മലയാളത്തിലും തെന്നിന്ത്യയിലും ഒരുപോലെ ആരാധകരുള്ള നടിയാണ് ഭാവന. മലയാളത്തിലൂടെയാണ് സിനിമാ ലോകത്ത് എത്തിയതെങ്കിലും വളരെ പെട്ടെന്ന് തന്നെ തെന്നിന്ത്യന്‍ സിനിമ ലോകത്ത് തന്റേതായ സ്ഥാനം കണ്ടെത്തുകയായിരുന്നു. നിരവധി ഭാഷകളില്‍ അഭിനയിച്ച താരം മലയാളത്തിലെ ഒട്ടനവധി ത്രില്ലര്‍ ചിത്രങ്ങളിലും വേഷമിട്ടിരുന്നു. കിട്ടുന്ന കഥാപാത്രങ്ങളില്‍ ഗംഭീരമായ പ്രകടനം തന്നെയാണ് താരം കാഴ്ച്ചവെച്ചത്.

ഇതിനാല്‍ തന്നെ ഭാവനക്ക് മലയാളത്തില്‍ നിരവധി അവസരങ്ങളും ലഭിച്ചു. നടിയായും സഹനടിയായും ഒക്കെയുള്ള തന്റെ അഭിനയത്തിനും ആരാധകര്‍ ഏറെയാണ്. മറ്റു ഭാഷകളിലേക്ക് ചേക്കേറിയപ്പോഴും മലയാള സിനിമയില്‍ ഭാവനയ്ക്ക് വലിയ സ്വീകാര്യതയുണ്ടായിരുന്നു. എന്നാല്‍ കുറച്ച് നാളുകളായി മലയാളത്തില്‍ അത്രയധികം സജീവമല്ലായിരുന്നു ഭാവന. അഞ്ച് വർഷത്തെ ഇടവേളയ്ക്ക് ശേഷം ന്റിക്കാക്കാക്കൊരു പ്രേമണ്ടാർന്ന് എന്ന സിനിമയിലൂടെയാണ് താരം വീണ്ടും മലയാളത്തിലേയ്ക്ക് തിരിച്ചെത്തിയത്.

പുതുമുഖ സംവിധായകനായ ആദിൽ മൈമൂനാദ് അഷറഫ് സംവിധാനം ചെയ്യുന്ന സിനിമയിൽ ഷറഫുദീനാണ് സിനിമയിലെ നായകൻ. പ്രണയ കഥ പറയുന്ന സിനിമ ഫെബ്രുവരി 17 നാണ് റിലീസ് ചെയ്യുന്നത്. ഭാവനയുടെ തിരിച്ചു വരവ് എന്ന നിലയിൽ റിലീസിന് മുമ്പേ ന്റിക്കാക്കൊരു പ്രേമണ്ടാർന്ന് വാർത്തകളിൽ ഇടം നേടിയിരുന്നു. ഭാവനയ്ക്ക് നിരവധി അവസരങ്ങൾ ഇപ്പോൾ ലഭിക്കുന്നുണ്ട്. ഷാജി കൈലാസ് ഒരുക്കുന്ന ഹണ്ട് എന്ന സിനിമയാണ് ഇതിൽ ചിത്രീകരണം നടന്ന് കൊണ്ടിരിക്കുന്നത്. ഹൊറർ പശ്ചാത്തലത്തിലൊരുങ്ങുന്ന സിനിമയാണ് ഹണ്ട്.

ഒരുകാലത്ത് മലയാളത്തിലെ സൂപ്പർ ഹിറ്റ് സിനിമകളിലെ നായിക നടിയായിരുന്നുന്നു ഭാവന. സിനിമകളിൽ സജീവമായിരുന്ന കാലത്ത് കൂടുതലും കൊമേഴ്ഷ്യൽ സിനിമകളിലാണ് ഭാവന തിളങ്ങിയത്. 2017 ലാണ് ഭാവന മലയാളത്തിൽ നിന്ന് മാറി നിൽക്കാൻ തീരുമാനിക്കുന്നത്. ഇപ്പോഴിതാ സിനിമകളിലെ തിരക്കില്ലാതെ കഴിഞ്ഞ ആ കാലത്തെക്കുറിച്ച് സംസാരിച്ചിരിക്കുകയാണ് ഭാവന. ആദ്യമൊക്കെ ആസ്വദിച്ചെങ്കിലും കുറച്ച് മാസങ്ങൾക്കുള്ളിൽ തനിക്ക് പഴയ തിരക്കുകൾ മിസ് ചെയ്ത് തുടങ്ങിയെന്ന് ഭാവന പറയുന്നു. ഒരു യൂട്യൂബ് ചാനലിനോട് ആയിരുന്നു പ്രതികരണം.

ഒരുപാട് കാലം തിരക്ക് പിടിച്ച് സിനിമകൾ ചെയ്ത് കുറച്ച് കാലം വീട്ടിലിരുന്നപ്പോൾ ഭയങ്കര ഹാപ്പിയായിരുന്നു ഞാൻ‌. രാവിലെ അലാറം വെച്ച് എഴുന്നേൽക്കണ്ട, മേക്കപ്പ് ഇടേണ്ട, പൈജാമയിട്ട് അങ്ങോട്ടും ഇങ്ങോട്ടും ചുറ്റി നടക്കാം, സീരീസ് കാണുന്നു, ഫുഡ് ഓർഡർ ചെയ്ത് കഴിക്കാം'
'കുറച്ച് സമയം ഞാൻ എൻജോയ് ചെയ്തു. ഇത് ഞാൻ മിസ് ചെയ്തല്ലോ ദൈവമേ എന്ന്. കുറച്ച് കഴിഞ്ഞപ്പോൾ ഭയങ്കര പ്രശ്നമായിത്തുടങ്ങി.

ഞാനെന്നും ഈ നെറ്റ്ഫ്ലിക്സും കണ്ടിരുന്ന് എന്ത് ചെയ്യാൻ പോവുകയാണെന്ന് തോന്നി. തിരക്കുള്ള ലൈഫ് മിസ് ചെയ്തു. സത്യം പറഞ്ഞാൽ എനിക്കിപ്പോഴമുള്ള പേടിയാണ്. ഞാൻ കുറച്ച് കഴിഞ്ഞാൽ എന്റെ തിരക്കെല്ലാം കഴിഞ്ഞ് എന്ത് ചെയ്യുമെന്നാലോചിച്ച് പേടിയുണ്ട്. അതാലോചിച്ചാൽ എനിക്ക് ടെൻഷനാണ്.

ചിലരോട് എനിക്ക് ഭയങ്കര അസൂയ തോന്നും. എല്ലാത്തിൽ നിന്നും മാറി. ഞങ്ങൾക്കിത് മതി എന്ന് പറഞ്ഞിരിക്കുന്ന ഒരുപാട് പേരുണ്ട്. എന്നെക്കൊണ്ട് മൂന്ന് നാല് മാസം പറ്റി. അത് കഴിഞ്ഞ് ഭയങ്കര റെസ്റ്റ് ലെസായി തുടങ്ങി. അതെനിക്കിപ്പോഴും പേടിയുണ്ട്. ഇപ്പോൾ സിനിമകൾ ചെയ്യുന്നു. അത് കഴിഞ്ഞ് ഇനി ഇതില്ലാതാവുന്ന സമയത്ത് ഞാനെന്ത് ചെയ്യുമെന്ന് ഭാവന പറയുന്നു.