പൊന്നാനി ഇടതുമുന്നണി സ്ഥാനാർഥി പി.വി അന്‍വര്‍ എം.എല്‍.എയ്ക്കെതിരെ കടുത്ത നിലപാടുമായി എ .ഐ.വൈ.എഫ്. ഇടതുമുന്നണിയില്‍ കയറിക്കൂടിയ പുഴുക്കുത്താണ് പി.വി അന്‍വറെന്ന് എ.ഐ.വൈ.എഫ് സംസ്ഥാന ജോയിന്റ് സെക്രട്ടറി പി.ഗവാസ് ആരോപിച്ചു. നിര്‍ണായക തിരഞ്ഞെടുപ്പില്‍ ഇടതുപക്ഷ സ്ഥാനാര്‍ഥിയെന്ന നിലയില്‍ മാത്രമാണ് പിന്തുണച്ചതെന്നും നിയമലംഘനങ്ങള്‍ക്കെതിരെ പോരാട്ടം തുടരുമെന്നും ഗവാസ് ഫെയ്സ് ബുക്കില്‍ കുറിച്ചു.

ഫേസ്ബുക്‌പോസ്റ്റ് ഇങ്ങനെ;

ഇടതുപക്ഷം എന്നത് ചില നിലപാടുകളുടെ കൂടി പേരാണ്. സത്യവും നീതിയും സമഭാവനയും ഉയർത്തിപ്പിടിക്കുന്ന, വർഗീയതയ്ക്കും ഫാസിസത്തിനുമെതിരെ സന്ധിയില്ലാ സമരം പ്രഖ്യാപിക്കുന്ന, അടിച്ചമർത്തപ്പെട്ടവരുടെയും നിസ്സഹായരുടെയും ശബ്ദമായി മാറുന്ന നിലപാടുകളുടെ കരുത്താണ് ഇടതുപക്ഷത്തെ മുന്നോട്ട് നയിക്കുന്നത്.

ഒന്നിച്ചൊന്നായ് പോരാട്ട പാതയിൽ അണിനിരക്കുന്നവർക്കിടയിലേക്ക് പല കാലങ്ങളിലും ചില നുഴഞ്ഞുകയറ്റങ്ങൾ ഉണ്ടാവാറുണ്ട്. നല്ലതല്ലാത്ത മാർഗ്ഗങ്ങളിലൂടെ കുന്നുകുടിയ സമ്പത്തിന്റെ ദന്തഗോപുരങ്ങളിലിരിക്കുന്ന ചിലർക്ക് അധികാര മോഹം വന്നു ചേരുക സ്വാഭാവികം. അധികാരത്തെ മറയാക്കി കൊള്ളരുതായ്മകൾ ചെയ്തു കൂട്ടുന്ന മറ്റു പലരേയും കാണുമ്പോൾ ഇത്തരം പണക്കാർക്കും മോഹമുദിക്കും. ഇത്തരത്തിൽ ഇടതു മുന്നണിയിൽ കയറി പറ്റിയ പുഴുക്കുത്താണ് പി.വി അൻവർ എന്ന അൻവർ മുതലാളി.

അധികാരത്തിന്റെ ബലത്തിൽ നിയമങ്ങൾ ലംഘിച്ചും ജനങ്ങളെ വെല്ലുവിളിച്ചും മുതലാളി മുന്നോട്ട് പോവുകയാണ്. ഒരിക്കലും ഈ മുതലാളിയുടെ കടന്നുകയറ്റങ്ങൾക്ക് മുമ്പിൽ സി പി ഐ പതറി നിന്നിട്ടില്ല. അതു കൊണ്ട് തന്നെയാണ് അൻവർ മുതലാളിക്ക് എന്നും സി പി ഐ ശത്രുപക്ഷത്താവുന്നത്.

രാജ്യത്തെ സംബന്ധിച്ച് ഏറെ പ്രാധാന്യമുള്ളൊരു പൊതു തെരഞ്ഞെടുപ്പാണ് നടക്കുന്നത് വർഗീയ ഫാസിസ്റ്റ് കൾക്ക് മുന്നിൽ മുട്ടുമടക്കണമോ, രാജ്യം അതിന്റെ അന്തസത്തയോടെ നിലനിൽക്കണമോ എന്ന ചോദ്യത്തോടെയാണ് നാം തെരഞ്ഞെടുപ്പിനെ നേരിട്ടത്.അത്തരമൊരു ഘട്ടത്തിൽ പൊന്നാനിയിലെ ഇടതുപക്ഷ സ്ഥാനാർത്ഥി എന്നത് മാത്രമാണ് അൻവറിനെ പിന്തുണക്കുന്നതിലെ സി.പി.ഐ ശരി.

വയനാട്ടിലും ഏറനാടും മത്സരിച്ചപ്പോൾ എതിർത്തതും, നിലമ്പുരിൽ പിന്തുണച്ചതും, കക്കാടംപൊയിലിൽ സമരം നടത്തിയതും ആ ഇടത്പക്ഷ ശരിയുടെ ഭാഗമാണ്.പൊന്നാനിയിൽ അദ്ദേഹത്തിന്റെ വിജയത്തിന് വേണ്ടി ശക്തമായി പ്രവർത്തിക്കുമ്പോൾ സി.പി.ഐ യെ നയിച്ചത് പാർട്ടി ഉയർത്തിപ്പിടിക്കുന്ന രാഷ്ടീയത്തിന്റെ കരുത്താണ്. അൻവർ എന്ന വ്യക്തിയല്ല, ഇടതുപക്ഷം എന്ന ബോധമാണ് ഞങ്ങളെനയിച്ചത്. സ്ഥാനാർത്ഥി ഒരു പ്രതീകം മാത്രം, കത്രിക അതിനായുള്ള ഒരു അടയാളവും.

തെരഞ്ഞെടുപ് കഴിഞ്ഞതോടെ അൻവർ വെറും അൻവാറുകുന്നു. പക്ഷേ സി.പി.ഐ. ഒരിക്കലും മാറുന്നുമില്ല. പ്രിയ അൻവർ നിങ്ങളുടെ ലോകം വളരെ ചെറുതാണ്. കുറേ പണവും സിൽബന്തികളും, കയ്യേറ്റവും, കള്ളത്തരങ്ങളും എന്നതിനപ്പുറം ആ ലോകത്തിന് വളർച്ചയില്ല. ഞങ്ങളുടെ ലോകം വളരെ വലുതാണ്. അത് തിരിച്ചറിയാനുള്ള വലുപ്പം നിങ്ങൾക്ക് ഒരിക്കലും ഉണ്ടാവുകയുമില്ല.