കഴിഞ്ഞ ദിവസങ്ങളില്‍ ചില തീവ്രവര്‍ഗ്ഗീയ വാദികള്‍ ചുനക്കരക്കാരനായ മുസ്ലിം യുവാവിന്റെയും തെക്കേക്കരയിലുള്ള ഹിന്ദു യുവതിയുടെയും രജിസ്റ്റര്‍ വിവാഹത്തിനായി ചെറിയനാട് സബ് രജിസ്ട്രാര്‍ ഓഫീസില്‍ പരസ്യം ചെയ്തിരിക്കുന്ന നോട്ടീസിന്റെ ഫോട്ടോയെടുത്ത് ലൗ ജിഹാദ് എന്ന പേരില്‍ വ്യാപക പ്രചാരണം നടത്തുകയാണ്...
ഈ വിഷയത്തില്‍ മനസിലാക്കിയ ചില കാര്യങ്ങള്‍ ചുനക്കര പഞ്ചായത്ത് മുന്‍ പ്രസിഡന്റ് പറയുന്നത് ഇങ്ങനെ: ദീര്‍ഘകാലമായി രണ്ടുപേരും പ്രണയത്തിലാണ്. യുവാവ് ഗള്‍ഫിലേക്ക് ജോലി തേടി പോയിരുന്നു. ഗള്‍ഫിലായിരുന്നപ്പോഴും പ്രണയം തുടര്‍ന്നു.
വിവരം അറിഞ്ഞ രണ്ടു വീട്ടുകാരും സ്വാഭാവികമായി ഇരുവരേയും പ്രണയത്തില്‍ നിന്നും പിന്തിരിപ്പിക്കാന്‍ പരമാവധി ശ്രമിച്ചു. നടക്കാതെ വന്നതിനാല്‍ അവരവരുടെ മതവിശ്വാസം നിലനിര്‍ത്തിക്കൊണ്ട് സ്‌പെഷ്യല്‍ മാര്യേജ് ആക്ട് പ്രകാരം വിവാഹം നടത്തി കൊടുക്കുവാന്‍ രണ്ട് പേരുടെയും മാതാപിതാക്കള്‍ തീരുമാനിച്ചു. അതിനായി സബ് രജിസ്ട്രാര്‍ ഓഫീസില്‍ പരസ്യം നല്‍കുകയും ചെയ്തു. ഇതോടെ ഒരു പറ്റം വര്‍ഗ്ഗീയ കോമരങ്ങള്‍ വ്യാജ പ്രചരണവുമായി രംഗത്തിറങ്ങിയിരിക്കുകയാണ്...

വാട്ട്‌സ്ആപ്പ് ഗ്രൂപ്പുകളടക്കം നവ മാധ്യമങ്ങളിലൂടെ ഇത്തരം പ്രചരണങ്ങള്‍ നടത്തുന്നവരെ കണ്ടെത്തി നിയമ നടപടികള്‍ സ്വീകരിക്കണമെന്ന് ആവശ്യപ്പെട്ട് പെണ്കുട്ടിയുടെ പിതാവ് പൊലീസില്‍ നല്‍കിയ പരാതി പരിഗണിച്ച് അന്വേഷണം നടക്കുകയാണ്.... കൂടാതെ തങ്ങളുടെ കുടുംബത്തെ അപമാനിക്കാന്‍ ശ്രമിക്കുകയും തങ്ങളുടെ സ്വകാര്യതയിലേക്ക് എത്തി നോക്കാന്‍ ശ്രമിക്കുന്ന ഈ കപട സദാചാരക്കാരെ നിയമത്തിനു മുന്നില്‍ കൊണ്ടുവരികയും ചെയ്യണമെന്ന് മുഖ്യമന്ത്രിക്കും ഡി.ജി.പിക്കും പെണ്‍കുട്ടിയുടെ പിതാവ് നല്‍കിയ പരാതിയില്‍ ആവശ്യപ്പെടുന്നു.

രണ്ട് മതങ്ങളില്‍പ്പെട്ടവര്‍ വിവാഹിതരാവുമ്പോള്‍ വരന്റെയോ വധുവിന്റേയോ മതത്തിലേക്ക് പരിവര്‍ത്തനം നടത്തി വിവാഹം നടത്താനല്ല ഇരുവരും അവരുടെ വീട്ടുകാരും തീരുമാനിച്ചതെന്നിരിക്കെ എന്ത് ലൗജിഹാദ്.. വ്യക്തി സ്വാതന്ത്ര്യത്തിനും ഇഷ്ടാനിഷ്ടങ്ങള്‍ക്കും നിയന്ത്രണം ഏര്‍പ്പെടുത്താന്‍ ആര്‍ക്കാണിവിടെ അവകാശം. ആടു മേയ്ക്കല്‍, ലൗ ജിഹാദ്, എന്‍ഐഎ, സിറിയ, ഐഎസ്.. എന്നൊക്കെപ്പറഞ്ഞ് വര്‍ഗ്ഗീയതയുടെ വിഷം കലക്കാനുള്ള ഏതു തരം നീക്കവും ചെറുത്ത് നിയമപരമായും ധാര്‍മികമായുമുള്ള പിന്തുണ ഈ കുടുംബങ്ങള്‍ക്ക് എല്ലാ മതേതര മനസുകളില്‍ നിന്നും ഉണ്ടാകുമെന്ന് പ്രതീക്ഷിക്കട്ടെ എന്ന് മുന്‍ പഞ്ചായത്ത് പ്രസിഡന്റ്, ബി.ബിനു ആവശ്യപ്പെട്ടു.