പ്രവാസികൾക്ക് ആശ്വാസം നൽകി ആ വാർത്ത. കോടതികള്‍ ചാട്ടവാര്‍ അടിക്ക് ശിക്ഷ വിധിച്ച് അടിയും കാത്ത് കഴിയുന്നവര്‍ക്ക് ആശ്വാസമാകുന്ന വിധിയുമായി സൗദി ഭരണകൂടം രംഗത്ത്. ചാട്ടവാര്‍ അടിക്ക് നിരോധനം ഏര്‍പ്പെടുത്തിക്കൊണ്ടുള്ള തീരുമാനം വരുന്നതിന് മുമ്പ് ശിക്ഷിക്കപ്പെട്ട് വിധി കാത്തുകഴിയുന്നവര്‍ക്ക് പൊതുമാപ്പ് നല്‍കാനാണ് സൗദി അധികൃതരുടെ തീരുമാനമെന്ന് സൗദി ഗസറ്റ് റിപ്പോര്‍ട്ട് ചെയ്യുകയുണ്ടായി.

രാജ്യത്തെ എല്ലാ ജയിലുകളിലും ഈ ശിക്ഷ കാത്ത് കഴിയുന്നവര്‍ക്ക് ഇളവ് ബാധകമായിരിക്കുന്നതാണ്. ചാട്ടവാര്‍ നിരോധന നിയമത്തിനു മുമ്പ് ശിക്ഷ വിധിക്കപ്പെട്ടവരുടെ കാര്യത്തില്‍ എന്തു ചെയ്യണമെന്ന സൗദി കോടതികളുടെ ആശയക്കുഴപ്പത്തിന് ഇതോടെ വിരാമമായി.

അതേസമയം അന്താരാഷ്ട്ര മനുഷ്യാവകാശ ചട്ടങ്ങള്‍ക്കനുസരിച്ചുള്ള പരിഷ്‌കരണത്തിന്റെ ഭാഗമായി കഴിഞ്ഞ ഏപ്രില്‍ മാസത്തിലായിരുന്നു ചാട്ടവാറടി നിര്‍ത്തലാക്കിക്കൊണ്ട് സൗദി സുപ്രിം കോടതി ഉത്തരവ് പുറപ്പെടുവിച്ചത്. സൗദി രാജാവ് സല്‍മാന്റെയും കിരീടാവകാശി മുഹമ്മദ് ബിന്‍ സല്‍മാന്റെയും പരിഷ്‌കരണ നടപടികളുടെ ഭാഗമായാണ് ചാട്ടവാര്‍ അടി നിര്‍ത്തലാക്കിയതെന്ന് കോടതി ഉത്തരവ് വ്യക്തമാക്കിയിരുന്നു.