ലോകത്ത് കൊവിഡ് -19 വ്യാപനം ഏറ്റവും രൂക്ഷമായ അമേരിക്കയിൽ രോഗബാധിതരുടെ എണ്ണവും മരണസംഖ്യയും മറ്റു രാജ്യങ്ങളേ അപേക്ഷിച്ച് വളരെ കൂടുതലായിരുന്നു .. എന്നാൽ ഏതാനും ദിവസങ്ങളായി മരണസംഖ്യയും പുതുതായി രോഗം സ്ഥിരീകരിക്കുന്നവരുടെ എണ്ണവും കുറഞ്ഞുവരികയാണ്.

അതിനിടയിലാണ് ജോര്‍ജ് ഫ്ലോയ്‍ഡ് എന്ന കറുത്ത വര്‍ഗക്കാരനെ പോലീസുകാരന്‍ കാല്‍മുട്ട് അമര്‍ത്തി കൊലപ്പെടുത്തിയ സംഭവത്തില്‍ പ്രതിഷേധം ആളിപ്പടര്‍ന്നത്

മിന്നെസോട്ടയിലെ മിനിയാപൊളിസില്‍ തുടങ്ങിയ പ്രതിഷേധം അമേരിക്കയിലെങ്ങും കത്തിപ്പടരാന്‍ തുടങ്ങിയിട്ട് എട്ട് ദിവസം പിന്നിട്ടിരിക്കുന്നു. കൊവിഡ് വ്യാപനം കുറഞ്ഞുതുടങ്ങുമ്പോള്‍ ജനങ്ങള്‍ കൂട്ടത്തോടെ തെരുവിലിറങ്ങുന്നത് വൈറസിന്‍റെ രണ്ടാം വരവിന് കാരണമാകുമോ എന്നാണ് ആരോഗ്യ വിദഗ്‍ധര്‍ ഭയക്കുന്നത്.

രാജ്യത്ത് നൂറ്റാണ്ടുകളായി തുടരുന്ന വര്‍ണവെറിക്കെതിരായ രോഷമാണ് അമേരിക്കന്‍ തെരുവുകളില്‍ അലയടിക്കുന്നത്. വര്‍ണ-വര്‍ഗ ഭേദമില്ലാതെയാണ് അമേരിക്കന്‍ ജനത പ്രക്ഷോഭത്തില്‍ പങ്കാളികളാകുന്നത്. മുഴുവന്‍ പോലീസുകാര്‍ക്കുമെതിരെ കേസെടുക്കണമെന്നും ജോര്‍ജ് ഫ്ലോയ്‍ഡിന് നീതി കിട്ടണമെന്നുമാണ് ജനങ്ങളുടെ ആവശ്യം.

ലോകത്താകെയുള്ള കൊവിഡ് ബാധിതരില്‍ നാലിലൊന്നും അമേരിക്കയിലാണ്. ആകെ മരിച്ചവരില്‍ മൂന്നിലൊന്നും അമേരിക്കക്കാരാണ്. ചൈനയിലാണ് വൈറസ് ബാധ ആദ്യമായി കണ്ടെത്തിയതെങ്കിലും യൂറോപ്പിലും അമേരിക്കയിലും ഇപ്പോള്‍ ലാറ്റിന്‍ അമേരിക്കയിലുമാണ് വൈറസ് കൂടുതല്‍ നാശം വിതച്ചത്.

യൂറോപ്പില്‍ രോഗബാധ രൂക്ഷമായതിന് ശേഷമാണ് അമേരിക്കയില്‍ കൂട്ടമരണം തുടങ്ങിയത്. രണ്ട് മാസത്തിലേറെ തുടര്‍ന്ന കൂട്ടമരണം അമേരിക്കയെ കണക്കുകളില്‍ മുന്നിലെത്തിച്ചു. ഇതുവരെ 1881205 പേര്‍ക്കാണ് അമേരിക്കയില്‍ കൊവിഡ് സ്ഥിരീകരിച്ചത്. 108059 മരണമാണ് റിപ്പോര്‍ട്ട് ചെയ്യപ്പെട്ടത്.

പ്രതിദിനം 4000 മരണം വരെ റിപ്പോര്‍ട്ട് ചെയ്‍‍ത സമയമുണ്ടായിരുന്നു അമേരിക്കയില്‍. പതിനായിരക്കണക്കിന് ആളുകള്‍ ഓരോ ദിവസവും രോഗബാധിതരായി. എന്നാല്‍ ദിവസങ്ങളായി അമേരിക്കയില്‍ പുതുതായി രോഗം സ്ഥിരീകരിക്കുന്നവരുടെ എണ്ണവും പ്രതിദിന മരണനിരക്കും കുറയുകയാണ്.

