സ്ത്രീകളില്‍ ആര്‍ത്തവ വിരാമത്തോടനുബന്ധിച്ച് കഠിനമായ ചൂടും അസ്വസ്ഥപ്പെടുത്തുന്ന വിയര്‍പ്പും അനുഭവപ്പെടും. ഇറുകിയ വസ്ത്രങ്ങള്‍ ധരിക്കുക, സമ്മര്‍ദം അനുഭവിക്കുക എന്നിവ മൂലമോ കാപ്പി, എരിവു കൂടിയ ഭക്ഷണം, മദ്യം ഇവയുടെ ഉപയോഗം മൂലമോ അത്യുഷ്ണം വര്‍ധിക്കാം. അയഞ്ഞ വസ്ത്രങ്ങള്‍ ധരിക്കുക. ഇടയ്ക്കിടെ തണുത്ത വെള്ളം കുടിക്കുക എന്നിവയാല്‍ ഉഷ്ണം അല്പം കുറയ്ക്കാന്‍ സാധിക്കും.

ആര്‍ത്തവ വിരാമത്തോടനുബന്ധിച്ച് സ്ത്രീകളിലുണ്ടാകുന്ന അത്യുഷ്ണാനുഭവം ഹൃദ്രോഗത്തിലേക്ക് നയിക്കാമെന്നു പഠനം. 70 ശതമാനം സ്ത്രീകള്‍ക്കും ഉണ്ടാകാവുന്ന ഈ അവസ്ഥ, മൂന്നിലൊന്ന് പേര്‍ക്കും പതിവായും കഠിനമായും അനുഭവപ്പെടുന്നു. ഹൃദയത്തിന്റെയും എല്ലിന്റെയും തലച്ചോറിന്റെയും ആരോഗ്യവുമായും അത്യുഷ്ണം ബന്ധപ്പെട്ടിരിക്കുന്നു. ഹൃദയസംബന്ധമായ പ്രവര്‍ത്തനങ്ങളിലെ മാറ്റവുമായി ബന്ധപ്പെട്ട ഈ അത്യുഷ്ണാനുഭവം ആര്‍ത്തവ വിരാമത്തിന് മുമ്പാണ് അനുഭവപ്പെടുക.

40 മുതല്‍ 60 വയസ്സുവരെ പ്രായമുള്ള പുകവലിക്കാത്ത 272 സ്ത്രീകളില്‍ നടത്തിയ പഠനത്തില്‍, അത്യുഷ്ണവും രക്തക്കുഴലുകളുടെ ആന്തരിക പാളിയായ എന്‍ഡോതീലിയന്‍ കോശങ്ങളും തമ്മിലുള്ള ബന്ധം പരിശോധിച്ചു. അത്യുഷ്ണത്തിന് രക്തക്കുഴലുകളെ വലുതാക്കാനുള്ള കഴിവ് പഠനസാമ്പിളിലെ ചെറുപ്പക്കാരായ സ്ത്രീകളില്‍ മാത്രമാണ് രേഖപ്പെടുത്തിയത്.

54 മുതല്‍ 60 വയസ്സുവരെ പ്രായമുള്ള സ്ത്രീകളില്‍ അത്യുഷ്ണാനുഭവവും ഹൃദ്രോഗവും തമ്മില്‍ ബന്ധം കണ്ടില്ല. എന്നാല്‍ ആര്‍ത്തവവിരാമത്തിനു വളരെ മുന്‍പേ തന്നെ അനുഭവപ്പെടുന്ന അത്യുഷ്ണവും ഹൃദ്രോഗവും തമ്മില്‍ ബന്ധം ഉണ്ടെന്ന് പഠനത്തില്‍ കണ്ടു. ഈ പഠനം മെനോപോസ് എന്ന ജേണലില്‍ പ്രസിദ്ധീകരിച്ചിട്ടുണ്ട്.