അബുദാബിയിൽ ആഡംബരക്കാരിൽ കറങ്ങി നടന്നു മോഷണം നടത്തി വന്ന അറബ് വംശജനായ യുവാവിനെ പോലീസ് പിടികൂടി. കടകളില്‍ നിന്ന് റീ ചാര്‍ജ്ജ് കാര്‍ഡുകളും പണവുമായിരുന്നു ഇയാൾ സ്ഥിരമായി മോഷ്ടിച്ച് വന്നിരുന്നത്. അതോടൊപ്പം തട്ടിപ്പിനായി അവ്യക്തമായ നമ്പര്‍ പ്ലേറ്റായിരുന്നു ഇയാൾ ആഡംബര കാറിൽ ഘടിപ്പിച്ചിരുന്നത്.

ഹൈ ടെക് കള്ളനെ പിടികൂടിയ വിവരം അബുദാബി പൊലീസിന്റെ ഔദ്ദ്യോഗിക ട്വിറ്റര്‍ അക്കൗണ്ട് വഴിയാണ് അറിയിച്ചത്. കടകളില്‍ നിന്ന് നിന്ന് മൊബൈല്‍ കാര്‍ഡുകളോ അല്ലെങ്കില്‍ 1000 ദിര്‍ഹത്തിന് ചില്ലറയോ ആണ് ഇയാൾ ആവശ്യപ്പെടാറുള്ളത്. പണമോ കാര്‍ഡോ വാങ്ങിയാല്‍ പണം നല്‍കാതെ രക്ഷപെടുകയായിരുന്നു ഇയാളുടെ രീതി. വാഹനം പിടിക്കപ്പെടാതിരിക്കാന്‍ അവ്യക്തമായ നമ്പര്‍ പ്ലേറ്റും.

ഇത്തരത്തിലുള്ള നിരവധി സംഭവങ്ങള്‍ റിപ്പോര്‍ട്ട് ചെയ്യപ്പെട്ടതോടെ കള്ളനെ പിടികൂടാന്‍ പ്രത്യേക സംഘത്തെ നിയോഗിക്കുകയായിരുന്നുവെന്ന് അബുദാബി പൊലീസ് ഡയറക്ടര്‍ ബ്രിഗേഡിയര്‍ ജനറല്‍ മുസല്ലം മുഹമ്മദ് അല്‍ അമീറി അറിയിച്ചു.

വിശദമായ അന്വേഷണത്തിനൊടുവില്‍ താമസ സ്ഥലത്ത് നിന്നാണ് ഇയാളെ പിടികൂടിയത്. കുറ്റം സമ്മതിച്ചതോടെ പ്രോസിക്യൂഷന് കൈമാറി. അതേസമയം കടകളിലും മറ്റും വരുന്ന ഉപഭോക്താക്കളെ സൂക്ഷിക്കണമെന്നും ആദ്യം പണം വാങ്ങിയ ശേഷം സാധനം നല്‍കിയാല്‍ മതിയെന്നും പൊലീസ് അറിയിച്ചിട്ടുണ്ട്.