ശരീരകവും മാനസികവുമായ പലവിധ ബുദ്ധിമുട്ടുകള്‍ സ്ത്രീകള്‍ നേരിടുന്നുണ്ട്. എന്നാല്‍ അത്തരം ബുദ്ധിമുട്ടുകള്‍ ഒന്നുംതന്നെ പുറത്തുപറയാതെ മറച്ചുപിടിക്കുകയാണ് സ്ത്രീകള്‍ ചെയ്യുന്നത്. പ്രത്യേകിച്ച് പെണ്‍കുട്ടികള്‍. ഇത് ഭാവിയില്‍ ആര്‍ത്തവവും ഗര്‍ഭധാരണവുമൊക്കെയായി തെറ്റിദ്ധാരണകള്‍ക്കും കാരണമാകും. സാധാരണയായി 12 മുതല്‍ 14 വയസ്സിനകമാണ് ആര്‍ത്തവം സംഭവിക്കുന്നത്.

എന്നാല്‍ 14-16 വയസ് പ്രായമായിട്ടും ആര്‍ത്തവം വരാത്ത പെണ്‍കുട്ടികളില്‍ ഹോര്‍മോണ്‍ ചികിത്സ നടത്താറുണ്ട്. ആര്‍ത്തവം തുടങ്ങുന്നതിന്റെ 14 ദിവസം മുമ്പാണ് ബീജവിസര്‍ജനം നടക്കുന്നത്. സ്ത്രീശരീരത്തുണ്ടാകുന്ന ഹോര്‍മോണിന്റെ പ്രവര്‍ത്തന ഫലമായാണ് ഓരോ മാസവും കൃത്യമായി ആര്‍ത്തവവും ഓവുലേഷനും നടക്കുന്നത്. എല്ലാ ആര്‍ത്തവകാലത്തും ഓവുലേഷന്‍ നടക്കണമെന്നില്ല.

ഓവുലേഷന്‍ സമയത്ത് ചെറിയ തോതിലുള്ള നടുവേദനയും വയറുവേദനയും സ്വാഭാവികമാണ്. ചിലര്‍ക്ക് വേദന അസഹ്യമായിതോന്നാം. ആര്‍ത്തവ സമയത്തെ വയറുവേദനയ്ക്കുള്ള മറ്റൊരു കാരണം രക്താധിക്യ കൃഛ്‌റാര്‍ത്തവമാണ്. ഇവരില്‍ ആര്‍ത്തവം തുടങ്ങുന്നതിന് ഒരാഴ്ച മുമ്പേ വയറുവേദനയും നടുവേദനയും ആരംഭിക്കുകയും അസഹ്യമാകുകയും ചെയ്യുന്നു.

ഗര്‍ഭപാത്രത്തിലും അണ്ഡാശയത്തിലും ഉണ്ടാകുന്ന അസുഖങ്ങളാണ് രക്താധിക്യ കൃഛ്‌റാര്‍ത്തവത്തിന് കാരണം. എന്റോമെട്രിയോസിസ്, മുഴ, നീര്‍വീഴ്ച, പഴുപ്പ്, കാന്‍സര്‍ തുടങ്ങിയ നിരവധി കാരണങ്ങളാല്‍ ഇത് സംഭവിക്കാം. അതിനാല്‍ രക്താധിക്യ കൃഛ്‌റാര്‍ത്തവത്തിന് ചികിത്സ നിര്‍ബന്ധമാണ്. എന്നു കരുതി വയറുവേദനയുള്ള എല്ലാവര്‍ക്കും അസുഖം ഉണ്ട് എന്നല്ല. ഇങ്ങനെയുള്ളവര്‍ ഡോക്ടറെ കണ്ട് അസുഖങ്ങളൊന്നും ഇല്ലായെന്ന് ഉറപ്പ് വരുത്തിയാല്‍ ഭാവിയില്‍ പ്രശ്‌നങ്ങളൊന്നും ഉണ്ടാകില്ല.