2023ല് പുറത്തിറങ്ങിയ ഇന്ത്യന് സിനിമകളില് തന്നെ ഒന്നാമത് എത്തിയിരിക്കുകയാണ് വിജയ് ചിത്രം ലിയോ
ബോക്സ് ഓഫീസ് കോട്ടകള് തകര്ക്കുന്ന വിജയ് ചിത്രങ്ങളുടെ പട്ടികയില് ഏറ്റവും മുന്നില് എത്തിയിരിക്കുകയാണ് ലിയോ ഇപ്പോള്.
കഴിഞ്ഞ ദിവസം റിലീസ് ചെയ്ത ചിത്രത്തില് ലിയോ ദാസ് ആയും പാര്ത്ഥിപന് ആയും വിജയ് നിറഞ്ഞാടിയപ്പോള് പ്രേക്ഷകര് ഒന്നടങ്കം അതേറ്റെടുത്തു. പ്രീ-സെയിലില് അടക്കം ചിത്രം പണം വാരിക്കൂട്ടി. ഇപ്പോഴിതാ ആദ്യദിനം ലിയോ നേടിയ ഔദ്യോഗിക കണക്കുകള് പുറത്തുവന്നിരിക്കുകയാണ്. നിര്മാതാക്കളായ സെവന് സ്ക്രീന് സ്റ്റുഡിയോ ആണ് ഔദ്യോഗിക കളക്ഷന് വിവരങ്ങള് പുറത്തുവിട്ടിരിക്കുന്നത്.
140 കോടിയാണ് ലിയോ നേടിയതെന്നായിരുന്നു ട്രേഡ് അനലിസ്റ്റുകളുടെ കണക്ക്. എന്നാല് ഈ കടക്കുകളെ പിന്തള്ളി കൊണ്ടുള്ള നേട്ടമാണ് ലിയോ സ്വന്തമാക്കിയത്. അതായത്, ആദ്യദിനം 148.5 കോടിയോളം രൂപയാണ് ലിയോ നേടിയിരിക്കുന്നത്. ഇതോടെ 2023ല് പുറത്തിറങ്ങിയ ഇന്ത്യന് സിനിമകളില് തന്നെ ഒന്നാമത് എത്തിയിരിക്കുകയാണ് ലിയോ.
ഇന്നലെ വരെ ഈ വര്ഷത്തെ ഏറ്റവും വലിയ ഹിറ്റുകളായിരുന്നത് ഷാരൂഖിന്റെ ജവാന്, പഠാന് എന്നീ ചിത്രങ്ങളാണ്. പഠാന് 106 കോടിയും ജവാന് 129 കോടിയുമാണ് ആദ്യദിനം നേടിയത്. ഈ റെക്കോര്ഡാണ് ഒറ്റദിവസത്തില് ലിയോ തിരുത്തി കുറിച്ചത്. ലോകേഷ് കനകരാജ് സംവിധാനം ചെയ്ത ചിത്രമാണ് ലിയോ. തൃഷ, ബാബു ആന്റണി, സഞ്ജയ് ദത്ത്, മാത്യു, അര്ജുന് സര്ജ തുടങ്ങി നിരവധി താരങ്ങള് അണിനിരന്ന ചിത്രത്തിന്റെ ബജറ്റ് 300 കോടി ആണെന്നാണ് വിവരം.
https://www.facebook.com/Malayalivartha
