വനിതാ ദിനത്തിൽ സ്ത്രീകൾക്കായി ആരംഭിച്ച ഡ്രൈവിംഗ് പരിശീലനത്തിൽ അമ്പതിനായിരത്തിലുമധികം സൗദി വനിതൾ അപേക്ഷിച്ചതായി റിപ്പോർട്ടുകൾ. റിയാദിലെ പ്രിന്‍സസ് നൂറ സര്‍വ്വകലാശാലയിലാണ് ഇത്രയുമധികം അപേക്ഷകൾ ലഭിച്ചത്. എന്നാൽ ആദ്യ ഘട്ടത്തിൽ അറുപതു പേർക്ക് മാത്രമായിരിക്കും പരിശീലനം നൽകുക.

സൗദിയിലെ വിവിധ സര്‍വകലാശാലകള്‍ കേന്ദ്രീകരിച്ചാണ് ഡ്രൈവിംഗ് പരിശീലനം നടത്തുക. പ്രിൻസസ് നൂറ യൂണിവേഴ്‌സിറ്റിയുടെ കണക്കുകൾ പ്രകാരം 54,126 വനിതകൾ ഇതുവരെ അപേക്ഷ സമർപ്പിച്ചിട്ടുണ്ട്. ലോക വനിതാ ദിനത്തിലാണ് വനിതകൾക്ക് ഡ്രൈവിംഗ് പരിശീലനം നൽകുന്ന ഇത്തരത്തിലൊരു പദ്ധതിക്ക് യൂണിവേഴ്‌സിറ്റി തുടക്കമിട്ടത്. വനിതകൾക്ക് ഡ്രൈവിംഗ് പരിശീലനം നൽകുന്നതിന് ആദ്യ ബാച്ച് പരിശീലകര്‍ തയ്യാറാണ്.

എമിറേറ്റ്‌സ് ഡ്രൈവിംഗ് ഇൻസ്റ്റിട്യൂട്ടാണ് യൂണിവേഴ്‌സിറ്റിയുടെ സാങ്കേതിക പങ്കാളിയായി നിലനിൽക്കുന്നത്. വനിതകളെ ഡ്രൈവിംഗ് പഠിപ്പിക്കുന്നതിനായി 150 വനിതകൾക്ക് ഇതിനകം പരിശീലനം നൽകിക്കഴിഞ്ഞു. പ്രായ-ദേശ ഭേദമന്യേ എല്ലാ വനിതകള്‍ക്കും ഇവിടെ പരിശീലനം നല്‍കും.

റിയാദിലെ ആദ്യത്തെ ലേഡീസ് ഡ്രൈവിംഗ് സ്‌കൂളാണ് പ്രിൻസസ് നൂറ യൂനിവേഴ്‌സിറ്റിയിലേത്. ജൂൺ 24 മുതൽ വനിതകൾക്ക് സൗദിയില്‍ ഡ്രൈവിംഗ് ആരംഭിക്കാം.