ലോകത്ത് മൊത്തം എത്ര പക്ഷികളുണ്ടെന്ന് അറിയാമോ?. ഏറ്റവും പുതിയ പഠനപ്രകാരം ലോകത്ത് 5000 കോടി പക്ഷികളുണ്ടെന്നാണ് കണ്ടെത്തല്‍. ഇതില്‍ 1.6 ശതകോടി കുരുവികള്‍ മാത്രമുണ്ടെന്നാണ് കണക്ക്. കാളിക്കിളി (European Starling), വയല്‍കോതി കത്രിക (barn swallow), കടല്‍ക്കാക്ക (ring-billed gulls) എന്നീ പക്ഷി വര്‍ഗങ്ങളുടെയും ജനസംഖ്യ ശതകോടിക്കും മേല്‍ വരുമെന്നാണ് കണ്ടെത്തൽ.

എന്നിരുന്നാലും, മിക്ക പക്ഷി വര്‍ഗങ്ങളും അപൂര്‍വമാണ്. പത്തില്‍ ഒന്ന് പക്ഷി വര്‍ഗങ്ങളുടെയും എണ്ണം 5,000ത്തില്‍ താഴെ മാത്രമാണുള്ളത്. ആഗോള പക്ഷി ജനസംഖ്യയുടെ ഈ കണക്കുകള്‍ പക്ഷികളെ വംശനാശത്തില്‍ നിന്ന് രക്ഷിക്കാനുള്ള സംരക്ഷണ ശ്രമങ്ങള്‍ക്ക് സഹായകമാകുമെന്ന് ആസ്‌ട്രേലിയയിലെ സിഡ്‌നിയിലുള്ള ന്യൂ സൗത്ത് വെയില്‍സ് സര്‍വകലാശാലയിലെ ഗവേഷക സംഘം പറയുന്നത്.

'നമ്മുടെ സ്വന്തം ജീവിവര്‍ഗങ്ങളെ കണക്കാക്കാന്‍ നാം ധാരാളം സമയവും പണവും ചെലവഴിക്കുന്നു, പക്ഷേ നമ്മുടെ ചുറ്റും ജീവിക്കുന്ന ഈ ജൈവ വൈവിധ്യത്തെ നാം എങ്ങനെ കണക്കാക്കുന്നു എന്നതിനെക്കുറിച്ച്‌ ചിന്തിക്കേണ്ടതുണ്ട്' -ഗവേഷകനായ ഡോ. കോറി കല്ലഗന്‍ ബി.ബി.സിയോട് പറഞ്ഞു.

ലോകത്തിലുള്ള പക്ഷികളുടെ എണ്ണം കണക്കാക്കല്‍ ശ്രമകരമായ ദൗത്യമായിരുന്നു. 10,000 മുതല്‍ 13,000 വരെ പക്ഷിവര്‍ഗങ്ങളില്‍ നിന്ന് 200 മുതല്‍ 400 ശതകോടി പക്ഷികള്‍ ഉള്ളതായായിരുന്നു മുന്‍‌കാല കണക്കുകള്‍. കഴിഞ്ഞ പതിറ്റാണ്ടിനിെട 9,700 ഇനം ജീവനുള്ള പക്ഷികളെ (നാട്ടുപക്ഷികളെ ഒഴിവാക്കി) ഓസ്ട്രേലിയന്‍ ഗവേഷകര്‍ വിശകലനം ചെയ്തു.

വിദഗ്ധരില്‍ നിന്നുള്ള അഭിപ്രായങ്ങള്‍ സ്വരൂപിച്ചതുള്‍പ്പെടെ വിവിധ ഘട്ടങ്ങളിലൂടെയാണ് ഗവേഷകര്‍ തങ്ങളുടെ കണ്ടെത്തലുകള്‍ പരിഷ്കരിച്ച്‌ കൂടുതല്‍ കുറ്റമറ്റതാക്കിയത്. മിക്ക പക്ഷികളും ഉത്തരാര്‍ധഗോളത്തിലാണ് കാണപ്പെടുന്നതാണ് നാഷനല്‍ അക്കാദമി ഓഫ് സയന്‍സസില്‍ പ്രസിദ്ധീകരിച്ച പഠനം സൂചിപ്പിക്കുന്നത്.

യൂറോപ്പ്, വടക്കന്‍ ഏഷ്യ, വടക്കേ ആഫ്രിക്ക, അറേബ്യന്‍ ഉപദ്വീപിന്‍റെ ചില ഭാഗങ്ങള്‍, വടക്കേ അമേരിക്ക എന്നിവിടങ്ങളിലായാണിത്. മഡഗാസ്കറിലും അന്‍റാര്‍ട്ടിക്കയിലുമാണ് കുറവ് പക്ഷികളെ കാണപ്പെടുന്നത്.