ഉയര്‍ന്ന ഫലപ്രാപ്തി മൂലം ലോകശ്രദ്ധയാകര്‍ഷിച്ച ഫൈസര്‍ കൊവിഡ് 19 വാക്സിൻ്റെ അന്തിമ ക്ലിനിക്കൽ പരീക്ഷണ ഫലം വരാൻ ഇനി ഒരാഴ്ച മാത്രമാണ് ബാക്കിയുള്ളത്. ഫൈസർ വാക്‌സിനായി ആദ്യ ഓർഡർ നൽകിയ ഖത്തറും കുവൈറ്റും സ്വദേശികൾക്കും പ്രവാസികൾക്കും സൗജന്യമായി തന്നെ വാക്‌സിൻ നല്കാൻ തീരുമാനിക്കുകയുണ്ടായി. ജര്‍മനിയിലെ ബയോൺടെകിൻ്റെ സഹകരണത്തടെയാണ് രാജ്യാന്തര മരുന്നുനിര്‍മാണ കമ്പനിയായ ഫൈസര്‍ വാക്സിൻ നിര്‍മിച്ചത്. 95 ശതമാന ഫലപ്രാപ്തി കൈവരിച്ചുവെന്ന റിപോർട്ടുകൾ പുറത്തുവന്നതിനുപിന്നാലെ ഏറെ പ്രതീക്ഷയിലാണ് ലോകം.

രാജ്യത്ത് അധിവസിക്കുന്ന സ്വദേശികള്‍ക്കും വിദേശികള്‍ക്കും കൊറോണ വാക്സിന്‍ നല്‍കുന്നതിന് ബഹ്റൈൻ രാജാവ് ഹമദ് ബിന്‍ ഈസ അല്‍ ഖലീഫയും നിര്‍ദേശം നല്‍കി. കഴിഞ്ഞ ദിവസം ബഹ്റൈനിൽ 124 പേർക്കാണ് രോഗം സ്ഥിരീകരിച്ചത്. കഴിഞ്ഞ ദിവസം സഖീര്‍ പാലസില്‍ കിരീടാവകാശിയും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ ഖലീഫയുമായി നടത്തിയ കൂടിക്കാഴ്ചയിലാണ് സ്വദേശികള്‍ക്കും വിദേശികള്‍ക്കും കൊറോണ വാക്സിന്‍ നല്‍കുന്നതിനുള്ള നിർദേശം രാജാവ് നൽകിയത് തന്നെ.

അതോടൊപ്പം തന്നെ കുവൈത്തിൽ കോവിഡ് വാക്സിൻ ആദ്യം സ്വീകരിക്കുക താനെന്ന് പ്രഖ്യാപിച്ച് ആരോഗ്യമന്ത്രി ഡോ. ബാസിൽ അസ്സബാഹ് രംഗത്ത് എത്തി. വാക്സിൻ സംബന്ധിച്ച ആശങ്കകളും സംശയങ്ങളും ദൂരീകരിക്കുന്നതാണ് ആരോഗ്യ മന്ത്രിയുടെ പ്രഖ്യാപനം എന്നത്. വാക്സിൻ എടുക്കാൻ ആരെയും നിർബന്ധിക്കില്ലെന്നും ആരോഗ്യ മന്ത്രാലയ വൃത്തങ്ങൾ വ്യക്തമാക്കി. കോവിഡ് പ്രതിരോധത്തിലെ ആഗോള തലത്തിലെ ചലനങ്ങൾ സൂക്ഷ്മമായി നിരീക്ഷിക്കുന്നുണ്ടെന്നും വാക്സിൻ ഏറ്റവുമാദ്യം രാജ്യത്ത് ലഭ്യമാക്കാനാണ് ശ്രമിക്കുന്നതെന്നും ആരോഗ്യ മന്ത്രാലയം അറിയിച്ചു.