കൊവിഡുമായി ബന്ധപ്പെട്ടുണ്ടാകുന്ന അനുബന്ധ രോഗങ്ങളെക്കുറിച്ച് നിരവധി പഠനങ്ങൾ നടന്നിട്ടുണ്ട്. സാര്‍സ് കോവ്-2 വൈറസ് വൃക്കകളെ ബാധിക്കുകയും കോശങ്ങളില്‍ കേടുപാടുകൾ ഉണ്ടാക്കുകയും ചെയ്യുമെന്നാണ് ഗവേഷകരുടെ അന്താരാഷ്ട്രസംഘം പുതിയതായി കണ്ടെത്തിയിരിക്കുന്നത്.

ഇത് ദീര്‍ഘകാലാടിസ്ഥാനത്തില്‍ വൃക്കയുടെ പ്രവര്‍ത്തനങ്ങളെ ബാധിക്കുമെന്നും ഗവേഷകർ തെളിയിച്ചിരിക്കുകയാണിപ്പോൾ. കിഡ്‌നി ഫൈബ്രോസിസ് വൃക്കയിൽ പരുക്ക് പറ്റുന്നതിനെത്തുടർന്ന് ഉണ്ടാകുന്ന ഗുരുതരമായ രോഗാവസ്ഥയാണ്. കൊറോണ വൈറസ് മനുഷ്യ ശരീരത്തില്‍ ഉണ്ടാക്കുന്ന തകരാറുകൾ ഗുരുതരമാണ്.

ചിലപ്പോൾ വൃക്കകളിൽ അണുബാധയുണ്ടാകാൻ‍ വരെ സാധ്യതയുണ്ട്. എന്നാല്‍ ഇത്തരം അണുബാധയുടെ ഫലമായി വൃക്കയില്‍ എന്താണ് കൃത്യമായി സംഭവിക്കുന്നത് എന്ന് കണ്ടെത്താന്‍ ഗവേഷക സംഘത്തിന് ഇതുവരെ കഴിഞ്ഞിട്ടില്ല. ജര്‍മ്മനിയിലെ ആര്‍ഡബ്ല്യുടിഎച്ച് യുണിക്ലിനിക് ആഷന്‍, നെതര്‍ലന്‍ഡ്സിലെ റാഡ്ബൗഡ് യൂണിവേഴ്സിറ്റി മെഡിക്കല്‍ സെന്റര്‍ എന്നിവിടങ്ങളില്‍ നിന്നുള്ള ഗവേഷകര്‍ തീവ്രപരിചരണ വിഭാഗത്തില്‍ പ്രവേശിപ്പിക്കപ്പെട്ട കൊവിഡ് രോഗികളുടെ വൃക്കയിലെ കോശങ്ങള്‍ പരിശോധിക്കുകയുണ്ടായി.

കൊവിഡിന്റെ ഭാഗമല്ലാത്ത ശ്വാസകോശ അണുബാധയുള്ള രോഗികളുമായി താരതമ്യപ്പെടുത്തിയപ്പോള്‍ കൊവിഡ് രോഗികളുടെ കോശങ്ങളില്‍ കേടുപാടുകൾ ഉള്ളതായും കണ്ടെത്തി. 'സെല്‍ സ്‌റ്റെം സെല്‍' എന്ന ജേർണലിലാണ് ഗവേഷകര്‍ കണ്ടെ‌ത്തലുകൾ പ്രസിദ്ധീകരിച്ചിരിക്കുന്നത്.

പിന്നീടുള്ള ഘട്ടത്തിൽ വൃക്കയുടെ തകരാറിന്റെ കാരണം കണ്ടെത്തുന്നതിനും ഇത് വൈറസിന്റെ നേരിട്ടുള്ള പ്രവർത്തനത്തിന്റെ ഫലമാണോ എന്ന് മനസിലാക്കുന്നതിനും ഓര്‍ഗനോയിഡുകള്‍ എന്ന് വിളിക്കുന്ന മിനി കിഡ്‌നികള്‍ ഗവേഷക സംഘം ലാബിൽ വികസിപ്പിച്ചെ‌ടുത്തു. കിഡ്നി ഓര്‍ഗനോയിഡുകള്‍ വികസിപ്പിച്ചെടുത്തത് സ്റ്റെം സെല്ലുകളില്‍ നിന്നാണ്.

പ്രതിരോധ കോശങ്ങള്‍ ഒഴികെയുള്ള നിരവധി കോശങ്ങൾ അതില്‍ ഉള്‍പ്പെട്ടിരുന്നു. അതോ‌ടൊപ്പം ഗവേഷകർ കിഡ്നി ഓര്‍ഗനോയിഡുകളിൽ സാര്‍സ്-കോവ്-2 അണുബാധ ഉണ്ടാക്കുകയും അതിലൂടെ വൃക്കയിലെ കോശങ്ങളില്‍ വൈറസിന്റെ നേരിട്ടുള്ള സ്വാധീനം എന്താണെന്ന് മനസിലാക്കാൻ ശ്രമിക്കുകയും ചെയ്തു.

കൊവിഡ് 19 രോഗികളുടെ കോശങ്ങളിലെന്ന പോലെ കിഡ്‌നി ഓര്‍ഗനോയിഡുകളിലും കേടുപാടുകൾ ഉണ്ടാകുന്നതായി ഗവേഷകര്‍ കണ്ടെത്തി. രോഗം ബാധിച്ച കിഡ്‌നി ഓർഗനോയിഡുകള്‍ തെളിയിക്കുന്നത് വൈറസ് കോശങ്ങള്‍ക്ക് നേരിട്ട് കേടുപാടുകള്‍ വരുത്തുന്നുവെന്നാണ്. ഞങ്ങളു‌ടെ പഠനം കൊവിഡ് രോഗബാധ വൃക്കകളിൽ കേടുപാടുകൾ ഉണ്ടാക്കുന്നുവെന്ന് തെളിയിക്കുന്നു. കൊറോണ വൈറസ് വൃക്കകളുടെ പ്രവർത്തനക്ഷമത കുറയുന്നതിന് കാരണമാകുന്നുവെന്ന് മറ്റ് പഠനങ്ങൾ കാണിച്ചിട്ടുണ്ട്.

അതിനുള്ള വിശദീകരണമാണ് ഞങ്ങളുടെ പഠനം നൽകുന്നതെന്ന് ആർഡബ്ല്യുടിഎച്ചില്‍ നിന്നുള്ള കാതറീന റെയ്മര്‍ പറഞ്ഞു. നേരത്തെ വാഷിംഗ്ടണ്‍ സര്‍വകലാശാലയിലെ സ്‌കൂള്‍ ഓഫ് മെഡിസിന്റെ നേതൃത്വത്തിൽ നടത്തിയ ഒരു പഠനത്തില്‍ കൊവിഡ് വൈറസിന് മനുഷ്യന്റെ വൃക്കയിലെ കോശങ്ങളെ നേരിട്ട് ആക്രമിക്കാന്‍ കഴിയുമെന്ന് കണ്ടെത്തിയിരുന്നു.