കളമശേരിയില്‍ സ്പായില്‍ ജോലിക്കെത്തിയ യുവതിക്കു നേരെ ലൈംഗികാതിക്രമം
കളമശേരിയില്‍ സ്പായുടെ മറവില്‍ ജീവനക്കാരിയായ യുവതിയോട് ലൈംഗികാതിക്രമം നടത്തിയ കേസില്‍ കൂടുതല്‍ പ്രതികളുണ്ടെന്ന് ആരോപണം. കേസുമായി ബന്ധപ്പെട്ട് ആദ്യം പിടിയിലായ രണ്ടു പ്രതികളെ ലോഡ്ജിലും സ്പായിലും എത്തിച്ച് പൊലീസ് തെളിവെടുപ്പ് നടത്തി. 2 പേര്‍ കൂടി പിടിയിലാകാനുണ്ടെന്നു അതിജീവിതയുടെ പങ്കാളി വെളിപ്പെടുത്തി. ഇവരെക്കുറിച്ചുള്ള വിവരങ്ങള്‍ പൊലീസിനു കൈമാറിയിട്ടുണ്ട്. പൊലീസ് ബുധനാഴ്ച രാത്രി മൊഴിയെടുത്തു. രാസലഹരി മരുന്ന് ഉള്‍പ്പെടെ യുവതിക്കു നല്‍കിയിട്ടുണ്ട്. ആന്തരികാവയവങ്ങള്‍ പൊള്ളിയിട്ടുണ്ട്. ലഹരിവസ്തുക്കള്‍ വലിപ്പിക്കുകയും വെള്ളത്തില്‍ കലര്‍ത്തി കുടിപ്പിക്കുകയും ചെയ്തിട്ടുണ്ട്. പ്രതി ശ്രീരാജിന്റെ ഭാര്യയും സഹോദരിയും അതിജീവിതയെ കാണാന്‍ എത്തിയിരുന്നു. കേസില്‍ നിന്നു പിന്‍മാറാന്‍ അവര്‍ ആവശ്യപ്പെട്ടിട്ടില്ലെന്നും കേസുമായി മുന്നോട്ടുപോകുമെന്നും അതിജീവിതയുടെ പങ്കാളി വ്യക്തമാക്കി.
അതേസമയം, അനധികൃതമായി പ്രവര്‍ത്തിക്കുന്ന സ്പാകള്‍ക്കെതിരെ നടപടി സ്വീകരിക്കണമെന്നും സ്പാകള്‍ക്ക് ലൈസന്‍സ് നല്‍കുന്നത് ഉള്‍പ്പെടെയുള്ള കാര്യങ്ങളില്‍ നിയന്ത്രണം കൊണ്ടുവരണമെന്നും സ്പാ വെല്‍നെസ് ഡവലപ്‌മെന്റ് ആന്‍ഡ് വെല്‍ഫെയര്‍ അസോസിയേഷന്‍ ആവശ്യപ്പെട്ടു. കളമശേരിയില്‍ സ്പായില്‍ ജോലിക്കെത്തിയ യുവതിക്കു നേരെ ലൈംഗികാതിക്രമം നടത്തിയ കേസില്‍ അറസ്റ്റിലായ ശ്രീരാജിനെതിരെ മുന്‍പും പരാതികള്‍ ഉണ്ടായിട്ടുണ്ട്. ശ്രീരാജ് ബെനാമി പേരുകളില്‍ കൂടുതല്‍ സ്പാകള്‍ നടത്തുന്നതായി സംശയമുണ്ടെന്നും അസോസിയേഷന്‍ ഭാരവാഹികള്‍ പറഞ്ഞു. ഒറ്റപ്പെട്ട ക്രിമിനല്‍ സംഭവങ്ങളുടെ പേരില്‍ മുഴുവന്‍ മസാജ് സെന്ററുകളെയും സ്പാ, വെല്‍നെസ് സ്ഥാപനങ്ങളെയും സംശയനിഴലില്‍ നിര്‍ത്തുന്നതു ശരിയല്ലെന്നും പ്രസിഡന്റ് കെ. റിന്‍ഷാദ്, സെക്രട്ടറി എസ്. അനീഷ് എന്നിവര്‍ പറഞ്ഞു.
സ്പാകളുടെ മറവില്‍ സെക്‌സ് റാക്കറ്റ് പ്രവര്‍ത്തിക്കുന്നതായി പരാതികളുണ്ടെന്നും എറണാകുളം ജില്ലയിലാണ് ഏറ്റവും കൂടുതല്‍ കേസുകളെന്നും മന്ത്രി രമേശ് ചെന്നിത്തല പറഞ്ഞു. അതിജീവിതയെ വനിതാ കമ്മിഷന്‍ അംഗങ്ങള്‍ സന്ദര്‍ശിച്ചു. അധ്യക്ഷ പി.സതീദേവി, അംഗങ്ങളായ എലിസബത്ത് മാമ്മന്‍ മത്തായി, ഇന്ദിര രവീന്ദ്രന്‍ എന്നിവര്‍ എറണാകുളം ഗവ.മെഡിക്കല്‍ കോളജ് ആശുപത്രിയിലാണ് യുവതിയെ കണ്ടത്. സംഭവത്തില്‍ കേസെടുത്തതായും കമ്മിഷന്‍ അറിയിച്ചു. കളമശേരി പൊലീസില്‍ നിന്നു കേസിന്റെ അന്വേഷണ റിപ്പോര്‍ട്ട് ആവശ്യപ്പെട്ടിട്ടുണ്ട്. സ്പാകള്‍, മസാജ് സെന്ററുകള്‍ എന്നിവ അനധികൃതമായാണോ നടത്തുന്നതെന്ന കാര്യം പരിശോധിക്കണമെന്നും അതിനാവശ്യമായ മോണിറ്ററിങ് സംവിധാനം സംസ്ഥാനത്തു വേണമെന്നും കമ്മിഷന്‍ സര്‍ക്കാരിന് ശുപാര്‍ശ നല്‍കും.
അതിജീവിതയ്ക്ക് ആവശ്യമായ നിയമസഹായം, കേസ് നടത്തിപ്പിനുള്ള സഹായം, ആവശ്യമായ സാമ്പത്തിക സഹായം തുടങ്ങിയവ നല്‍കണമെന്നു ഹൈക്കോടതിയുടെ വിക്ടിം റൈറ്റ്‌സ് സെന്ററിനോട് ആവശ്യപ്പെടുമെന്നും കമ്മിഷന്‍ അധ്യക്ഷ പി.സതീദേവി അറിയിച്ചു. അതിജീവിതയുടെ ആരോഗ്യ നില മെച്ചപ്പെട്ടുവെന്നും ഇന്നോ നാളെയോ ഡിസ്ചാര്‍ജ് ചെയ്യുമെന്നും മെഡിക്കല്‍ കോളജ് ആശുപത്രി മെഡിക്കല്‍ സൂപ്രണ്ട് ഡോ.അനൂപ് ജോസഫ് അറിയിച്ചു.
https://www.facebook.com/Malayalivartha
