ഹൃദയാരോഗ്യത്തിന് നിലക്കടല
എല്ലാവര്ക്കും ഇഷ്ടമാണ് നിലക്കടല. ഉത്സവപ്പറമ്പുകളിലും സിനിമാതീയറ്ററിലും മിക്കവരുടെയും കയ്യില് ഒരു പൊതി കടല കാണും. എന്നാല് ആരും ഭക്ഷണത്തോടൊപ്പം നിലക്കടല കഴിക്കാറില്ല. ഇനി കഴിച്ച് തുടങ്ങണം. കാരണം എന്താന്ന് അറിയേണ്ടേ. ഹൃദയാരോഗ്യത്തിന് എറ്റവും മികച്ചതാണ് നിലക്കടല. ഭക്ഷണത്തോടൊപ്പം നിലക്കടല കഴിക്കുന്നത് ഹൃദ്രോഗവും പക്ഷാഘാതവും തടയുമെന്ന് യുഎസിലെ പെന്സില്വാനിയ സ്റ്റേറ്റ് സര്വകലാശാല ഗവേഷകര് നടത്തിയ പഠനത്തില് തെളിഞ്ഞു. അമിതവണ്ണവും പൊണ്ണത്തടിയും ഉള്ള 15 പുരുഷന്മാരിലാണ് പഠനം നടത്തിയത്.
നിയന്ത്രിത ഭക്ഷണത്തോടൊപ്പം 85 ഗ്രാം പൊടിച്ച ഉപ്പില്ലാത്ത നിലക്കടല ഷേക്കിന്റെ രൂപത്തില്, പഠനത്തില് പങ്കെടുത്തവര്ക്ക് നല്കി. കണ്ട്രോള് ഗ്രൂപ്പില്പ്പെട്ടവര്ക്ക് ഇതേ പോഷകഗുണവും ഇതേ അളവുമുള്ള ഷേക്ക് നല്കി. പക്ഷേ നിലക്കടല അതില് അടങ്ങിയിരുന്നില്ല. 30, 60, 120,140 മിനിറ്റുകള്ക്ക് ശേഷം രക്തത്തിലെ ലിപ്പിഡ്, ലിപ്പോപ്രോട്ടീന്, ഇന്സുലിന് എന്നിവ അളന്നു. കണ്ട്രോള് ഗ്രൂപ്പിനെ അപേക്ഷിച്ച് നിലക്കടല ചേര്ന്ന ഭക്ഷണം കഴിച്ചവര്ക്ക് രക്തത്തിലടങ്ങിയ ഒരു തരം കൊഴുപ്പായ ട്രൈഗ്ലിസറൈഡിന്റെ അളവ് 32 ശതമാനം കുറഞ്ഞതായി കണ്ടു. ഭക്ഷണത്തോടൊപ്പം നിലക്കടല കഴിച്ചപ്പോള് സാധാരണഗതിയില് ട്രൈഗ്ലിസറൈഡിന്റെ അളവ് കൂടേണ്ടതാണ്. നിലക്കടല കഴിക്കുന്നത് ഹൃദയധമനികളുടെ കോശങ്ങളെ ആരോഗ്യമുള്ളതാക്കുന്നു.
കൂടുതല് വഴക്കമുള്ളതായിരിക്കാന് സഹായിക്കുകയും ചെയ്യുന്നു. എപ്പോഴൊക്കെ നമ്മള് ഭക്ഷണം കഴിച്ചാലും ഭക്ഷണശേഷം ഹൃദയധമനികള്ക്ക് കുറച്ചു കല്ലിപ്പുണ്ടാകും. എന്നാല് ഭക്ഷണത്തോടൊപ്പം നിലക്കടല കഴിച്ചാല് അതു ധമനികളെ കാഠിന്യമുളളതാക്കുന്നതില് നിന്നും തടയുന്നു. ധമനികളുടെ കട്ടികൂടല്, ശരീരത്തിലെ രക്തപ്രവാഹത്തെ പരിമിതപ്പെടുത്തുകയും അതു കൊണ്ട് ഹൃദയത്തിന് കൂടുതല് അധ്വാനിക്കേണ്ടതായും വരുന്നു. ഇത് കാലക്രമേണ ഹൃദയസംബന്ധമായ ഗുരുതര രോഗങ്ങള്ക്ക് കാരണമാകും.
https://www.facebook.com/Malayalivartha