ഇസ്രയേലിന്റെ പ്രഥമ ചാന്ദ്രദൗത്യം പരാജയപ്പെട്ടു. ബേറേഷീറ്റ് എന്ന് പേരിട്ടിരിക്കുന്ന പേടകം വെള്ളിയാഴ്ച പുലര്‍ച്ചെ ചന്ദ്രോപരിതലത്തില്‍ ഇറങ്ങാന്‍ ശ്രമിക്കവെ എന്‍ജിന്‍ തകരാറിനെ തുടര്‍ന്ന് തകര്‍ന്നു.ഫെബ്രുവരി 22ന് ഫ്‌ലോറിഡയിലെ കേപ് കാനവെറലില്‍നിന്നാണ് ബേറെഷീറ്റ് വിക്ഷേപിച്ചത്. 585 കിലോഗ്രാം ഭാരമാണ് ഇതിനുള്ളത്. ചന്ദ്രനില്‍ ഇറങ്ങാന്‍ കഴിയുന്ന ചിലവ് കുറഞ്ഞ ബഹിരാകാശ വാഹനമായാണ് ഇതിനെ ഇസ്രയേല്‍ വിശേഷിപ്പിച്ചിരുന്നത്.
ഇസ്രയേല്‍ എയറോസ്‌പേസും സ്വകാര്യ സ്ഥാപനമായ സ്‌പേസ് ഇലും ഒന്നിച്ചാണ് ദൗത്യത്തിനു പിന്നില്‍ പ്രവര്‍ത്തിച്ചത്. നിലവില്‍ റഷ്യ, യുഎസ്, ചൈന തുടങ്ങിയ രാജ്യങ്ങള്‍ മാത്രമാണ് ചന്ദ്രനില്‍ ഇറങ്ങിയിട്ടുള്ളത്. ഈ ലക്ഷ്യത്തിനായി ഇന്ത്യയും പ്രവര്‍ത്തിക്കുന്നുണ്ട്.