കാത്തിരിപ്പിനൊടുവിൽ ആസ്വാദക ഹൃദയങ്ങളെ കീഴ്‌പ്പെടുത്തി ബിടിഎസിന്റെ പുതിയ സംഗീതം പുറത്തുവന്നു. എല്ലാ റെക്കോർഡുകളും തച്ചുടച്ചാണ് ഈ സംഗീതം പുറത്ത് വന്നത്. കഴിഞ്ഞ വര്‍ഷം ഏപ്രിലില്‍ പുറത്തിറങ്ങിയ 'ഡൈനമൈറ്റ്' എന്ന മ്യൂസിക് വീഡിയോയിലൂടെ ലോകമെമ്പാടുമുള്ള സംഗീതാസ്വാദകര്‍ക്കിടയില്‍ തരംഗം തീര്‍ത്ത ബാന്‍ഡ് ആണ് ബിടിഎസ്. ആദ്യ 24 മണിക്കൂറില്‍ യുട്യൂബില്‍ അന്ന് ഡൈനമൈറ്റ് നേടിയത് 10 കോടിയിലേറെ കാഴ്ചക്കാരെ ആയിരുന്നു. എന്നാൽ ഇപ്പോഴിതാ പുതിയ മ്യൂസിക് വീഡിയോയിലൂടെ തങ്ങളുടെതന്നെ മുന്‍പത്തെ റെക്കോര്‍ഡ് മറികടന്നിരിക്കുകയാണ് കൊറിയന്‍ പോപ്പ് (കെ പോപ്പ്) ബോയ് ബാന്‍ഡ് ആയ ബിടിഎസ്. കഴിഞ്ഞ 21ന് പുറത്തിറങ്ങിയ 'ബട്ടന്‍' എന്ന ഗാനമാണ് റെക്കോര്‍ഡ് കാണികളെ നേടിയിരിക്കുന്നത്.

യുട്യൂബ് പ്രീമിയറില്‍ ഒരേസമയം 39 ലക്ഷം പേര്‍ വരെ ഗാനം ആസ്വദിക്കുകയുണ്ടായി. ആ ട്രെന്‍ഡ് ഇപ്പോഴും തുടരുക തന്നെയാണ് ചെയ്യന്നത്. ആദ്യ 24 മണിക്കൂറില്‍ യുട്യൂബില്‍ നേടിയ കാഴ്ചകളുടെ എണ്ണം 11.2 കോടി ആയിരുന്നെങ്കില്‍ ഇതിനകം ആകെ നേടിയിരിക്കുന്നത് 15.1 കോടി കാഴ്ചകളാണ് എന്നതാണ്. യുട്യൂബ് പ്രീമിയറിലും ആദ്യ 24 മണിക്കൂറ്‍ കാഴ്ചകളിലും നിലവിലെ റെക്കോര്‍ഡ് ആണ് ഇത്. 1.3 മില്യണ്‍ ലൈക്കുകളും 58 ലക്ഷം കമന്‍റുകളും ബിടിഎസിന് വീഡിയോയ്ക്കു താഴെ ലഭിച്ചിട്ടുണ്ട്. 5.6 കോടി സബ്സ്ക്രൈബേഴ്സ് ആണ് ബിടിഎസിന് യുട്യൂബില്‍ ഉള്ളത്.

അതേസമയം റെക്കോർഡുകൾ ഉരുക്കി ബട്ടർ എത്തിയപ്പോൾ സന്തോഷിക്കാൻ ഏറെയുണ്ട് ‘ബിടിഎസ് ആർമി’ എന്ന ആരാധകർക്ക്. വിഡിയോയിൽ പലയിടത്തായി ആരാധകരോടുള്ള സ്നേഹപ്രകടനങ്ങളും കാത്തുവയ്ക്കുകയായിരുന്നു താരങ്ങൾ. തന്റെ ‘ആർമി’ ടാറ്റൂവിൽ ജം കുക്ക് ഉമ്മ വയ്ക്കുന്നതും ആർമിയെന്ന ഇംഗ്ലീഷ് അക്ഷരങ്ങൾ പോലെ ഏഴംഗ ബിടിഎസ് സംഘം നിൽക്കുന്നതും കണ്ടതോടെ ആഹ്ലാദത്തിമിർപ്പിലാണ് ഏവരും.

കൂടാതെ ‘ഡൈനമറ്റി’നു ശേഷം ബിടിഎസിന്റെ രണ്ടാമത്തെ ഇംഗ്ലീഷ് മ്യൂസിക് വിഡിയോ കൂടിയാണ് ബട്ടർ. സംഗീതത്തിൽ മാത്രമല്ല ഫാഷനിലും കൊറിയൻ തരംഗം സൃഷ്ടിക്കുകയാണ് ബിടിഎസ് സംഘം ഇപ്പോൾ. ‘ബട്ടർ’ എത്തിയപ്പോൾ പാട്ടിൽ മാത്രമല്ല താരങ്ങളുടെ ലുക്കിലും ആരാധകരുടെ മനസ്സുടക്കിയിട്ടുണ്ട്. ഹെയർ സ്റ്റൈലിനും ഹെയർ കളറിലും പലപ്പോഴായി ഫാഷൻഗോളുകൾ സമ്മാനിക്കുന്നവരാണ് ഈ ഏഴംഗ സംഘം. ഇക്കുറി നീളൻ മുടിയിൽ പർപ്പിൾ നിറവും പുരികത്തിൽ ക്രിസ്റ്റൽ പിയേഴ്സിങ്ങും ചെയ്താണ് ‘കുക്കി’ എത്തിയിരിക്കുനന്ത്. മുടിയിഴകളിൽ പിങ്ക് അണിഞ്ഞ് ആർഎം, യൂണികോൺ നിറങ്ങളിൽ മുടിയൊരുക്കി ജിമീൻ, പഴയ ബ്ലോണ്ട് ലുക്കിലേക്കു മടങ്ങി ജെയ്ഹോപ്, അണ്ടർ കട്ട് ഹെയറുമായി ‘വി’ എന്നിവരും ഹെയർ സ്റ്റൈലിങ് പരീക്ഷണങ്ങൾക്കു വഴിയൊരുക്കുകയാണ്.