വിവാഹമോചനത്തിന് പിന്നാലെ സിനിമയിൽ സജീവമാകുകയാണ് സാമന്ത. മഹാനടി എന്ന ചിത്രത്തിന് ശേഷം വിജയ് ദേവരകൊണ്ടയും സാമന്തയും ഒന്നിക്കുക്കുകയാണ്. ചിത്രത്തിന്റെ പ്രമേയം എന്തെന്ന് പുറത്തുവിട്ടിട്ടില്ല. ശിവ നിർവാണ സംവിധാനം ചെയ്യുന്ന ചിത്രത്തിന്റെ പൂജ കഴിഞ്ഞദിവസം നടന്നു. മലയാളിയായ ഹെഷാം അബ്ദുൾ വഹാബാണ് സം​ഗീത സംവിധാനം. ഹൃദയത്തിന് ശേഷം ഹെഷാം സം​ഗീതമൊരുക്കുന്ന ചിത്രം കൂടിയാണിത്. സ്പെഷൽ ടീം എന്നാണ് സാമന്ത ചിത്രത്തേക്കുറിച്ച് ട്വീറ്റ് ചെയ്തത്. ചിത്രത്തിന്റെ സെറ്റിലെത്താൻ കാത്തിരിക്കുകയാണെന്നും അവർ കുറിച്ചു. മൈത്രി മൂവി മേക്കേഴ്സ് ആണ് ചിത്രം നിർമിക്കുന്നത്. വിജയ് ദേവരകൊണ്ടയുടെ പതിനൊന്നാമത്തെ ചിത്രം എന്ന അർത്ഥത്തിൽ വി.ഡി 11 എന്ന പേരിലാണ് ചിത്രീകരണം നടക്കുക.

വിഘ്നേഷ് ശിവൻ സംവിധാനം ചെയ്യുന്ന കാത്തുവാക്കുല രണ്ട് കാതൽ ആണ് സാമന്തയുടേതായി ഇനി പുറത്തിറങ്ങാനുള്ളത്. വിജയ് സേതുപതിയും നയൻതാരയുമാണ് ചിത്രത്തിലെ മറ്റുപ്രധാന താരങ്ങൾ. ബഹുഭാഷാ ചിത്രമായ ശാകുന്തളവും സാമന്തയുടേതായി വരാനിരിക്കുന്നു. വിജയ് ദേവെരകൊണ്ട നായകനാകുന്ന ചിത്രമായി വൈകാതെ പ്രദര്‍ശനത്തിന് എത്താനുള്ളത് ലൈഗറാണ്. ബോക്സിംഗ് ഇതിഹാസം മൈക്ക് ടൈസണും ചിത്രത്തില്‍ അഭിനയിക്കുന്നുണ്ട്. 'ലൈഗര്‍' എന്ന ചിത്രത്തിലെ ഓരോ വിശേഷവും ഓണ്‍ലൈനില്‍ തരംഗമാകാറുണ്ട്. 'ലൈഗര്‍' എന്ന ചിത്രത്തിന്റെ ഡബ്ബിംഗ് മൈക്ക് ടൈസണ്‍ പൂര്‍ത്തിയാക്കിയെന്നായിരുന്നു ഏറ്റവും ഒടുവിലത്തെ റിപ്പോര്‍ട്ട്.