വേദിയിൽ നിന്നും മൈക്ക് വലിച്ചെറിഞ്ഞ് നടൻ പാർഥിപൻ. അമ്പരന്ന് സംഗീതസംവിധായകൻ എ.ആർ.റഹ്മാൻ . സിനിമയിലെ സീൻ അല്ല കേട്ടോ. യാഥാത്ഥത്തിൽ സംഭവിച്ചതാണ്. ‘ഇരവിൻ നിഴൽ’ ചിത്രത്തിന്റെ ഓഡിയോ ലോഞ്ചിൽ സംസാരിക്കുകയായിരുന്നു പാർത്ഥിപനും എ.ആർ.റഹ്മാനും.

സിനിമയെക്കുറിച്ച്‌ രണ്ടുപേരും സംസാരിക്കുന്നതിനിടയിൽ നടന്റെ മൈക്കിൽ ചെറിയ തകരാറുകൾ സംഭവിച്ചു. വേദിക്കു സമീപമുണ്ടായിരുന്ന വ്യക്തി മൈക്ക് കൈമാറാൻ ആവശ്യപ്പെട്ടു. അപ്പോൾ ദേഷ്യം നിയന്ത്രിക്കാൻ സാധിക്കാതെ പാർഥിപൻ മൈക്ക് വലിച്ചെറിഞ്ഞു കൊടുക്കുകയായിരുന്നു.

പാർഥിപന്റെ ദേഷ്യം കണ്ട റഹ്മാനും മറ്റുള്ളവരും അമ്പരന്നു. തുടർന്ന് താൻ ചെയ്തതു തെറ്റാണെന്നു പാർഥിപന് മനസ്സിലായി. അതോടെ അദ്ദേഹം ക്ഷമ ചോദിക്കുകയും ചെയ്തു. താൻ വലിയ സമ്മർദ്ദത്തിലായിരുന്നു. അതുകൊണ്ട് സ്വയം നിയന്ത്രിക്കാനായില്ല. പെട്ടെന്ന് അങ്ങനെ ചെയ്യാൻ കാരണമതാണെന്നും നടൻ വ്യക്തമാക്കി.

ഈ സംഭവത്തിന്റെ വിഡിയോ ലക്ഷക്കണക്കിനു ആൾക്കാർ കണ്ടു. 2 പതിറ്റാണ്ടിനു ശേഷം പാർഥിപനും എ.ആർ.റഹ്മാനും ഒരുമിക്കുന്ന ചിത്രമാണ് ‘ഇരവിൻ നിഴൽ’. 2001ല്‍ പാര്‍ഥിപന്‍ സംവിധാനം ചെയ്ത ‘യേലേലോ’ എന്ന ചിത്രത്തിനു വേണ്ടി എ.ആര്‍ റഹ്മാന്‍ സംഗീതമൊരുക്കി. അതിനു ശേഷം റഹ്മാനോപ്പം പാര്‍ഥിപനൊപ്പം മറ്റൊരു സിനിമ ചെയ്തിട്ടില്ല.