കൊറോണ വ്യാപനം നൽകിയ പ്രതിസന്ധികൾ മറികടക്കുന്ന സൗദിയില്‍ ജോലി ചെയ്യുന്ന പ്രവാസികള്‍ക്ക് നിലവിലെ സ്‌പോണ്‍സറെ വിട്ട് പുതിയൊരു ജോലി തെരഞ്ഞെടുക്കാന്‍ സ്വാതന്ത്ര്യം നല്‍കുന്ന തൊഴില്‍ നിയമ പരിഷ്‌ക്കരണം കഴിഞ്ഞ ദിവസം പാസ്സാക്കിയിരുന്നു. എന്നാൽ അടുത്ത വര്‍ഷത്തോടെയാണ് ഈ പരിഷ്‌ക്കരണങ്ങള്‍ നടപ്പില്‍ വരിക. ഇക്കാര്യത്തില്‍ കൂടുതല്‍ വ്യക്തത വരുത്തി രംഗത്തുവന്നിരിക്കുകയാണ് സൗദി ഹ്യൂമണ്‍ റിസോഴ്‌സസ് ആന്റ് സോഷ്യല്‍ ഡെവലപ്‌മെന്റ് മന്ത്രാലയം. ഇങ്ങനെ തൊഴില്‍ മാറ്റം നേടുന്നതിന് സാധാരണ നടപടിക്രമങ്ങള്‍ക്കാവശ്യമായ ചെലവുകളല്ലാതെ പ്രത്യേക ഫീസ് ഒന്നും ഈടാക്കില്ലെന്നും മന്ത്രാലയം വ്യക്തമാക്കിയിരിക്കുകയാണ്.

അതോടൊപ്പം തന്നെ മന്ത്രാലയം മുന്നോട്ടുവയ്ക്കുന്ന എട്ട് നിബന്ധനകളില്‍ ഏതെങ്കിലും ഒന്നുണ്ടെങ്കില്‍ മാത്രമേ നിലവിലെ സ്‌പോണ്‍സറെ മാറ്റി മറ്റൊരു സ്‌പോണ്‍സര്‍ക്കു കീഴില്‍ പുതിയ ജോലി തേടാന്‍ സാധിക്കുകയുള്ളൂ.

എട്ടു നിബന്ധനകള്‍ ഇവയാണ്:

1. സൗദിയില്‍ ജോലിക്കെത്തി മൂന്നു മാസമായിട്ടും സ്‌പോണ്‍സര്‍ തൊഴിലാളിയുമായി തൊഴില്‍ കരാര്‍ ഉണ്ടാക്കാത്ത പക്ഷം സ്‌പോണ്‍സറുടെ അനുവാദമില്ലാതെ പുതിയ ജോലി തേടാൻ സാധിക്കും.

2. തുടര്‍ച്ചയായി മൂന്നു മാസത്തെ ശമ്പളം പോലും നല്‍കാത്ത സ്‌പോണ്‍സറുടെ കീഴില്‍ ജോലിയില്‍ തുടരണമെന്നില്ല. അദ്ദേഹം അനുവദിച്ചില്ലെങ്കില്‍ ജോലി മാറാന്‍ തൊഴിലാളിക്ക് അധികാരമുണ്ടായിരിക്കുന്നതാണ്.

3. തൊഴില്‍ ദാതാവ് അപ്രത്യക്ഷനായാല്‍. സ്‌പോണ്‍സര്‍ മരണപ്പെടുകയോ, ജയിലിലാവുകയോ, യാത്രയിലാവുകയോ മറ്റോ ചെയ്താലും ജോലിക്കാരന് പുതിയ തൊഴില്‍ തേടാൻ സാധിക്കുന്നതാണ്.

4. ജീവനക്കാരന്റെ വര്‍ക്ക് പെര്‍മിറ്റിന്റെയോ റെസിഡന്‍സി പെര്‍മിറ്റിന്റെയോ (ഇഖാമ) കാലാവധി കഴിഞ്ഞാൽ മാറാൻ സാധിക്കും.

5. സ്‌പോണ്‍സര്‍ക്കെതിരേ സാമ്പത്തിക കുറ്റത്തിന് പരാതി നല്‍കുന്ന ജീവനക്കാരനും സ്‌പോണ്‍സറെ മാറ്റാന്‍ അധികാരം നൽകിയിട്ടുണ്ട്. പക്ഷെ, സാമ്പത്തിക തട്ടിപ്പില്‍ ജീവനക്കാരന് ഏതെങ്കിലും വിധത്തിലുള്ള പങ്ക് ഉണ്ടാകരുത്.

