പ്രായം ഏറിവരുന്നു എന്ന് പറയുന്നത് ആര്‍ക്കും അത്ര ഇഷ്ടമുളള കാര്യമല്ല. പ്രയമാകുന്നതിന്റെ ലക്ഷണങ്ങള്‍ ശരീരം കാണിച്ചുതുടങ്ങുമ്പോഴാണ് എല്ലാവരും അതേപറ്റി ആലോചിക്കുന്നത്. പ്രായത്തെ തടഞ്ഞ് നിര്‍ത്താന്‍ നമുക്കാര്‍ക്കും കഴിയില്ല. എങ്കിലും ചില ജീവിതചൈര്യകളിലൂടെയും ഭക്ഷണക്രമീകരണങ്ങളിലൂടെയും ഒരു പരിധിവരെ പ്രായത്തെ പിടിച്ച് നിര്‍ത്താന്‍ സഹായിക്കും. പ്രായത്തെ തടഞ്ഞ് നിര്‍ത്തുന്ന ഒരു ഔഷധചായയെക്കുറിച്ച് അറിയാം. ചെമ്പരത്തിച്ചായ. കേട്ട് ഞെട്ടണ്ട. ഇത് ഒരു ഔഷധമാണ്.

ചെമ്പരത്തിച്ചായ ഉണ്ടാക്കാന്‍ എളുപ്പമാണ്. ചുവന്നതോ ഇളം ചുവപ്പു നിറമുള്ളതോ ആയ ചെമ്പരത്തിപ്പൂവിന്റെ ആറോ ഏഴോ ഇതളുകള്‍ മാത്രമെടുത്ത് 100 മില്ലി വെള്ളത്തില്‍ തിളപ്പിക്കുക. നല്ല ചുവന്ന ദ്രാവകം കിട്ടും. ഇത് അരിച്ചെടുത്ത് പാലും കൂടി ചേര്‍ത്ത് പാല്‍ ചായയായി ഉപയോഗിക്കാം. പൂവ് ഉണക്കിയും അല്ലാതെയും ചായ ഉണ്ടാക്കാനുപയോഗിക്കാറുണ്ട്. പുളിരുചിയാണ് ഇതിനു പൊതുവേ ഉള്ളത്. മധുരത്തിനായി പഞ്ചസാര ചേര്‍ത്തുപയോഗിക്കുന്നു. ഈ ചായയില്‍ ജീവകംസി, ധാതുക്കള്‍ എന്നിവ അടങ്ങിയിരിക്കുന്നു.

ദോഷകരമായ എല്‍.ഡി.എല്‍ കൊളസ്‌ട്രോള്‍ കുറയ്ക്കാന്‍ ചെമ്പരത്തി ഇലകൊണ്ടുള്ള ചായ ഫലപ്രദമാണ്. ധമനികളില്‍ കൊഴുപ്പ് അടിയുന്നത് തടയുകയും അതുവഴി കൊള്‌സ്‌ട്രോള്‍ കുറയ്ക്കാനും ഇത് സഹായിക്കും. ചുമ, ജലദോഷം എന്നിവയെ തടയാന്‍ സഹായിക്കുന്ന വിറ്റാമിന്‍ സി സമൃദ്ധമായി ചെമ്പരത്തി ചായയിലും, മറ്റ് ഉത്പന്നങ്ങളിലുമടങ്ങിയിരിക്കുന്നു. ജലദോഷത്തിന് ശമനം കിട്ടാനും ഇവ സഹായിക്കും.

വൃക്കത്തകരാറുള്ളവരില്‍ മൂത്രോത്പാദനം സുഗമമാക്കാന്‍ പഞ്ചസാര ചേര്‍ക്കാത്ത ചെമ്പരത്തി ചായ നല്ലതാണ്. ടെന്‍ഷന്‍ കുറയ്ക്കാനും ഇത് സഹായകരമാണ്. ദഹനസംബന്ധമായ പ്രശ്‌നങ്ങളെ പരിഹരിക്കാനും ചെമ്പരത്തിച്ചായ സഹായിക്കും. ചെമ്പരത്തി ഒരു പ്രകൃതിദത്ത ദഹനസഹായിയായി പ്രവര്‍ത്തിക്കുകയും, ശരീരഭാരം കുറയ്ക്കാന്‍ സഹായിക്കുകയും ചെയ്യും. ചെമ്പരത്തി ഇലകൊണ്ടുള്ള ചായ നല്ല ദഹനം നല്‍കുകയും, അതു വഴി കൊഴുപ്പ് അമിതമായി ശരീരത്തിലടിയുന്നത് തടയുകയും ചെയ്യും.