ഷാര്ജയിലെ അശ്രദ്ധമായ ഡ്രൈവിങ്ങ് കാരണം വിവാഹം കഴിഞ്ഞ് രണ്ടാം ദിവസം നവദമ്പതികള് അപകടത്തില് പെട്ടു; അപകടത്തില് കാറിലുണ്ടായിരുന്ന യുവതി സംഭവസ്ഥലത്തുവച്ചു തന്നെ മരിച്ചു
ഭര്ത്താവിന്റെ അശ്രദ്ധമായ ഡ്രൈവിങ്ങിന്റെ ഫലമായി വിവാഹം കഴിഞ്ഞ് രണ്ടാം ദിവസം ഭാര്യ മരിച്ചു. അപകടത്തില് ഗുരുതരമായി പരുക്കേറ്റ ഭര്ത്താവും ഷാര്ജയിലെ ആശുപത്രിയില് ചികില്സയിലാണ്. തിങ്കളാഴ്ച ഉണ്ടായ അപകടത്തിലാണ് ഹുയാം (25) എന്ന യുവതി മരിച്ചത്. ഭര്ത്താവ് മുഹമ്മദ് അബ്ദുല്ല അല് ജലാഫിനൊപ്പം ബന്ധുക്കളെ സന്ദര്ശിക്കാന് പോയപ്പോഴായിരുന്നു അപകടം.
ഗുരുതര പരുക്ക് പറ്റിയ ജലാഫ് അല് ഖ്വാസമി ആശുപത്രിയില് ഐസിയുവില് ആണ്. ശരീരത്തിന്റെ വിവിധ ഭാഗങ്ങളില് ഇയാള്ക്ക് പരുക്ക് പറ്റിയിട്ടുണ്ടെന്ന് അല് ബയാന് റിപ്പോര്ട്ട് ചെയ്തു. വരനും വധുവും ഹണിമൂണ് ആഘോഷിക്കാന് പദ്ധതിയിടുന്നതിനിടെയാണ് ഞെട്ടിപ്പിക്കുന്ന സംഭവം. ഷാര്ജയില് നിന്നും എമിറേറ്റ്സ് റോഡിലൂടെ തിരികെ വരുമ്പോള് വാഹനം ഓടിച്ചിരുന്ന ഭര്ത്താവ് ട്രാഫിക് നിയമം തെറ്റിച്ചു. പെട്ടെന്ന് പിന്നില് നിന്നും ഒരു ട്രക്ക് വന്ന് ഇവര് സഞ്ചരിച്ചിരുന്ന കാറില് ഇടിക്കുകയായിരുന്നു. ഇടിയുടെ ആഘാതത്തില് കാര് റോഡില് തലകീഴായി മറിഞ്ഞുവെന്ന് ഷാര്ജ പൊലീസ് അധികൃതര് പറഞ്ഞു. കാറിലുണ്ടായിരുന്ന യുവതി സംഭവസ്ഥലത്തുവച്ചു തന്നെ മരിച്ചു. ഗുരുതരമായി പരുക്കേറ്റ ഭര്ത്താവിനെ ആശുപത്രിയില് പ്രവേശിപ്പിക്കുകയും ചെയ്തുവെന്ന് ഷാര്ജ പൊലീസ് അറിയിച്ചു.
റോഡിലൂടെ വാഹനങ്ങള് ഓടിക്കുമ്പോള് ട്രാഫിക് നിയമങ്ങള് കര്ശനമായി പാലിക്കണമെന്ന് പൊലീസ് അഭ്യര്ഥിച്ചു. അപ്രതീക്ഷിതമായി ഉണ്ടായ മരണത്തിന്റെ ആഘാതത്തിലാണ് ദിബ്ബ അല് ഫുജൈറയിലെ ആളുകള്. ബന്ധുക്കളും നാട്ടുകാരും ഉള്പ്പെടെ നിരവധി ആളുകള് യുവതിയ്ക്ക് അനുശോചനം അറിയിക്കാന് എത്തി.
https://www.facebook.com/Malayalivartha
