ജീവനുള്ളവയെല്ലാം മനുഷ്യനും മൃഗങ്ങളും പക്ഷികളും ഗർഭസ്ഥ ശിശുക്കൾ പോലും മൂത്രം ഒഴിക്കുന്നുണ്ട്. മൂത്രം ഒഴിക്കാതെ ഒരു നേരം പോലുമിരിക്കാൻ നമുക്കാവില്ല.

മൂത്രത്തിന് ഔഷധഗുണമുണ്ടെന്ന് അറിയാമോ? ഭാരതത്തിലെ പാരമ്പര്യവൈദ്യശാസ്ത്രങ്ങളിൽ ഔഷധമായി പശു വിന്റെ മൂത്രം ഉപയോഗിക്കുന്നുണ്ട്. നമ്മുടെ മുന്‍ പ്രധാനമന്ത്രി മൊറാര്‍ജി ദേശായി,മാന്‍ വേഴ്‌സസ് വൈല്‍ഡ് എന്ന ടിവി ഷോയിലെ താരം ബിയര്‍ ഗ്രിസല്‍സ് എന്നിങ്ങനെ പലരും സ്വന്തം മൂത്രം കുടിച്ചിരുന്നു.കേരളത്തിലും മൂത്രചികിത്സക്ക് പ്രചാരമുണ്ട്. മൂത്രചികിത്സയുടെ ഗുണങ്ങളെ കുറിച്ചു പ്രശസ്ത എഴുത്തുകാരനും ചിന്തകനുമായ ശ്രീ.പി.എൻ.ദാസൻ മാഷ് പറഞ്ഞിട്ടുണ്ട്.

മനുഷ്യന്റെ മൂത്ര സഞ്ചിയില്‍ 300 മില്ലീ ലിറ്റര്‍ മുതല്‍ അര ലിറ്റര്‍ വരെ മൂത്രം ഉണ്ടാകുമെന്നാണ് കണക്കാക്കുന്നത്. ഒരാൾ ഒരുദിവസം ഒഴിക്കുന്ന മൂത്രത്തിന്റെ അളവ് അയാളുടെ ആരോഗ്യത്തെ സൂചിപ്പിക്കുന്നു.

ഒരു ദിവസം ഏഴു തവണയിൽ കൂടുതൽ മൂത്രമൊഴിക്കുന്നുണ്ടെങ്കിൽ പ്രമേഹം പോലുള്ള അസുഖങ്ങളുണ്ടോ എന്ന് ടെസ്റ്റ് ചെയ്യേണ്ടതാണ്. അതുപോലെ ഒരു പ്രാവശ്യം മൂത്രമൊഴിക്കാൻ ഏഴു സെക്കൻഡിൽ കൂടുതൽ എടുക്കുന്നുണ്ടെങ്കിലും ശ്രദ്ധിക്കണം. ഒളിഗൂറിയ ( ആവശ്യത്തിന് മൂത്രം ഒഴിക്കാന്‍ പറ്റാത്ത അവസ്ഥ) ഉണ്ടോ എന്നറിയേണ്ടതുണ്ട്.

മൂത്രത്തിന്റെ നിറവും ആരോഗ്യവും തമ്മിലും ബന്ധമുണ്ട്. തെളിഞ്ഞ നിറമെങ്കില്‍ നിങ്ങളുടെ ശരീരത്തില്‍ ആവശ്യത്തിന് വെള്ളം ഉണ്ടെന്നും മങ്ങിയ മഞ്ഞ നിറമെങ്കില്‍ ആവശ്യത്തിലധികം വെള്ളം ഉണ്ടെന്നും കണക്കാക്കാം . മൂത്രത്തിന് കടും മഞ്ഞ നിറമാണെങ്കിൽ നിങ്ങൾ വെള്ളം കുടിക്കുന്നത് പോരാ എന്നാണർത്ഥം. മൂത്രത്തിന് ചാരനിറം ഉണ്ടെങ്കിൽ അണുബാധയുണ്ടെന്നാണ് അർഥം.

ഇനി മൂത്രത്തിന്റെ മണത്തിലുമുണ്ട് കാര്യം .മൂത്രത്തിന് മധുരമണമാണോ? എന്നാൽ ഉറപ്പിച്ചോളു ,നിങ്ങൾക്ക് പ്രമേഹം വരാനുള്ള സാധ്യതയുണ്ട്. ചിലർ മൂത്രമൊഴിച്ചാൽ ഉറുമ്പു വരുന്നത് കണ്ടിട്ടില്ലേ? അത് ഈ മധുരമണം
കാരണമാണ്.

കിഡ്നി വേണ്ട രീതിയില്‍ പ്രവര്‍ത്തിക്കുന്നില്ല എങ്കിൽ മൂത്രത്തിന് അസാധ്യ ഗന്ധം അനുഭവപ്പെടും .

ചൂര മത്സ്യം, മസാല കൂടുതല്‍ ചേര്‍ത്ത ഭക്ഷണം, കാപ്പി എന്നിവ അധികം കഴിച്ചയാളും മൂത്രത്തിന് ദുർഗന്ധം അനുഭവപ്പെടാം.

പുരാതന റോമാക്കാർ മൊത്ത വാഷ് ആയി ഉപയോഗിച്ചിരുന്നത് സ്വന്തം മൂത്രമായിരുന്നത്രെ. മൂത്രത്തിലെ അമോണിയ പല്ലുകൾക്ക് നിറം നൽകുമെന്ന് അവർ വിശ്വസിച്ചിരുന്നു. തുകലും കമ്പിളിയും ലിനനും ഒക്കെ നന്നാക്കിയെടുക്കാനും ഇവർ മൂത്രം ഉപയോഗിച്ചിരുന്നു എന്ന് ചരിത്രം പറയുന്നുണ്ട്.

റോമാ രാജ്യം കത്തിയെരിയുമ്പോള്‍ വീണവായിച്ച നീറോ ചക്രവർത്തിയെ അറിയില്ലേ? പുള്ളി മൂത്രത്തിന് നികുതി ഏര്‍പ്പെടുത്തിയിരുന്നത്രെ. വീടുകളില്‍ പോയി വ്യാപാരികള്‍ മൂത്രം ശേഖരിക്കുമായിരുന്നു.

ചർമ സംരക്ഷണത്തിനും മൂത്രം ഉപയോഗിക്കാം .ചര്‍മസംരക്ഷണത്തിന് ഉപയോഗിക്കുന്ന പല ക്രീമുകളിലും ഉള്ള യൂറിയ മൂത്രത്തിൽ ധാരാളമായി അടങ്ങിയിട്ടുണ്ട്. യൂറിയ മാത്രമല്ല മൂവായിരത്തിലധികം രാസപദാര്‍ത്ഥങ്ങളും മൂത്രത്തിലടങ്ങിയിരിക്കുന്നു.

രാസായുധങ്ങളില്‍ നിന്ന് രക്ഷപ്പെടാനായി രണ്ടാം ലോക മഹായുദ്ധ കാലത്ത് കനേഡിയന്‍ പട്ടാളക്കാര്‍ മൂത്രത്തില്‍ മുക്കിയ തുണികൊണ്ട് മുഖം മൂടിക്കെട്ടുമായിരുന്നു.