ഫിലിപ്പൈന്‍ പ്രസിഡന്റ് റൊഡ്രിഗോ ഡ്യൂട്ടേര്‍ട്ട് തന്റെ ജന്മ നഗരമായ ഡാവോയില്‍ ബലാത്സംഗങ്ങള്‍ വർധിക്കുന്നത് സംബന്ധിച്ചു നടത്തിയ പരാമർശം വിവാദമായിരിക്കുകയാണ്. ഡാവോയില്‍ ബലാത്സംഗങ്ങള്‍ വര്‍ധിക്കുന്ന കാര്യം ശ്രദ്ധയില്‍പ്പെടുത്തിയപ്പോഴുള്ള പ്രസിഡന്റിന്റെ മറുപടിയാണ് മറ്റുള്ളവരെ ചൊടിപ്പിച്ചത്.

സുന്ദരികള്‍ ഉള്ളിടത്തോളം കാലം ബലാത്സംഗവും ഉണ്ടാകുമെന്നും ആരെങ്കിലും തങ്ങളെ പീഡനത്തിന് ഇരയാക്കു എന്ന് അപേക്ഷിക്കുമോ? അതിന് സ്ത്രീകള്‍ സമ്മതിക്കുമോ? ആദ്യ ശ്രമത്തില്‍ തന്നെ ആരും വഴങ്ങി കൊടുക്കാത്തതിനാലാണ് ബലാത്സംഗങ്ങള്‍ സംഭവിക്കുന്നതെന്നായിരുന്നു പ്രസിഡന്റിന്റെ മറുപടി.

സംഭവം വിവാദമായതോടെ രാജ്യത്തെ വനിതാ പ്രസ്ഥാനങ്ങള്‍ ഉള്‍പ്പടെയുള്ളവര്‍ ശക്തമായ പ്രതിഷേധവുമായി രംഗത്ത് വന്നിട്ടുണ്ട്. എന്നാല്‍ താന്‍ പറഞ്ഞത് ഒരു തമാശയാണെന്നും അതിന് അമിത പ്രാധാന്യം നല്‍കരുതെന്നുമാണ് പ്രസിഡന്റ് ഇപ്പോള്‍ വ്യക്തമാക്കുന്നത്.

ജോലിയുടെ ഭാഗമായി ഒരു സൈനികന്‍ മൂന്ന് സ്ത്രീകളെ വരെ ബലാത്സംഗം ചെയ്യുന്നത് താന്‍ അംഗീകരിക്കും എന്നായിരുന്നു കഴിഞ്ഞ വര്‍ഷത്തെ പ്രസിഡന്റിന്റെ പ്രസ്താവന.