റെക്കോർഡുകൾ കയ്യടക്കി ആഗോളതരംഗമായി മാറിയിരിക്കുകയാണ് ദക്ഷിണ കൊറിയൻ സൂപ്പർ പോപ് ബാൻഡ് ബിടിഎസ്. ബിടിഎസിന്റെ പുതിയ ഇംഗ്ലിഷ് ഗാനം ‘ബട്ടർ’ യൂട്യൂബിൽ പുതിയ ചരിത്രം എഴുതിച്ചേർത്തു. പുതിയ മ്യൂസിക് വിഡിയോ യൂട്യൂബിൽ റിലീസ് ചെയ്ത് 10 മിനിറ്റിനകം തന്നെ ബട്ടർ ഒരു കോടി പേർ കണ്ടു ചരിത്രം കുറിച്ചു. എന്നാൽ കഴിഞ്ഞ വർഷം ബിടിഎസിന്റെ തന്നെ ‘ഡൈനമൈറ്റ്’ ഒരു കോടി റെക്കോർഡ് നേടിയത് 13 മിനിറ്റു കൊണ്ടായിരുന്നു. ഇതാണ് പുതിയ വീഡിയോ തിരുത്തിക്കുറിച്ചത്.

ഏഴംഗ ബാന്‍ഡായ ബിടിഎസിന്റെ ‘ഡൈനമൈറ്റ്’ 2020 സെപ്റ്റംബറിൽ ബിൽബോർഡ് ഹോട് പട്ടികയിൽ ഒന്നാമതെത്തുകയും ഗ്രാമി നിർദേശങ്ങൾ നേടുകയും ചെയ്തിരുന്നു. എന്നാൽ പുരസ്കാരം കിട്ടിയില്ല. ഇത്തവണ ‘ബട്ടർ’ ആണു ബിടിഎസിന്റെ ഗ്രാമി പ്രതീക്ഷ എന്നാണ് റിപ്പോർട്ട്. ബിടിഎസ് നായകൻ ആർഎമ്മിനു പുറമേ ജിൻ, സുഗ, ജെ-ഹോപ്പ്, ജിമിൻ, വി, ജംഗൂക്ക് എന്നിവരാണു ബിടിഎസ് ടീം. ഗാനമെഴുതിയതും ഇവരെല്ലാം ചേർന്ന് തന്നെയാണ്.

അതേസമയം ഡൈനാമൈറ്റിന് പുറമെ ഇവരുടെ രണ്ടാമത്തെ മുഴുനീള ഇംഗ്ലീഷ് ഗാനമാണ് ബട്ടർ. കോവിഡ് പ്രതിസന്ധിത്തിടെ എല്ലാവർക്കും ആഹ്‌ളാദം പകരുന്ന രസകരവും സുന്ദരവുമായ ഗാനം എന്നാണു ബിടിഎസ് ബട്ടറിനെ വിശേഷിപ്പിച്ചിരിക്കുന്നത്. ഇതുകൂടാതെ തിങ്കളാഴ്ച നടക്കുന്ന ബിൽബോര്‍ഡ് മ്യൂസിക് അവാർഡ്സിൽ ഡൈനമൈറ്റിനു 4 നാമനിർദേശങ്ങളുണ്ട്. ബിടിഎസ് തങ്ങളുടെ ആരാധകരെ ആർമി എന്നാണ് വിശേഷിപ്പിക്കാറുള്ളത്. ഇവർ ആർമിയോട് കാണിക്കുന്ന സ്നേഹം തന്നെയാണ് ഇവരുടെ വളർച്ചയ്ക്കും കാരണം.