ദുബായിലെ മള്‍ട്ടിനാഷണല്‍ കമ്പനിയില്‍ ജോലി ചെയ്യുന്ന ഒരു യുവതി തന്റെ കാമുകനെതിരേ കേസുമായി ദുബായിലെ തര്‍ക്ക പരിഹാര കോടതിയെ സമീപിച്ചു.

വിവാഹം കഴിയ്ക്കാമെന്ന് വാഗ്ദാനം ചെയ്ത് യുവതിയുടെ കൈയില്‍ നിന്ന് വന്‍തുക കൈക്കലാക്കിയ ശേഷം കാമുകന്‍ മറ്റൊരു യുവതിയെ വിവാഹം കഴിച്ചുവെന്നാണ് പരാതി.

തന്നോടൊപ്പം കമ്പനിയില്‍ ജോലി ചെയ്യുന്ന യുവാവുമായി രണ്ടുവര്‍ഷമായി പ്രണയത്തിലായിരുന്നു യുവതി. അതിനിടെ പല ഘട്ടങ്ങളിലായി അഞ്ച് ദശലക്ഷം ദിര്‍ഹം കടമായി കാമുകന് നല്‍കിയിരുന്നു. തനിക്ക് കാമുകനോടുള്ള തീവ്ര പ്രണയം കാരണം പണം നല്‍കാന്‍ ഒരു വട്ടം പോലും ആലോചിക്കേണ്ടി വന്നിട്ടില്ലെന്ന് യുവതി കോടതിയെ അറിയിച്ചു.

താന്‍ ഹ്രസ്വ അവധിയിലായിരുന്നുവെന്നും അവധി കഴിഞ്ഞ് യുഎഇയില്‍ തിരികെയെത്തിയ തനിക്ക് ലഭിച്ചത് കാമുകന്റെ വിവാഹത്തിനുള്ള ക്ഷണക്കത്തായിരുന്നുവെന്നും യുവതി കോടതിയെ അറിയിച്ചു.

തങ്ങളുടെ അതേ കമ്പനിയില്‍ ജോലിക്കാരിയായ തന്റെ സുഹൃത്തിനെയാണ് അയാള്‍ വിവാഹം ചെയ്യുന്നതെന്ന് കൂടി അറിഞ്ഞതോടെ താന്‍ ഞെട്ടിപ്പോയെന്നും യുവതി പറഞ്ഞു.

അതോടെയാണ് കാമുകന്‍ തന്നെ വഞ്ചിക്കുകയായിരുന്നുവെന്ന് മനസ്സിലാക്കിയ യുവതി പണം തിരികെ ലഭിക്കുന്നതിനായി കോടതിയെ സമീപിച്ചത്.