മദ്യകമ്പനിയുടെ വമ്പൻ പരസ്യ ഓഫർ നിരസിച്ച് തമിഴ് നടൻ ചിമ്പു. മൾട്ടിനാഷണൽ ആൽക്കഹോൾ കമ്പനിയുടെ പരസ്യത്തിൽ അഭിനയിക്കാനുള്ള വലിയ ഓഫർ ഉണ്ടായിരുന്നിട്ടും താരം അത് നിരസിച്ചതായ്ണ് റിപ്പോർട്ടുകൾ. തെന്നിന്ത്യൻ നടന്മാരായ അല്ലു അര്‍ജുവിനും വിജയ് ദേവരകൊണ്ടക്കും പിന്നാലെയാണ് ചിമ്പുവും ഇത്തരത്തിലൊരു നിലപാടെടുത്തിരിക്കുന്നത്.

കോവിഡ് മഹാമാരിക്ക് മുമ്പ് ശരീരഭാരം വളരെയധികം കൂടിയ ചിമ്പു നിരന്തരമായ വ്യായാമത്തിലൂടെയാണ് ഇത് കുറച്ചത്. ഇതിന്റെ വീഡിയോ ചിമ്പു സോഷ്യൽ മീഡിയയയിൽ പങ്കുവെക്കുകയും ചെയ്തിരുന്നു. ആരോഗ്യകരമായ ജീവിതശൈലി പിന്തുടരാനും ഫിറ്റ്‌നസ് നിലനിർത്താനും ഈ വീഡിയോ പലർക്കും പ്രചോദനമായിരുന്നു.

ഇതിന്റെ തുടർച്ചായായി അനാരോഗ്യകരമായ ശീലങ്ങളും ജീവിതശൈലിയും താരം ഉപേക്ഷിച്ചെന്നും ഈ തീരുമാനം മദ്യത്തിന്റെ പരസ്യത്തിൽ അഭിനയിക്കാനുള്ള ഓഫർ നിരസിക്കാൻ കാരണമായെന്നും റിപ്പോർട്ടുണ്ട്. കരിയറിൽ വലിയ പരാജയങ്ങൾക്ക് ശേഷം നീണ്ട ഇടവേളയും താരം എടുത്തിരുന്നു.

മദ്യ കമ്പനിയുടെ പരസ്യത്തില്‍ അഭിനയിക്കാന്‍ 10 കോടിയാണ് അല്ലു അര്‍ജുവിന് ഓഫര്‍ ചെയ്തിരുന്നത്. എന്നാല്‍ തന്‍റെ ആരാധകരെ ഇത് സ്വാധീനിക്കുമെന്ന് ചൂണ്ടിക്കാട്ടി കോടികളുടെ ഓഫര്‍ താരം വേണ്ടെന്ന് വയ്ക്കുകയായിരുന്നു. ഈയിടെ ഒരു പുകയില കമ്പനിയുടെ പരസ്യത്തില്‍ നിന്നും താരം പിന്‍മാറിയിരുന്നു.

പരസ്യം തെറ്റിദ്ധാരണ പരത്തുമെന്നും ആരാധകരെ വഴിതെറ്റിക്കുമെന്നും പറഞ്ഞാണ് അല്ലു കോടികളുടെ പരസ്യം വേണ്ടെന്നു വച്ചത്. താന്‍ വ്യക്തിപരമായി പുകയില ഉല്‍പന്നങ്ങള്‍ ഉപയോഗിക്കാറില്ലെന്നും ആരോഗ്യത്തിന് ഹാനികരവും ആസക്തിയിലേക്കും നയിച്ചേക്കാവുന്ന ഇവയുടെ പരസ്യം കണ്ട് ആരാധകര്‍ ഉല്‍പ്പന്നം കഴിക്കാന്‍ തുടങ്ങണമെന്ന് നടന്‍ ആഗ്രഹിക്കുന്നില്ലെന്നും അടുത്ത വൃത്തങ്ങള്‍ വെളിപ്പെടുത്തിയിരുന്നു.