കുവൈത്ത്: ഗാർഹിക ജോലികൾക്കായി കേരളത്തിൽ നിന്ന് വനിതകളെ റിക്രൂട്ട് ചെയ്യുന്നതിന് നോർക്ക റൂട്ട്സും കുവൈത്ത് സർക്കാർ അംഗീകരിച്ച അൽദുറ കമ്പനിയും കരാറിൽ ഒപ്പുവകച്ചതായി റിപ്പോർട്ടുകൾ. ഇതനുസരിച്ച് ആദ്യപടിയായി 500 വനിതകളെ ഉടൻ തെരഞ്ഞെടുത്ത് പരിശീലനം നൽകും.

പരിശീലനവും റിക്രൂട്ട്മെന്‍റും തികച്ചും സൗജന്യമാണെന്നാണ് അധികൃതർ അറിയിച്ചിരിക്കുന്നത്. നോർക്ക റൂട്ട്സിന്‍റെ വെബ്സൈറ്റ് ' www.norkaroots.net ' മുഖേന ബുധനാഴ്ച്ച മുതൽ ഓണ്‍ലൈനായി അപേക്ഷിക്കാമെന്ന് ചീഫ് എക്സിക്യുട്ടീവ് ഓഫീസർ അറിയിച്ചു.

ഉദ്യോഗാർത്ഥികളിൽ നിന്ന് യാതൊരുവിധത്തിലുള്ള ഫീസും ഈടാക്കുന്നതല്ല. രണ്ടുവർഷത്തേയ്ക്കാണ് നിയമനം. 30 നും 45 നുമിടയിൽ പ്രായമുള്ള സ്ത്രീകൾക്ക് അപേക്ഷിക്കാം. ആഹാരവും താമസവും യാത്രാസൗകര്യവും സൗജന്യമാണ്. കുവൈറ്റിലെ ഇന്ത്യൻ എംബസി മുഖേനയാണ് നിയമനം. കൂടുതൽ വിവരങ്ങൾക്ക് 1800 425 3939, 0471 2333339 എന്ന നമ്പറുകളിൽ ബന്ധപ്പെടാം.