ബ്യൂണസ് ഐറിസ് കുട്ടികളുടെ ആശുപത്രിയില്‍ ഡ്യൂട്ടിക്കിടെ കരഞ്ഞ ഉപേക്ഷിക്കപ്പെട്ട കുഞ്ഞിന് സ്വന്തം മുലപ്പാല്‍ നല്‍കിയ പോലീസുകാരി സോഷ്യല്‍ മീഡിയയില്‍ താരമായി. അര്‍ജന്റീനയില്‍നിന്നാണ് ഈ വാര്‍ത്ത. സെലസ്‌റ്റേ ജാക്വിലിന്‍ അയാലയാണ് വാര്‍ത്തകളില്‍ ഇടംനേടിയത്. ഇവിടെയുള്ള ആശുപത്രിയില്‍ പോഷകാഹാര കുറവുള്ളതിനെ തുടര്‍ന്ന് ചികിത്സ തേടിയ കുരുന്നിനാണ് യുവതി സ്വന്തം മുലപ്പാല്‍ നല്‍കിയത്. 

രാത്രി ഡ്യൂട്ടിക്കിടെ കുഞ്ഞ് നിര്‍ത്താതെ കരഞ്ഞപ്പോള്‍ മറ്റൊന്നും ആലോചിക്കാതെ അയാല കുഞ്ഞിനെ മാറോട് ചേര്‍ക്കുകയും മുല കൊടുക്കുകയുമായിരുന്നു. മുലപ്പാല്‍ ലഭിച്ചതോടെ കുഞ്ഞ് പെട്ടെന്ന് കരച്ചില്‍ നിര്‍ത്തുകയും ചെയ്തു. കഴിഞ്ഞ ബുധനാഴ്ച്ചയാണ് സംഭവം. ഇതിന്റെ ചിത്രം അവിടെയുണ്ടായിരുന്ന മാര്‍കോസ് ഹെരഡിയ എന്ന വ്യക്തി പകര്‍ത്തി ഫെയ്‌സ്ബുക്കിലിടുകയായിരുന്നു. ഇതോടെയാണ് സംഭവം വൈറലായത്. ഒരു ലക്ഷത്തിലേറെ ഷെയറും ആയിരകണക്കിന് കമന്റുകളുമാണ് വന്നുനിറയുന്നത്. 

ഇതിന് പുറമെ, അയാലയെ അര്‍ജന്റീനയുടെ വൈസ് പ്രസിഡന്റ് സന്ദര്‍ശിക്കുകയും ചെയ്തു. അയാലയെ പ്രശംസിച്ച് അദ്ദേഹം ട്വീറ്റും ചെയ്തു. കരയുന്ന കുഞ്ഞിന് മുല കൊടുക്കാന്‍ തനിക്ക് രണ്ടാമതൊന്ന് ആലോചിക്കേണ്ട കാര്യം പോലുമുണ്ടായില്ലെന്ന് അയാല പറഞ്ഞു. കുഞ്ഞിന്റെ കരച്ചില്‍ കേട്ടത് സങ്കടകരമായ മുഹൂര്‍ത്തമായിരുന്നു. ഇത് എന്റെ മനസിനെ പൊള്ളിച്ചുഅയാല പറഞ്ഞു.