പുതുതായി രോഗം കണ്ടെത്തുന്നവരുടെ എണ്ണവും റെക്കോര്‍ഡ് കുറവാണ് രേഖപ്പെടുത്തിയത്. കഴിഞ്ഞ 24 മണിക്കൂറിനിടെ 941 പേരാണ് കൊവിഡ് പോസിറ്റീവായത്. 11 ആഴ്‍ചകള്‍ക്കിടെ ആദ്യമാണ് പുതിയ കേസുകള്‍ 1000-ല്‍ കുറവാകുന്നത്.

അതേസമയം കൊവിഡ് വ്യാപനം കുറഞ്ഞ് തുടങ്ങുമ്പോള്‍ ജനങ്ങള്‍ കൂട്ടം കൂടുന്നത് വൈറസിന്‍റെ രണ്ടാംഘട്ട വ്യാപനത്തിലേക്ക് നയിക്കുമെന്ന് മിന്നെസോട്ട യൂണിവേഴ്‍സിറ്റിയിലെ സെന്‍റര്‍ ഫോര്‍ ഇന്‍ഫെക്ടിയസ് ഡിസീസ് റിസര്‍ച്ച് ആന്‍ഡ് പോളിസി ഡയറക്ടര്‍ മൈക്കല്‍ ഒസ്റ്റെര്‍ഹോം പറയുന്നത് .

പോലീസ് കണ്ണീര്‍ വാതകവും കുരുമുളക് സ്‍പ്രേയും പ്രയോഗിക്കുന്നതിനാല്‍ ആളുകള്‍ക്ക് ചുമയും ശ്വാസ തടസ്സവുമുണ്ടാകാന്‍ കാരണമാകും. ജനക്കൂട്ടത്തില്‍ വൈറസ് ബാധയുള്ള ആളുകളുണ്ടെങ്കില്‍ ചുമ വൈറസ് പടരാനും ഇടയാക്കും.- ഒസ്റ്റെര്‍ഹോം പറയുന്നു.

1918-ല്‍ അമേരിക്കയില്‍ ഫ്ലൂ പടര്‍ന്നപ്പോഴും ആള്‍ക്കൂട്ടം രോഗത്തിന്‍റെ തിരിച്ചുവരവിന് കാരണമായിരുന്നതായി വാഷിങ്ടണ്‍ പോസ്റ്റ് റിപ്പോര്‍ട്ട് ചെയ്‍തു. 1918-ന്‍റെ തുടക്കത്തില്‍ പടര്‍ന്ന് തുടങ്ങിയ ഫ്ലൂ സെപ്റ്റംബര്‍ ആയപ്പോഴേക്കും അടങ്ങിയിരുന്നു.

തുടര്‍ന്ന് ഫിലാഡല്‍ഫിയയില്‍ സൈനിക പരേഡ് നടത്തിയപ്പോൾ രണ്ട് ലക്ഷത്തിലേറെ ആളുകളാണ് പരേഡ് കാണാന്‍ തടിച്ചുകൂടിയത്. അടുത്ത ദിവസം തന്നെ ഫ്ലൂ ബാധിതരുടെ എണ്ണം ഉയരാന്‍ തുടങ്ങി. ആറാഴ്‍ചകൊണ്ട് 12000-ലേറെ പേരാണ് ഫിലാഡല്‍ഫിയയില്‍ മരിച്ചത്.

അമേരിക്കയിൽ ഏറ്റവും കൂടുതല്‍ മരണവും രോഗബാധയും റിപ്പോര്‍ട്ട് ചെയ്‍ത ന്യൂയോര്‍ക്കിലും ആയിരക്കണക്കിനാളുകള്‍ ദിവസങ്ങളായി പ്രക്ഷോഭത്തിലാണ്. പ്രതിഷേധം ശക്തമായ കാലിഫോര്‍ണിയ, ന്യൂജഴ്‍സി, ഇല്ലിനോയിസ് തുടങ്ങിയ സംസ്ഥാനങ്ങളെല്ലാം കൊവിഡില്‍ നിന്ന് മുക്തമായി വരുന്നവയാണ്.

ആളുകള്‍ പുറത്തിറങ്ങരുതെന്നും വീണ്ടും രോഗം പടരാനുള്ള സാഹചര്യം ഉണ്ടാക്കരുതെന്നും ന്യൂയോര്‍ക്ക് മേയര്‍ ബില്‍ ഡി ബ്ലാസിയോ പറഞ്ഞു.

ഈ പ്രതിഷേധം രോഗവ്യാപനം കൂടാന്‍ ഇടയാക്കുമെന്നതില്‍ ഒരു സംശയവും വേണ്ടെന്നാണ് ബ്ലാസിയോ കഴിഞ്ഞ ദിവസം വാര്‍ത്താസമ്മേളനത്തില്‍ വ്യക്തമാക്കിയിരുന്നു