ചിലര്‍ക്ക് രാവിലെ എഴുന്നേല്‍ക്കുമ്പോള്‍ കാലിന്റെ ഉപ്പൂറ്റിയില്‍ വേദനയുണ്ടാകും. കുറച്ചു നടക്കുമ്പോഴേക്കും ആ വേദന കുറയും. പക്ഷേ, അല്‍പനേരം വിശ്രമിച്ചശേഷം നടന്നാല്‍ വീണ്ടും വേദന വരും. ഇതിനെ മലബാറുകാര്‍ 'കുതികാല്‍ വേദന'യെന്നു പറയും. 30 വയസ്സിനു മുകളിലുള്ള ആര്‍ക്കും എപ്പോഴും വരാവുന്ന വേദനയാണിത്.

കാലിന്റെ അടിയിലെ മാംസപേശികളിലേക്കും തൊലിയിലേക്കും ആവശ്യമായ രക്തയോട്ടം കുറയുന്നതാണ് ഒരു കാരണം. കുറെയധികം സമയം വെള്ളത്തില്‍ കാലുകുത്തി നിന്ന് അലക്കുകയോ ജോലി ചെയ്യുകയോ മാര്‍ബിള്‍ ടൈലുകളില്‍ ചെരിപ്പിടാതെ നടക്കുകയോ തണുത്ത പ്രതലത്തില്‍ കൂടുതല്‍ നേരം നില്‍ക്കുകയോ ചെയ്താലും ഈ പ്രശ്‌നം വരാം. എസിയുടെയും ഫാനിന്റെയും തണുപ്പു കാറ്റടിച്ചാലും വേദന വരാം.

മാറി മാറി ചൂടും തണുപ്പുമുണ്ടാകുന്നതും പ്രശ്‌നം തന്നെ. ഹോട്ടലില്‍ നിന്നു നല്ലൊരു ചൂടു ചായ കഴിച്ചശേഷം എസി കാറില്‍ കയറി തണുപ്പിച്ച വെള്ളം കുടിച്ചാലും, ദീര്‍ഘ നേരം സൈക്കിള്‍ ചവിട്ടിയാലും (പണ്ടു കാലത്തെ നനവുള്ള ചക്രം പാടത്തു ചവിട്ടിയാലും) ഉപ്പൂറ്റി പിണങ്ങും. ഉപ്പൂറ്റിയുടെ എല്ലിന്റെ വളര്‍ച്ച(തഴമ്പ്)ആണ് ഈ വേദനയ്ക്കു മറ്റൊരു കാരണം. ചരല്‍ പോലുള്ള പ്രതലത്തിലൂടെ നടന്നാല്‍ ജീവന്‍ പോകുന്ന പോലുള്ള വേദനയുണ്ടാകും.

കൊട്ടംചുക്കാദി തൈലവും സഹചരാദി തൈലവും ഒരുമിച്ചു ചേര്‍ത്ത് അല്‍പമൊന്നു ചൂടാക്കി ഉപ്പൂറ്റിയിലും പരിസരത്തും പുരട്ടിയാല്‍ വേദനയ്ക്കു കുറവുണ്ടാകും ഈ തൈലമിശ്രിതം ചെറു ചൂടോടെ 20 മിനിറ്റ് ധാരകോരിയാലും മതി. എരിക്കിന്റെ ഇല അരിഞ്ഞു വാട്ടി കിഴികെട്ടി ചൂടാക്കിയും മുറിച്ച ചെറു നാരങ്ങയും പൊടിച്ച ഇന്തുപ്പും കൂടി വാട്ടിയും ഉപ്പൂറ്റി ഭാഗത്തു കിഴിവയ്ക്കുന്നതും നല്ലതാണ്.

ഒരു ട്രേയിലോ മറ്റോ പത്തിരുപതു ഗോലികള്‍ (കുട്ടികള്‍ കളിക്കുന്ന ഗോലി തന്നെ) ഇട്ട് അതില്‍ നേരത്തേ പറഞ്ഞ തൈലം ചൂടാക്കിയത് (25 മി.ലി) ഒഴിച്ചു വേദനയുള്ള കാല്‍ കൊണ്ടു ചവിട്ടി ചലിപ്പിച്ചു മസാജ് ചെയ്യുന്നതും നല്ല ചികിത്സയാണ്. രാത്രിയില്‍ സോക്‌സ് ഇട്ട് കമ്പിളിപ്പുതപ്പു പുതയ്ക്കണം. വീട്ടിനകത്തു റബര്‍ ചെരിപ്പ് ഇടാനും ശ്രമിക്കണം.