ഇന്ന് ലോക ഹൃദയദിനമാണ്. മനുഷ്യ ജീവന്റെ നിലനില്‍പ് തന്നെ ഈ അവയവത്തിന്റെ പ്രവര്‍ത്തനത്തെ ആശ്രയിച്ചാണ് നില്‍ക്കുന്നത്. ശരീരത്തിനു വേണ്ട രക്തം ശുദ്ധീകരിച്ച് ഞരമ്പുകളിലേക്ക് പ്രവഹിപ്പിക്കുന്നതാണ് ഹൃദയത്തിന്റെ ജോലി.
ഏറ്റവും സങ്കീര്‍ണ്ണമായ പ്രവര്‍ത്തനങ്ങളില്‍ ഒന്നാണ് ഹൃദയത്തില്‍ നടക്കുന്ന രക്ത ശുദ്ധീകരണം. അതുക്കൊണ്ട് തന്നെ ഹൃദയത്തിന്റെ സംരക്ഷണം പ്രധാനവുമാണ്. എന്നാല്‍ കുറച്ച് കാലങ്ങള്‍ക്ക് മുമ്പ് വരെ ഹൃദയവുമായി ബന്ധപ്പെട്ട രോഗങ്ങള്‍ വര്‍ദ്ധിച്ചു വരികയായിരുന്നു. ഇപ്പോള്‍ ചികിത്സാ രംഗത്ത് കൈവരിച്ച നേട്ടങ്ങള്‍ അതിനെ ഒരു പരിധി വരെ കുറച്ചു കൊണ്ടു വന്നിട്ടുണ്ട്.
പക്ഷെ ഇപ്പോഴും ഹൃദയത്തിന് അപകടമാവുന്ന ശീലങ്ങള്‍ പലരും തുടരുകയാണ്. പുകവലി തന്നെയാണ് ഇതില്‍ ഏറ്റവും മാരകമായത്. ദിവസവും രണ്ടോ മൂന്നോ സിഗരറ്റ് വലിച്ചാല്‍ തന്നെ ഹൃദയത്തിന് അപകടമാവാനുള്ള സാദ്ധ്യത നാലു ശതമാനമാണ്. എന്നാല്‍ പലരും വലിക്കുന്ന സിഗരറ്റിന്റെ എണ്ണം അമ്പരിപ്പിക്കുന്നതാണ്.സിഗരറ്റ് വലി കുറച്ചതു കൊണ്ടായില്ല. അത് പരിപൂര്‍ണ്ണമായി നിര്‍ത്തുക തന്നെ വേണം. 
മറ്റൊരു പ്രധാന അപകടം കൊഴുപ്പ് കൂടുതലായി ശരീരത്തില്‍ അടിഞ്ഞു കൂടി രക്ത പ്രവാഹത്തില്‍ തടസ്സമുണ്ടാകുന്നതാണ്.ഇതിനു പ്രധാന കാരണം ജീവിത ശൈലിയിലുണ്ടാകുന്ന മാറ്റമാണ്. തിരക്കേറിയ ജീവിതവും ഫാസ്റ്റ് ഫുഡും ചേരുമ്പോള്‍ കൊഴുപ്പ് ശരീരത്തില്‍ അടിഞ്ഞു കൂടാന്‍ ഒരു പ്രയാസവും ഉണ്ടാവുകയില്ല.
ശരീരത്തിന് ആവശ്യമായ ഭക്ഷണം മാത്രം കഴിക്കുകയും വ്യായാമത്തിലൂടെ ശരീരത്തിലെ കൊഴുപ്പിന്റെ അളവിനെ നിയന്ത്രിക്കുകയും ചെയ്താല്‍ ഹൃദയത്തിനുള്ള അപകടം ഒരു പരിധി വരെ തടഞ്ഞു നിര്‍ത്താനാവുമെന്നതാണ് സത്യം.ഓര്‍ക്കുക ഹൃദയം വിലപ്പെട്ടതാണ് അതിനെ കാത്ത് സൂക്ഷിക്കാന്‍ നാം തന്നെയാണ് ശ്രദ്ധിക്കേണ്ടതും.