കൊറോണ വ്യാപനത്തെ തുടർന്ന് തികച്ചും നിശ്ചലമായ അവസ്ഥയിലാണ് പ്രവാസലോകം. കൊറോണ വ്യാപനം മൂലം ലോകം മുഴുവനും ലോക്ക് ഡൗൺ പ്രഖ്യാപിച്ചപ്പോൾ നാട്ടിലെത്താൻ കൊതിച്ച പ്രവാസികൾ അനവധിയാണ്. മാസങ്ങളായി പട്ടിണികിടന്നും വരുമാനമില്ലാതെയും നാടണഞ്ഞവർ പ്രവാസലോകത്തിന്റെ മറ്റൊരുമുഖമായി തീർന്നു. ഇപ്പോഴിതാ കൊവിഡ് വ്യാപനത്തിന്റെ പശ്ചാത്തലത്തില്‍ നാട്ടിലെത്തിയ ശേഷം സൗദിയില്‍ തിരികെയെത്താന്‍ കഴിയാത്ത പ്രവാസികള്‍ക്ക് സന്തോഷ വാര്‍ത്ത. ഇതിനിടയില്‍ വിസയുടെയും ഇഖാമയുടെയും കാലാവധി നാട്ടില്‍ വച്ച് അവസാനിക്കുന്നുവെങ്കില്‍ ഒരു ടെൻഷനും വേണ്ട. അവ നാട്ടില്‍ നിന്ന് തന്നെ പുതുക്കാനുള്ള സംവിധാനം സൗദി ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട്‌സ് അഥവാ ജവാസാത്ത് ഒരുക്കിയിരിക്കുകയാണ്.

ഇതുമായി ബന്ധപ്പെട്ട് പ്രവാസി ജവാസാത്തിന്റെ ഔദ്യോഗിക ട്വിറ്ററില്‍ കുറിച്ച ചോദ്യത്തിന് മറുപടിയായാണ് ഇക്കാര്യം വ്യക്തമാക്കിയിട്ടുള്ളത്. സ്വകാര്യ വ്യക്തിയുടെ ഡ്രൈവര്‍ക്ക് സൗദിക്കു പുറത്തുവച്ച് ഇഖാമയും വിസയും പുതുക്കിക്കിട്ടുമോ എന്നതായിരുന്നു പ്രവാസിയുടെ ചോദ്യം. ഓണ്‍ലൈനായിട്ടാണ് ഇഖാമയും എക്‌സിറ്റ് റീ എന്‍ട്രി വിസകളും പുതുക്കേണ്ടതെന്ന് മറുപടിയായി ജവാസാത്ത് ട്വിറ്ററില്‍ കുറിച്ചു.

ഇതിനാവശ്യമായ ഫീസ് സ്‌പോണ്‍സറുടെ മുഖീം, അബ്ശിര്‍ പ്ലാറ്റ്‌ഫോമുകള്‍ വഴി സദദ് പെയ്‌മെന്റ് സേവനം ഉപയോഗിച്ച് ഓണ്‍ലൈനായി അടയ്ക്കാവുന്നതാണെന്നും ജവാസാത്ത് വ്യക്തമാക്കി. കൊവിഡ് പശ്ചാത്തലത്തില്‍ നാട്ടില്‍ പോയി തിരികെ വരാന്‍ കഴിയാതെ കുടുങ്ങിപ്പോയ നിരവധി പേര്‍ക്ക് ഈ സൗകര്യം ആശ്വാസമാവുന്നതാണ്. ലോക്ക് ഡൗൺ കാലയളവിൽ ഒട്ടനവധി പ്രവാസികളാണ് സൗദിയിൽ നിന്നും നാട്ടിലേക്ക് എത്തിയത്. നിയന്ത്രണങ്ങളിൽ ഇളവുകൾ നൽകി ഗൾഫ് രാഷ്ട്രങ്ങൾ സജീവമാകുമ്പോൾ തിരികെ എത്താൻ കൊതിക്കുകയാണ് പ്രവാസികൾ. നേരിട്ട് യാത്രചെയ്യാൻ ഇനി എപ്പോൾ അറിയിപ്പ് ഉണ്ടാകും എന്ന് കാത്തിരിക്കുകയാണ്.