളിതയുടെ വസതിയും ഇവിടെയായിരുന്നു.

ഭാര്യാപിതാവായ സൂപ്പർസ്റ്റാർ രജനികാന്ത് കഴിഞ്ഞ 30 വർഷമായി പോയസ് ഗാർഡനിലെ വീട്ടിലാണ് താമസിക്കുന്നത്. ഇതിനു സമീപമാണ് ധനുഷിന്റെ സ്വപ്നഭവനം ഉയരുന്നത്.

150 കോടി ചെലവിൽ ഏകദേശം 19000 ചതുരശ്ര അടിയിലാണ് വീടുപണി പുരോഗമിക്കുന്നത് എന്നാണ് വാർത്ത. നാല് നിലകളും ഈ വീടിനുണ്ടാകുമെന്ന് റിപ്പോർട്ടുകൾ സൂചിപ്പിക്കുന്നു.

2004ൽ വിവാഹിതരായ ധനുഷ് - ഐശ്വര്യ ദമ്പതികൾക്ക് ലിംഗ, യാത്ര എന്നീ മക്കളുണ്ട്. നിലവിൽ ആൽവാർപേട്ടിലെ മനോഹരമായ ഭവനത്തിലാണ് ഈ താരകുടുംബം കഴിയുന്നത്. വിശാലമായ ബാൽക്കണി, മനോഹരമായ സ്വീകരണമുറി, ടെറസ് ഗാർഡൻ എന്നിവ ഉൾപ്പെട്ടതാണ് ഈ വീട്.

അത്യാധുനിക ജിമ്മും സ്വിമ്മിങ് പൂളും ഫുട്ബോൾ കോർട്ട് അടക്കം ഇൻഡോർ സ്പോർട്സ് സൗകര്യങ്ങളും വിശാലമായ ഹോം തിയറ്ററുമെല്ലാം സ്മാർട് ടെക്‌നോളജിയിൽ അധിഷ്ഠിതമായ വീട്ടിലുണ്ടാകും എന്നാണ് അറിയാൻ കഴിഞ്ഞിട്ടുള്ളത്.

ധനുഷിന്റെ അടുത്തായി നെറ്റ്ഫ്ലിക്സില്‍ ഇറങ്ങിയ ചിത്രം 'ജഗമേ തന്തിരം' ഇതിനകം ആരാധകപ്രശംസ പിടിച്ചുപറ്റിയിരുന്നു. ജൂൺ 18ന് നെറ്റ്ഫ്ലിക്സിലാണ് ചിത്രം പുറത്തിറങ്ങിയത്. ഐശ്വര്യ ലക്ഷ്മി, ജെയിംസ് കോസ്മോ, ജോജു ജോർജ് തുടങ്ങിയവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ഒടിടി പ്ലാറ്റ്‌ഫോമിൽ മികച്ച റേറ്റിങ് നേടിക്കഴിഞ്ഞു.

ഗ്യാങ്‌സ്റ്റർ ഡ്രാമ വിഭാഗത്തിൽപ്പെടുന്ന ചിത്രത്തിന്റെ കഥ ഒരു ബ്രിട്ടീഷ് വ്യവസായിക്കു വേണ്ടി ജോലി ചെയ്യുന്ന തമിഴ് ഗുണ്ടയെ ചുറ്റിപ്പറ്റിയാണ് വികസിക്കുന്നത്. നിലവില്‍ നെറ്റ്ഫ്ലിക്സില്‍ റിലീസ് ചെയ്യാന്‍ ഉദ്ദേശിക്കുന്ന 'ദി ഗ്രേ മാനില്‍ ' ആണ് ധനുഷ് അഭിനയിക്കുന്നത്. ഇതിന്റെ ഷൂട്ടിംഗ് അമേരിക്കയില്‍ നടന്നു വരികയാണ്.

2002ലാണ് ധനുഷ് ചലച്ചിത്രജീവിതം ആരംഭിക്കുന്നത്. പിതാവ് കസ്തൂരിരാജ സംവിധാനം നിർവഹിച്ച 'തുള്ളുവതോ ഇളമൈ' ആയിരുന്നു ആദ്യചിത്രം. 'ആടുകളം' എന്ന തമിഴ് ചലച്ചിത്രത്തിലെ അഭിനയത്തിന് 2010ലെ മികച്ച നടനുള്ള ദേശീയ പുരസ്‌കാരം ലഭിച്ചിട്ടുണ്ട്.

അതേസമയം, തമിഴകത്ത് വേറിട്ട കഥാപാത്രങ്ങള്‍ ചെയ്‍ത് ശ്രദ്ധേയനായ ധനുഷിനെ ചുറ്റിപറ്റി മറ്റ് ചില വാർത്തകളും പുറത്ത് വന്നിരുന്നു. വിജയ ചിത്രങ്ങളുടെ മാത്രം പിന്നാലെ പോകാതെ പ്രകടനത്തിലും മികവ് കാട്ടാൻ ശ്രമിക്കുന്ന നടന്റെ പുതിയ സിനിമയ്‍ക്ക് ലഭിക്കുന്ന പ്രതിഫലത്തെ കുറിച്ചാണ് ഇപോഴത്തെ ചര്‍ച്ച.

ശേഖര്‍ കമ്മുലയുടെ സിനിമയിലാണ് ധനുഷ് നായകനാകുന്നത്. തമിഴ്, തെലുങ്ക്, ഹിന്ദി ഭാഷകളിലായിട്ടാണ് ചിത്രം എത്തുന്നത്. ധനുഷിന്റെ മികച്ച കഥാപാത്രമായിരിക്കും ചിത്രത്തിലേത്.

സിനിമയ്‍ക്ക് 50 കോടി രൂപയാണ് ധനുഷിന് പ്രതിഫലമായി ലഭിക്കുന്നത് എന്നാണ് റിപ്പോര്‍ട്ട്. ചിത്രം നിര്‍മ്മിക്കുന്നത് ശ്രീ വെങ്കിടേശ്വര സിനിമാസ് എല്‍എല്‍പി ആണ്. സിനിമയുടെ പ്രമേയം സംബന്ധിച്ചുള്ള കാര്യങ്ങള്‍ പുറത്തുവിട്ടിട്ടില്ല.