വിക്‌സ് ആക്ഷന്‍ 500 ഉള്‍പ്പടെ രാജ്യത്ത് 344 മരുന്നുകള്‍ക്ക് കേന്ദ്ര സര്‍ക്കാര്‍ ഏര്‍പ്പെടുത്തിയിരുന്ന നിരോധനം ദില്ലി ഹൈക്കോടതി മാറ്റി. ആരോഗ്യത്തിന് അപകടമെന്ന് ചൂണ്ടിക്കാട്ടി വിക്‌സ് ആക്ഷന്‍ 500ന് പുറമെ കോറെക്‌സ്, സാരിഡോണ്‍, ഡികോള്‍ഡ് ടോട്ടല്‍ തുടങ്ങിയ മരുന്നുകളാണ് കേന്ദ്ര സര്‍ക്കാര്‍ നിരോധിച്ചത്. മരുന്ന് കന്പനികളുടെ വാദം അംഗീകരിച്ചാണ് കോടതിയുടെ വിധി.

ആവശ്യത്തിന് പരിശോധന നടത്തുകയോ, നടപടി ക്രമങ്ങള്‍ പാലിക്കുകയോ ചെയ്യാതെയാണ് മരുന്നുകളുടെ സംയുക്തങ്ങള്‍ക്കും ബ്രാന്‍ഡുകള്‍ക്കും നിരോധനം ഏര്‍പ്പെടുത്തിയെന്ന് മരുന്ന് കന്പിനികള്‍ വാദിച്ചു.
എന്നാല്‍ മരുന്നുകളുടെ കൂട്ടുകള്‍ ശാസ്ത്രീയമായിട്ടല്ലെന്നായിരുന്നു കേന്ദ്രസര്‍ക്കാരിന്റെ വാദം. ഇത് കോടതി അംഗീകരിക്കാത്തതിനെ തുടര്‍ന്ന് ദില്ലി ഹൈക്കോടതി വിധി ചോദ്യം ചെയ്ത് കേന്ദ്ര സര്‍ക്കാര്‍ സുപ്രീകോടതിയെ സമീപിക്കും.