ലഹരി ഉപയോഗവുമായി ബന്ധപ്പെട്ട സാഹചര്യങ്ങൾ ഫലപ്രദമായി നേരിടുന്നതിനായി കേരള പൊലീസിന് പ്രത്യേക പരിശീലനം നൽകുന്ന ‘തൂഫാൻ മെന്റർ–അമൃത’ പരിശീലന പരിപാടി; ആഭ്യന്തരമന്ത്രി രമേശ്‌ ചെന്നിത്തല ഉദ്‌ഘാടനം ചെയ്തു
എല്ലാ പൊലീസ് സ്റ്റേഷനിലും ഇനി തൂഫാൻ മെൻ്ററുണ്ടെന്ന്‌ ആഭ്യന്തരമന്ത്രി രമേശ്‌ ചെന്നിത്തല പറഞ്ഞു. ലഹരി ഉപയോഗവുമായി ബന്ധപ്പെട്ട സാഹചര്യങ്ങൾ ഫലപ്രദമായി നേരിടുന്നതിനായി കേരള പൊലീസിന് പ്രത്യേക പരിശീലനം നൽകുന്ന ‘തൂഫാൻ മെന്റർ–അമൃത’ പരിശീലന പരിപാടി ഉദ്‌ഘാടനം ചെയ്‌ത്‌ സംസാരിക്കുകയായിരുന്നു അദ്ദേഹം. ഇവർക്കുള്ള ശാസ്ത്രീയ പരിശീലനം പൂർത്തിയായി.
വരുന്ന തലമുറയെ ലഹരിയിൽ നിന്ന് രക്ഷിക്കുകയെന്ന ധാർമികമായ ഉത്തരവാദിത്തമാണ്‌ 'തൂഫാൻ മെന്ററാ'യ പൊലീസിന്റെ ദൗത്യം. സാമൂഹിക ജീവിതത്തിലെ ഏറ്റവും വലിയ പ്രശ്‌നം ലഹരിയാണ്‌. അതിനെ തുരത്തുക തന്നെ വേണം. കൊടുങ്കാറ്റു പോലെ കേരളത്തിൽ അങ്ങോളമിങ്ങോളം ആഞ്ഞടിക്കുന്ന തൂഫാന്റെ വിജയത്തിൽ സന്തോഷിക്കുന്ന നിരവധി അമ്മമാരും സഹോദരിമാരുമുണ്ട്‌. പൊലീസ് എപ്പോഴും വിമർശനങ്ങൾക്ക്‌ വിധേയമാകുന്നവരാണ്‌.
എന്തെങ്കിലും ചെയ്‌താൽ അതിക്രമമെന്നും ചെയ്‌തില്ലെങ്കിൽ നിഷ്‌ക്രിയമെന്നും പറയും. എന്നാൽ ഇപ്പോൾ ഓപ്പറേഷൻ തൂഫാനിലൂടെ വിമർശനങ്ങൾക്ക്‌ അതീതമായി ജനങ്ങൾ കേരള പൊലീസിനെ മനസിലേറ്റെടുത്തു. പ്രതി ആരെന്ന്‌ നോക്കാതെ അവർ ചെയ്ത കുറ്റം നോക്കി കൃത്യമായി ഉത്തരവാദിത്തങ്ങൾ നിറവേറ്റുന്ന ഉദ്യോഗസ്ഥർക്ക്‌ ഒരു തരത്തിലുമുള്ള ബുദ്ധിമുട്ടുണ്ടാകില്ല. നിങ്ങൾ ഇടപെടുന്നത്‌ സമൂഹവുമായും മനുഷ്യരുമായുമാണെന്ന ചിന്തയുണ്ടാകണം. പ്രവർത്തന മേഖലയിൽ സത്യസന്ധത പാലിക്കണം. തൂഫാൻ മികച്ച രീതിയിൽ മുന്നോട്ടു പോകണമെന്ന്‌ സമൂഹം ആഗ്രഹിക്കുന്നുണ്ടെന്നും ആഭ്യന്തരമന്ത്രി പറഞ്ഞു .
https://www.facebook.com/Malayalivartha
