നിരൂപക പ്രശംസ നേടിയ സൂര്യയുടെ ജയ് ഭീം വീണ്ടും നിയമക്കുരുക്കിൽ. ചിത്രത്തിന്റെ കഥ മോഷ്ടിച്ചെന്നാരോപിച്ച് ചിത്രത്തിന്റെ സംവിധായകൻ ടി ജെ ജ്ഞാനവേൽ, നിർമ്മാതാക്കളായ ജ്യോതിക, സൂര്യ എന്നിവർക്കെതിരെ ചെന്നൈ പോലീസിൽ പരാതി നൽകിയിരുന്നു. ഇതിന്റെ അടിസ്ഥാനത്തിൽ പോലീസ് ഇരുവർക്കുമെതിരെ കേസ് എടുത്തു. യഥാർത്ഥ സംഭവങ്ങളെ അടിസ്ഥാനമാക്കി ചിത്രീകരിച്ച സിനിമയാണ് സൂര്യ കേന്ദ്രകഥാപാത്രത്തിലെത്തിയ ജയ് ഭീം. ജയ് ഭീം നിർമ്മാതാക്കൾ തന്റെ കഥ ഉപയോഗിച്ചെന്നും എന്നാൽ തനിക്ക് വാഗ്ദാനം ചെയ്തതുപോലെ റോയൽറ്റിയൊന്നും നൽകിയില്ലെന്നും, പരാതിക്കാരൻ പറയുന്നു. 50 ലക്ഷം രൂപ നൽകാമെന്നാണ് കുളഞ്ജിയപ്പയ്ക്ക് വാഗ്ദാനം ചെയ്തിരുന്നത്. പക്ഷേ പറഞ്ഞ പണം നൽകിയില്ല.

വണ്ണിയർ സമുദായത്തിന്റെ വികാരം വ്രണപ്പെടുത്തിയെന്നാരോപിച്ച് നേരത്തെ സിനിമ വിവാദത്തിൽ അകപ്പെട്ടിരുന്നു. മാസങ്ങൾ നീണ്ട നിയമപോരാട്ടത്തിനൊടുവിൽ ജയ് ഭീം, സൂര്യ, ജ്യോതിക, സംവിധായകൻ ടി ജെ ജ്ഞാനവേൽ എന്നിവർക്കെതിരായ എഫ്‌ഐആർ ഏതാനും ദിവസങ്ങൾക്ക് മുമ്പ് മദ്രാസ് ഹൈക്കോടതി തള്ളിയിരുന്നു.

ജയ് ഭീമിൽ വണ്ണിയർ സമുദായത്തെ മോശമായി ചിത്രീകരിച്ചതിന് മാപ്പ് പറയണമെന്ന് ആവശ്യപ്പെട്ട് വണ്ണിയാർ സംഘം വക്കീൽ നോട്ടീസ് നൽകിയിരുന്നു. സിനിമയിലെ ചില പ്രത്യേക രംഗങ്ങൾ നീക്കം ചെയ്യാനും 5 കോടി രൂപ നഷ്ടപരിഹാരം നൽകാനുമായിരുന്നു ആവശ്യപ്പെട്ടിരുന്നത്.

കുളഞ്ജിയപ്പയുടെ ജീവിതത്തെ ആസ്പദമാക്കിയാണ് സിനിമ പുരോഗമിക്കുന്നത്. 1993 ൽ കമ്മാരപുരം പൊലീസ് സ്റ്റേഷനിൽ തനിക്ക് അനുഭവിക്കേണ്ടി വന്ന കൊടിയ പീഡനങ്ങളായിരുന്നുവെന്നും 2019 ൽ സംവിധായകൻ ജ്ഞാനവേൽ വീട്ടിലെത്തിയപ്പോൾ ഇക്കാര്യങ്ങളെല്ലാം വിവരിച്ചിരുന്നുവെന്നും കുളഞ്ജിയപ്പ പറയുന്നു.