ജി-7 ഉച്ചകോടിക്കിടെ കശ്മീരും വ്യാപാരവും ഉൾപ്പെടെ സുപ്രധാന വിഷയങ്ങളിൽ പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയ്ക്കിടെ മോദിയെ ട്രോളി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഇംഗ്ലീഷ് സംസാരിക്കുന്നതുമായി ബന്ധപ്പെട്ടാണ് ട്രംപ് മോദിയെ ട്രോളിയത്. നരേന്ദ്ര മോദി നന്നായി ഇംഗ്ലീഷ് സംസാരിക്കുമെന്നും എന്നാല്‍, അദ്ദേഹത്തിന് സംസാരിക്കാന്‍ താല്‍പര്യമില്ലെന്നും ഡൊണാള്‍ഡ് ട്രംപ് പറഞ്ഞു. നരേന്ദ്ര മോദിക്കൊപ്പം ഇരിക്കുമ്പോഴാണ് ട്രംപിന്റെ പ്രസ്താവന. മാധ്യമപ്രവർത്തകരോടു പ്രധാനമന്ത്രി ഹിന്ദിയിൽ സംസാരിക്കുന്നതു കേട്ടപ്പോഴാണ് യുഎസ് പ്രസിഡന്റ് മോദിയുടെ ഇംഗ്ലിഷ് പ്രാവീണ്യത്തെക്കുറിച്ചു നല്ല വാക്കുകൾ പറഞ്ഞത്.

‘സത്യത്തിൽ ഇദ്ദേഹത്തിനു നന്നായി ഇംഗ്ലിഷ് സംസാരിക്കാനറിയാം, പക്ഷേ ഇപ്പോൾ താൽപര്യമില്ലെന്നു മാത്രം’ എന്ന് ട്രംപ് പറഞ്ഞു . ഇത് കേട്ടതു എല്ലാവരും പൊട്ടിച്ചിരിച്ചു. ഉറക്കെ ചിരിച്ച്, വലംകൈ കൊണ്ട് യുഎസ് പ്രസിഡന്റിന്റെ കൈ കവർന്ന മോദി ഇടതു കൈത്തലം കൊണ്ട് ചങ്ങാതിയോടെന്ന രീതിയിൽ ഉറക്കെയടിച്ചു.

നരേന്ദ്ര മോദിയുമായി വിവിധ വിഷയങ്ങളെ കുറിച്ച് ചര്‍ച്ച നടത്തി എന്ന് ട്രംപ് പറഞ്ഞു. കഴിഞ്ഞ ദിവസം അത്താഴത്തിന് തങ്ങള്‍ ഒന്നിച്ചായിരുന്നു എന്നും വാണിജ്യം അടക്കമുള്ള വിഷയങ്ങളെ പറ്റി ചര്‍ച്ച ചെയ്‌തെന്നും ഇന്ത്യയില്‍ നിന്ന് തനിക്ക് ഒരുപാട് കാര്യങ്ങള്‍ പഠിക്കാന്‍ സാധിച്ചെന്നും ട്രംപ് പറഞ്ഞു.

ജമ്മു കശ്മീര്‍ വിഷയത്തെ കുറിച്ച് ഇരു നേതാക്കളും ചര്‍ച്ച ചെയ്തു. കശ്മീര്‍ വിഷയം ഇന്ത്യയും പാക്കിസ്ഥാനും തമ്മില്‍ ചര്‍ച്ചയിലൂടെ പരിഹരിക്കുമെന്നാണ് പ്രതീക്ഷിക്കുന്നതെന്ന് ഡൊണാള്‍ഡ് ട്രംപ് പറഞ്ഞു. കശ്മീര്‍ വിഷയത്തെ സംബന്ധിച്ച് നരേന്ദ്ര മോദിയുമായി കഴിഞ്ഞ ദിവസം ചര്‍ച്ച നടത്തിയിരുന്നു. എല്ലാ വിഷയങ്ങളും നിയന്ത്രണ വിധേയമാണെന്നാണ് നരേന്ദ്ര മോദി പറയുന്നത്. അവര്‍ പാക്കിസ്ഥാനുമായി ചര്‍ച്ച നടത്തണമെന്നും ട്രംപ് പറഞ്ഞു.