കുവൈറ്റില്‍ പ്രവാസികളുടെ എണ്ണം ഗണ്യമായി കുറയുന്നതായി റിപ്പോർട്ട്. സാധുവായ റെസിഡന്‍സ് പെര്‍മിറ്റുള്ളതും നിലവില്‍ കുവൈറ്റിലേക്ക് തിരികെയെത്താനാകാത്തതുമായ പ്രവാസികളുടെ എണ്ണം ഏകദേശം 365,000 ഉം റെസിഡന്‍സിന്റെ കാലാവധി കഴിഞ്ഞ പ്രവാസികളുടെ എണ്ണം ഏകദേശം 147,000 എന്നാണ് കണക്കുകൾ വ്യക്തമാക്കുന്നത്. കൊറോണ വ്യാപനത്തിന്റെ പശ്ചാത്തലത്തില്‍ തൊഴില്‍ നഷ്ടപ്പെട്ടത് മൂലവും മറ്റു പല കാരണങ്ങളാലും നിരവധി പ്രവാസികളാണ് കുവൈറ്റിൽ നിന്നും മടങ്ങിയത്.

കൊവിഡ് വ്യാപനത്തിന് മുമ്പ് സാധുവായ റെസിഡന്‍സിയുള്ള പ്രവാസികളുടെ എണ്ണം 3.3 മില്യണ്‍ ആയിരുന്നെങ്കില്‍, ഇപ്പോഴത് 2.65 മില്യണ്‍ ആയി കുറയുകയുണ്ടായി. അനധികൃതമായി താമസിക്കുന്ന 132000 പേരുമുണ്ട് എന്നാണ് കണക്കുകൾ വ്യക്തമാക്കുന്നത്. ഡിസംബര്‍ ഒന്ന് മുതല്‍ 31 വരെയുള്ള കാലയളവില്‍ (ആഭ്യന്തര മന്ത്രാലയം അനുവദിച്ച സമയപരിധി) ഏകദേശം 40,000 പ്രവാസികള്‍ റെസിഡന്‍സ് നിയമവിധേയമാക്കുമെന്നാണ് പ്രതീക്ഷിക്കുന്നത് തന്നെ.