ആസ്വാദ്യകരമായ രുചി മൂലം 'മാലാഖമാരുടെ ഫലം' എന്നാണ് പപ്പായ അറിയപ്പെടുന്നത്. പപ്പായ പൂര്‍ണ്ണമായും പഴുത്തു കഴിയുമ്ബോള്‍ ബീറ്റാ കരോട്ടിന്‍, പൊട്ടാസ്യം, വൈറ്റമിന്‍ A, B എന്നിവയുടെ കലവറയാകുന്നു. ഗര്‍ഭകാലത്ത് പപ്പായ കഴിക്കാമോ എന്നത് ഗര്‍ഭിണികളായ പല സ്ത്രീകളും ചോദിക്കുന്ന ഒരു ചോദ്യമാണ്.

ഗര്‍ഭകാലത്ത് പപ്പായ കഴിക്കുന്നത് ദോഷകരമാണെന്ന് പരക്കെ കരുതപ്പെടുന്നു. നമ്മുടെ നാട്ടില്‍ പച്ച പപ്പായയും പപ്പായപ്പഴവും കഴിക്കുന്നതില്‍ നിന്ന് ഗര്‍ഭിണികളെ വിലക്കുകയും ചെയ്യാറുണ്ട്. ഗര്‍ഭഛിദ്രമുണ്ടാക്കാനോ ടെറാട്ടജനിക് (ജനനവൈകല്യങ്ങള്‍ക്ക് കാരണമാകുന്ന വസ്തു) ആയി പ്രവര്‍ത്തിക്കാനോ ഉള്ള അതിന്റെ കഴിവാണ് പപ്പായയോടുള്ള ഭയത്തിനു കാരണം, .

ഗര്‍ഭകാലത്ത് പപ്പായ കഴിക്കുന്നതുമായി ബന്ധപ്പെട്ടുള്ള ചില ശാസ്ത്രീയ പഠനങ്ങള്‍ പരിശോധിക്കാം.

ഗര്‍ഭിണിയാവാന്‍ തയ്യാറെടുക്കുമ്ബോഴോ ഗര്‍ഭിണിയായിരിക്കുമ്ബോഴോ പച്ച പപ്പായ കഴിക്കരുതെന്ന് നിര്‍ദ്ദേശിക്കപ്പെടുന്നു. പച്ച പപ്പായയുടെ കറയില്‍ അടങ്ങിയിരിക്കുന്ന 'പാപെയ്ന്‍' ഗര്‍ഭപാത്ര സങ്കോചത്തിലേക്കും ഗര്‍ഭം അലസുന്നതിലേക്കും നയിച്ചേക്കാം. ദഹനക്കുറവുള്ളപ്പോള്‍ 'വെജിറ്റബിള്‍ പെപ്സിന്‍' അഥവാ പാപെയ്ന്‍ നല്ല ശമനം നല്‍കും.

പച്ച പപ്പായയുടെ കറ ഓക്സിടോസിന്‍ പോലെയും പ്രോസ്റ്റാഗ്ലാന്‍ഡിന്‍ (ഹോര്‍മോണുകള്‍) പോലെയും പ്രവര്‍ത്തിക്കും. ഈ ഹോര്‍മോണുകളാണ് പ്രസവവേദനയുടെ ലക്ഷണങ്ങള്‍ ശരീരത്തുണ്ടാക്കുന്നത്. പ്രസവസമയത്ത് ഗര്‍ഭപാത്രം സങ്കോചിക്കുന്നത് തുടങ്ങാനോ ശക്തമാക്കാനോ കൃത്രിമ ഓക്സിടോസിനും പ്രോസ്റ്റാഗ്ലാന്‍ഡിനും ഉപയോഗിക്കാറുണ്ട്.
സംവേദനക്ഷമത കൂടുതലുള്ള വ്യക്തികളില്‍ പപ്പായ കടുത്ത അലര്‍ജിയുണ്ടാക്കാം. പപ്പായയുടെ കറ കടുത്ത ചൊറിച്ചിലുണ്ടാക്കും. പച്ച പപ്പായയില്‍ കറ കൂടുതലായിരിക്കും.

പപ്പായപ്പഴത്തില്‍ അത് നിസ്സാര അളവിലേ ഉണ്ടാകൂ. മാസം തികയാതെ പ്രസവിക്കുകയോ ഗര്‍ഭപാത്രം സങ്കോചിക്കുന്നതുമൂലം ഗര്‍ഭമലസിപ്പോകുകയോ ചെയ്തിട്ടുള്ള സ്ത്രീകളില്‍ തീരെ ചെറിയ അളവിലാണെങ്കില്‍പ്പോലും പപ്പായയുടെ കറ അപകടകാരിയായേക്കാം.
മൃഗങ്ങളില്‍ നടത്തിയ പരീക്ഷണങ്ങളില്‍ പപ്പായയുടെ കുരു ഗര്‍ഭമലസുന്നതിനും പ്രത്യുല്പാദന ശേഷി ഇല്ലാതാക്കുന്നതിനും കാരണമാകുന്നുവെന്ന് റിപ്പോര്‍ട്ട് ചെയ്യപ്പെട്ടിട്ടുണ്ട്. എന്നാല്‍ മനുഷ്യരെ സംബന്ധിച്ചിടത്തോളം അത്തരം നിഗമനങ്ങളിലെത്താവുന്ന തരം റിപ്പോര്‍ട്ടുകളൊന്നും വന്നിട്ടില്ല.

പൂര്‍ണ്ണമായും പഴുത്ത പപ്പായ ഗര്‍ഭത്തിന് ഒരു ഭീഷണിയായി കരുതപ്പെടുന്നില്ല. എന്നിരുന്നാലും, പപ്പായപ്പഴം ഗര്‍ഭകാലത്ത് പൂര്‍ണ്ണമായും സുരക്ഷിതമാണോ അല്ലയോ എന്ന് അന്തിമാഭിപ്രായം പറയാനുമാവില്ല.