സായ് പല്ലവി ടൈറ്റില്‍ കഥാപാത്രമായി തീയറ്ററുകളിലെത്തിയ ഗൗതം രാമചന്ദ്രൻ ചിത്രം ഗാര്‍ഗി ക്ക് മികച്ച പ്രതികരണങ്ങളാണ് ലഭിക്കുന്നത്. ഇപ്പോഴിതാ ചിത്രത്തിന്റെ പ്രൊമോഷന്റെ ഭാഗമായി പ്രദര്‍ശിപ്പിക്കുന്ന തീയറ്ററുകളില്‍ സായ് പല്ലവി നേരിട്ടെത്തി പ്രേക്ഷകരെ കാണുകയാണ് .

ചെന്നൈയിലും ഹൈദരാബാദിലുമുള്ള തീയറ്ററുകളിലാണ് സായ് പല്ലവി എത്തിയത്. ഇതിന്‍റെ വീഡിയോകള്‍ സോഷ്യല്‍ മീഡിയയില്‍ തരംഗമാവുന്നുണ്ട്.ചെന്നൈയില്‍ എസ്‍.പി.ഐ എസ്കേപ്പ്, പി.വി.ആര്‍ ഗ്രാന്‍ഡ് ഗലാഡ, വേളച്ചേരിയിലുള്ള ലൂക്സ്, പിവിആര്‍ എന്നീ തീയറ്ററുകളില്‍ സായ് പല്ലവി എത്തിയതിന്‍റെ വീഡിയോ നിര്‍മ്മാതാക്കള്‍ തന്നെ സോഷ്യല്‍ മീഡിയയിലൂടെ പുറത്തിറക്കിയിട്ടുണ്ട്.

ചിത്രം കണ്ടിരിക്കെ ചിത്രത്തിലെ നായിക അപ്രതീക്ഷിതമായി മുന്നിലെത്തുമ്പോഴുള്ള സിനിമാപ്രേമികളുടെ ആഹ്ലാദം വീഡിയോയില്‍ കാണാം. ആരാധകരോട് ചിത്രത്തെക്കുറിച്ച് സംസാരിച്ചും ഒപ്പം നിന്ന് സെല്‍ഫിയെടുത്തുമാണ് സായ് പല്ലവി മടങ്ങിയത്.

സായ് പല്ലവിക്കൊപ്പം ഐശ്വര്യ ലക്ഷ്‍മിയും ഒരു പ്രധാന കഥാപാത്രത്തെ അവതരിപ്പിച്ചിരിക്കുന്നു. ആര്‍ എസ് ശിവജി, കലൈമാമണി ശരവണന്‍, ജയപ്രകാശ്, പ്രതാപ്, സുധ, ലിവിങ്സ്റ്റണ്‍, കവിതാലയ കൃഷ്ണന്‍, കലേഷ് രമാനന്ദ് തുടങ്ങിയവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്.

രവിചന്ദ്രന്‍ രാമചന്ദ്രന്‍, തോമസ് ജോര്‍ജ്, ഗൌതം രാമചന്ദ്രന്‍ എന്നിര്‍ക്കൊപ്പം ഐശ്വര്യ ലക്ഷ്മിയും നിര്‍മ്മാണ പങ്കാളിയാണ്. സംവിധായകനൊപ്പം ഹരിഹരന്‍ രാജുവും ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്.