6. തൊഴില്‍ ദാതാവ് മനുഷ്യക്കടത്തില്‍ ഏര്‍പ്പെട്ടുവെന്നതിന് തെളിവുണ്ടെങ്കിലും അയാള്‍ക്കു കീഴില്‍ ജോലിയില്‍ തുടരണമെന്ന് നിര്‍ബന്ധമില്ല.

7. സ്‌പോണ്‍സറിനും തൊഴിലാളിക്കും ഇടയില്‍ തൊഴില്‍ തര്‍ക്കം ഉടലെടുക്കുകയും ഇതുമായി ബന്ധപ്പെട്ട കോടതി വ്യവഹാരങ്ങളില്‍ തുടര്‍ച്ചയായി രണ്ടു തവണ ഹാജറാവാതിരിക്കുകയും ചെയ്താലും സ്‌പോണ്‍സറെ ഒഴിവാക്കാൻ സാധിക്കുന്നതാണ്.

8. നിലവിലെ സ്‌പോണ്‍സര്‍ തൊഴില്‍ മാറ്റത്തിന് അനുവാദം നല്‍കിയാലും മറ്റൊരു സ്‌പോണ്‍സറുടെ കീഴില്‍ ജോലി നോക്കാൻ സാധിക്കും.

തൊഴില്‍ മാറ്റം നേടാന്‍ പ്രവാസി ജീവനക്കാരന് ഉണ്ടായിരിക്കേണ്ട പൊതു യോഗ്യതകളും മന്ത്രാലയം പുറത്തുവിടുകയുണ്ടായി. ആ യോഗ്യതകള്‍ ഇവയാണ്:

1. സൗദി തൊഴില്‍ നിയമങ്ങള്‍ അനുസരിച്ച് തൊഴിലിലേര്‍പ്പെട്ട ആളായിരിക്കണം പ്രവാസി ജോലിക്കാരന്‍.

2. സൗദിയില്‍ ആദ്യമായി എത്തിയതാണെങ്കില്‍ നിലവിലെ തൊഴില്‍ദാതാവിന് കീഴില്‍ ഒരു വര്‍ഷം തികയ്ക്കണം.

3. തൊഴിലാളിക്ക് രേഖാമൂലമുള്ള തൊഴില്‍ കരാര്‍ ഉണ്ടായിരിക്കണം.

4. ഖിവ പോര്‍ട്ടല്‍ വഴി സമര്‍പ്പിക്കപ്പെട്ട പുതിയ ജോബ് ഓഫര്‍ വേണം.

5. തൊഴില്‍ മാറാന്‍ താല്‍പര്യമുണ്ടെന്നു കാണിച്ച് നിലവിലെ സ്‌പോണ്‍സര്‍ക്ക് അപേക്ഷ നല്‍കണം. അതില്‍ നോട്ടീസ് പിരീഡ് എപ്പോള്‍ തുടങ്ങുമെന്ന് പ്രത്യേകം പറയുകയും വേണം.

അതേസമയം തൊഴില്‍ മാറി വരുന്ന ഒരു പ്രവാസി തൊഴിലാളിയെ സ്വീകരിക്കുന്ന പുതിയ സ്‌പോണ്‍സര്‍ക്കും ഉണ്ട് നാലു നിബന്ധനകള്‍ ഉണ്ട്.

1. നിലവിലെ നിയമങ്ങള്‍ പ്രകാരം തൊഴില്‍ വിസ നേടാനുള്ള യോഗ്യത സ്‌പോണ്‍സറുടെ കമ്പനിക്കുണ്ടായിരിക്കണം.

2. രാജ്യത്തെ വേതന സംരക്ഷണ നിയമത്തിലെ വ്യവസ്ഥകള്‍ പാലിക്കണം.

3. ജീവനക്കാരനുമായി വ്യക്തമായ തൊഴില്‍ കരാര്‍ ഉണ്ടായിരിക്കണം.

4. തൊഴില്‍ മന്ത്രാലയം മുന്നോട്ടുവയ്ക്കുന്ന സെല്‍ഫ് ഇവാല്വേഷന്‍ പദ്ധതി നടപ്പിലാക്കിയ സ്ഥാപനമാവണം.