കൊറോണ വൈറസിന്റെ പുതിയ വകഭേദം കണ്ടെത്തിയതിനെ തുടർന്ന് ഡിസംബർ 22ന് നിർത്തലാക്കിയ ലണ്ടൻ കൊച്ചി ഡയറക്ട് വിമാന സർവീസ് ഫെബ്രുവരി 14 വരെ പുന:രാരംഭിക്കില്ല. ആരംഭിക്കുമെന്ന് പലതവണ പ്രഖ്യാപിക്കുകയും പിന്നീട് നീട്ടിവയ്ക്കുകയും ചെയ്ത സർവീസ്, ജനുവരി 31നു ശേഷം ആരംഭിച്ചേക്കുമെന്ന പ്രതീക്ഷയിൽ കാത്തിരുന്നവരും ടിക്കറ്റ് മാറ്റിയെടുത്തവരുമെല്ലാം ഇതോടെ നിരാശയിലായിരിക്കുകയാണ്. ഫെബ്രുവരി 14 വരെ കൊച്ചിയിൽ നിന്നും ലണ്ടനിലേക്കോ തിരിച്ചോ ഡയറക്ട് സർവീസ് ഉണ്ടാകില്ല എന്നാണ് എയർ ഇന്ത്യയുടെ പുതിയ സർക്കുലറിൽ വ്യക്തമാക്കുന്നത്. എന്നാൽ 14 ശേഷം ഈ സർവീസ് തുടങ്ങുമെന്ന ഉറപ്പ് ഉത്തരവിൽ നൽകുന്നുമില്ല.

അതേസമയം ഡൽഹി, മുംബൈ, ബാംഗ്ലൂർ എന്നിവിടങ്ങളിലേക്കു മാത്രമാകും വന്ദേഭാരത് മിഷന്റെ പത്താം ഫേസിൽ ബ്രിട്ടനിൽ നിന്നു സർവീസ് ഉണ്ടാകുന്നത്. കൊച്ചി സർവീസ് അനിശ്ചിതമായി നീളുന്നതും റെഡ് ലിസ്റ്റിൽ പെടുത്തി യുഎഇയിൽ നിന്നുള്ള ഡയറക്ട് വിമാനങ്ങൾ ബ്രിട്ടൻ നിർത്തലാക്കിയതും ബ്രിട്ടീഷ് മലയാളികളുടെ നാട്ടിലേക്കും തിരിച്ചുമുള്ള യാത്രാമോഹങ്ങളെ പാടേ തകർക്കുകയാണ് ചെയ്യുന്നത്.

കോവിഡ് വ്യാപനത്തിന്റെ പശ്ചാത്തലത്തിൽ മലയാളികൾക്ക് അടിയന്തര സാഹചര്യങ്ങളിൽ നാട്ടിലേക്കു എത്തിച്ചേരുവാനുള്ള ഏക ആശ്രയമായിരുന്നു വന്ദേ ഭാരത് മിഷന്റെ ഭാഗമായി ആരംഭിച്ച ലണ്ടൻ- കൊച്ചി ഡയറക്ട് വിമാന സർവീസ് എന്നത്. ഓഗസ്റ്റിൽ ആരംഭിച്ച ഈ സർവീസിൽ കൂടിയാണ് ബ്രിട്ടനിലേക്ക് പുതുതായി ജോലിക്ക് എത്തിയിരുന്നവരും ഇവിടെ നിന്നു നാട്ടിലേക്ക് അത്യാവശ്യ കാര്യങ്ങൾക്കായി പോയിരുന്നവരും യാത്ര ചെയ്തിരുന്നത്.