ആർത്തവ വിരാമം എന്നത് ഒരു സ്ത്രീയുടെ ആർത്തവ പ്രക്രിയ നിലയ്ക്കുന്നതിനെയാണ്‌ സൂചിപ്പിക്കുന്നത്. പ്രായപൂർത്തിയാവുന്നതോടെ സ്ത്രീകൾ മാസംതോറും ഒരു അണ്ഡം ഉല്പാദിപ്പിക്കുകയും അത് പ്രജനനം നടക്കാത്തപക്ഷം ആർത്തവം അഥവാ മാസമുറ എന്ന പ്രക്രിയ വഴി പുറന്തള്ളപ്പെടുകയും ചെയ്യുന്നു. ഇപ്രകാരം ഒരു സ്ത്രീ മദ്ധ്യവയസ് എത്തുന്നതുവരേ അണ്ഡോല്പാദനംതുടരുകയും ക്രമേണ അത് നിലയ്ക്കുകയും ചെയ്യുന്നു. അതോടെ ആർത്തവത്തിന്റെയും ആവശ്യമില്ലാതെ വരികയും ചെയ്യുന്നു. ആർത്തവ വിരാമം സ്ത്രീകളിൽ ശാരീരികവും മാനസികവുമായ പലമാറ്റങ്ങളൾക്ക് കാരണമാകുകയും ചെയ്യുന്നു. ഇന്ത്യൻ സ്ത്രീകളിൽ സാധാരണയായി 47മുതൽ 50 വയസ്സിനുള്ളിൽ ആർത്തവവിരാമം സംഭവിക്കുന്നു. പല സ്ത്രീകൾക്കും ഇന്ന് നേരത്തെ ആർത്തവവിരാമം കാണുന്നു.

40വയസ്സിനു മുൻപുള്ള ആർത്തവവിരാമത്തെ ഏർളി മെനോപാസ് എന്ന് പറയുന്നു. ഈ സ്ത്രീകളിൽ നേരത്തെ തന്നെ ഈസ്ട്രജൻ ഉത്പാദനം നിൽക്കുകയും വന്ധ്യത കാണുകയും ചെയ്യുന്നു. ഈസ്ട്രജൻ പല വിധത്തിൽ സ്ത്രീകളെ സഹായിക്കുന്നു. ഇത് ഹൃദയപേശികൾക്ക് ആശ്വാസം നൽകുന്നു, കൊളസ്‌ട്രോൾ നിയന്ത്രിക്കുന്നു, എല്ലുകളെ സംരക്ഷിക്കുന്നു. നേരത്തെ ആർത്തവവിരാമം സംഭവിക്കുന്ന സ്ത്രീകളിൽ ഇവ വേഗത്തിൽ സംഭവിക്കുന്നു.അതുകൊണ്ട് തന്നെ നേരത്തെ ആർത്തവവിരാമം സംഭവിക്കുന്നതിന്റെ ലക്ഷണങ്ങൾ മനസ്സിലാക്കി ഡോക്ടറെ കാണേണ്ടത് അത്യാവശ്യമാണ്. നേരത്തെ ആർത്തവവിരാമമുണ്ടാകുന്നതിന്റെ കാരണങ്ങൾ ഇവയൊക്കെയാണ്;

പൊണ്ണത്തടി, പിസിഒഡി, പുകവലി, കുറഞ്ഞ ബി.എം.ഐ തുടങ്ങിയ ഘടകങ്ങൾ അണ്ഡാശയത്തിന്റെ പ്രവർത്തനത്തെ സ്വാധീനിക്കുകയും ഹോർമോൺ മാറ്റങ്ങൾ ഉണ്ടാക്കുകയും നേരത്തെയുള്ള ആർത്തവവിരാമത്തിനു കാരണമാക്കുകയും ചെയ്യുന്നു. പ്രതിരോധശേഷി കുറയ്ക്കുന്ന രോഗങ്ങളായ വാതം, തൈറോയിഡ് രോഗങ്ങൾ എന്നിവ പ്രതിരോധശേഷി കുറയ്ക്കുകയും ശരീരം മുഴുവൻ വീക്കം ഉണ്ടാക്കുകയും ചെയ്യും. ഇത് അണ്ഡാശയത്തെ ബാധിക്കുകയും അതിന്റെ പ്രവർത്തനത്തെ തടസ്സപ്പെടുത്തുകയും ചെയ്യും.

അപസ്മാരം ഉള്ള സ്ത്രീകളിൽ അണ്ഡാശയത്തിനു ചില പ്രശ്‍നങ്ങൾ ഉണ്ടായി നേരത്തെ ആർത്തവവിരാമം സംഭവിക്കുന്നതായി കാണുന്നു.അപസ്മാരം ഉള്ള സ്ത്രീകളിൽ ശരാശരി 39 വയസ്സിൽ തന്നെ അണ്ഡശയാപ്രശ്നങ്ങൾ കാണുന്നുവെന്ന് എപ്പിസെപ്ഷ്യ ജേണലിൽ പറയുന്നു. ചിലപ്പോൾ ഇത് പാരമ്പര്യമായി ലഭിച്ചതാകാം. അതായത് അമ്മയിൽ നിന്നും മകളിലേക്ക്. അമ്മയ്ക്ക് നേരത്തെ ആർത്തവവിരാമം സംഭവിച്ചാൽ മകൾക്കും സംഭവിക്കാം. അതുകൊണ്ട് നിങ്ങളുടെ അമ്മയ്ക്ക് 30നോ 40 വയസ്സിനോ മുൻപ് ആർത്തവവിരാമം സംഭവിച്ചിട്ടുണ്ടെങ്കിൽ നേരത്തെ തന്നെ ഡോക്ടറെ സമീപിച്ചു ആവശ്യമായ മുൻകരുതലുകൾ എടുക്കേണ്ടതാണ്.

ക്യാൻസറോ പല തവണ റേഡിയേഷനും കീമോതെറാപ്പിയുമെല്ലാം ചെയ്തിട്ടുള്ള സ്ത്രീകളിൽ അണ്ഡാശയം ചുരുങ്ങുന്നതുവഴി നേരത്തെ ആർത്തവവിരാമം സംഭവിക്കാം. അണ്ഡാശയം നീക്കം ചെയ്ത സ്ത്രീകളിലും നേരത്തെ ആർത്തവവിരാമം കാണുന്നു. ക്രോമസോമിലെ അപാകതകൾ ക്രോമസോമിലെ ചില അപാകതകൾ നേരത്തെയുള്ള ആർത്തവവിരാമത്തിന് കാരണമാകാറുണ്ട്. അണ്ഡാശയം ശരിയായി പ്രവർത്തിക്കാത്ത ട്യൂണർ സിൻഡ്രോം പോലുള്ളവയോ, സെക്സ് ക്രോമസോമിലെ തകരാറുകൾ,ഡൗൺ സിൻഡ്രം,ഗോന്നഡാൽ ഡിസ്‌ജെനിസിസ് തുടങ്ങിയവ അണ്ഡാശയം പൂർണ്ണമായും രൂപപ്പെടാൻ അനുവദിക്കില്ല. ആർത്തവവിരാമം, വന്ധ്യത എന്നിവ കൂടാതെ കുട്ടിക്കാലത്തെ വളർച്ചയെയും/ഡെവലപ്മെന്റിനെയും ഇവ ബാധിക്കുന്നു.