ദേശീയ ചലച്ചിത്രവിതരണ ചടങ്ങ് ബഹിഷ്ക്കരിച്ച കലാകാരന്മാരെ പരിഹസിച്ച ജോയി മാത്യു മുമ്പ് ഷട്ടറിന് അവാര്ഡ് ലഭിക്കാത്തിന് ജൂറി അംഗമായിരുന്ന ഡോ. ബിജുവിന് നേരെ തെറിയഭിഷേകം നടത്തിയിരുന്നു. എന്നിട്ടിപ്പോള് അവാര്ഡിന് വേണ്ടിയല്ല സിനിമ എടുക്കുന്നതെന്ന് വീരവാദം മുഴക്കുന്നു
അച്ചാര് കച്ചവടക്കാരില് നിന്നും അടിവസ്ത്രവ്യാപാരികളില് നിന്നും അവാര്ഡ് വാങ്ങിക്കുന്നവര്ക്ക് കേന്ദ്രമന്ത്രി സ്മൃതി ഇറാനിയില് നിന്ന് ദേശീയപുരസ്ക്കാരം വാങ്ങാന് മടിയെന്ന് പരിഹസിച്ച സംവിധായകന് ജോയിമാത്യൂവിന്റെ ഇരട്ടത്താപ്പ് സംവിധായകന് ഡോ.ബിജു വെളിപ്പെടുത്തി. 2012ല് തന്റെ ഷട്ടര് എന്ന സിനിമയ്ക്ക് ദേശീയപുരസ്ക്കാരം ലഭിക്കാത്തതിനെ തുടര്ന്ന് ജോയിമാത്യു അന്നത്തെ ജൂറി അംഗമായിരുന്ന ഡോ. ബിജുവിനെ ഫോണിലൂടെ അസഭ്യം പറഞ്ഞിരുന്നു. ആ കേസില് ജാമ്യത്തിലിറങ്ങിയ ജോയിമാത്യു വിചാരണ നേരിടുകയാണ്. അവാര്ഡിന് വേണ്ടിയല്ല ജനങ്ങള്ക്ക് വേണ്ടിയാണ് സിനിമയെടുക്കുന്നത്. തന്റെ പുതിയ ചിത്രം അങ്കിള് തിയേറ്ററില് ഓടുന്നത് അതിന് ഉദാഹരണമാണെന്നും ജോയിമാത്യു വീരവാദം മുഴക്കുന്നു...
ഡോ.ബിജു വിന്റെ ഫെയിസ്ബുക്ക് പോസ്റ്റ് വായിക്കാം... അവാര്ഡിന് വേണ്ടിയല്ല ജനങ്ങള്ക്ക് കാണാന് വേണ്ടി മാത്രമാണ് ഞാന് സിനിമ എടുക്കുന്നത് എന്ന് ഒരു സംവിധായക നടന്. ഇന്നലെ അവാര്ഡ് ദാന ചടങ്ങു ബഹിഷ്കരിച്ച നിലപാടുള്ള സിനിമാ പ്രവര്ത്തകരെ ആവോളം പരിഹസിക്കുന്നുമുണ്ട് അദ്ദേഹം....സത്യത്തില് ഇത് വായിച്ചപ്പോള് ചിരിക്കണോ കരയണോ എന്ന് സംശയം... കാര്യം മറ്റൊന്നുമല്ല. 2012 ല് ദേശീയ പുരസ്കാര ജൂറിയില് ഞാനും അംഗമായിരുന്നു. അന്ന് ദേശീയ പുരസ്കാരം പ്രഖ്യാപിച്ച ദിവസം രാത്രിയില് ഇതേ ദേഹം എന്നെ ഫോണില് വിളിച്ചിരുന്നു.അദ്ദേഹത്തിന്റെ സിനിമയ്ക്ക് ആ വര്ഷം അവാര്ഡ് കിട്ടാത്തത്തിലുള്ള ദേഷ്യം എന്നെ നല്ല ഒന്നാന്തരം തെറി പറഞ്ഞാണ് തീര്ത്തത്. തെറി മാത്രമല്ല ജാതി അധിക്ഷേപം കൂടി നടത്തിയ ശേഷമാണ് അദ്ദേഹം ഫോണ് വെച്ചത്...അല്ല ഞാന് ഫോണ് കട്ട് ചെയ്യുകയായിരുന്നു...
എന്നെ തെറി വിളിക്കുകയും ഭീഷണി പ്പെടുത്തുകയും ജാതി പറഞ്ഞു അധിക്ഷേപിക്കുകയും ചെയ്തതിന്റെ പേരില് ഞാന് കൊടുത്ത കേസില് അദ്ദേഹം ജാമ്യം എടുത്തു. കേസ് ഇപ്പോഴും തുടരുന്നു...തന്റെ സിനിമയ്ക്ക് അവാര്ഡ് കിട്ടിയില്ല എന്നതിന്റെ പേരില് ജൂറി മെമ്പറെ ഫോണില് വിളിച്ചു തെറി പറയുകയും അധിക്ഷേപിക്കുകയും ചെയ്ത അതേ ദേഹം ഇതാ ഇപ്പോള് പറയുന്നു. ഞാന് അവാര്ഡുകള്ക്ക് വേണ്ടിയല്ല ജനങ്ങള് കാണുവാന് വേണ്ടിയാണ് സിനിമ ചെയ്യുന്നത്..ഒപ്പം ഇത്തവണ ദേശീയ അവാര്ഡ് ദാന ചടങ്ങ് ബഹിഷ്കരിച്ച നിലപാടുള്ള കലാകാരന്മാരോട് പുച്ഛവും... ചിരിക്കണോ കരയണോ..അപ്പൊ സാറേ കോടതിയില് കേസിന്റെ അടുത്ത അവധിക്ക് കാണാം..
https://www.facebook.com/Malayalivartha
