ലോകത്ത് ഇതുവരെയും നടക്കാൻ ഇടയില്ലാത്ത രീതിയിൽ അരുംകൊല നടത്തി ഫ്ലോറിഡയിലെ പതിനാലുകാരൻ. 'ഒരാളെ കൊല്ലാന്‍ പോകുക'യാണെന്ന്​ സ്​കൂളിലെ കൂട്ടുകാരോട്​ എയ്​ഡന്‍ ഫുച്ചി പറഞ്ഞത്​ തമാ​ശയായേ അവരെടുത്തിരുന്നുള്ളൂ. എന്നാല്‍, സഹപാഠിയായ ട്രിസ്റ്റന്‍ ബെയ്​ലിയുടെ അരുംകൊലക്കുപിന്നില്‍ ഫുച്ചിയാണെന്നറിഞ്ഞതോടെ അവരെല്ലാം ഞെട്ടി.

ബെയ്​ലിയെ കൊലപ്പെടുത്തിയെന്നതു മാത്രമല്ല, 114 തവണ അവളെ കത്തികൊണ്ട്​ കുത്തിയാണ്​ ഫുച്ചി വധിച്ചതെന്നത്​ ആ 14കാരന്‍റെ ക്രൂരമായ മാനസികാവസ്​ഥയുടെ തെളിവായിരുന്നു.
13 വയസ്സു മാത്രമുള്ള ബെയ്​ലിയെ ആളൊഴിഞ്ഞ മരക്കൂട്ടങ്ങള്‍ക്കിടയിലേക്ക്​ വിളിച്ചുകൊണ്ടുപോയാണ്​ ഫുച്ചി 114 തവണ ദേഹത്ത്​ കത്തി കുത്തിയിറക്കിയത്​.ശരീരത്തിന്‍റെ മുഴുവന്‍ ഭാഗങ്ങളിലുമെന്നപോലെ കു​ത്തേറ്റ പാടുകള്‍ നിറഞ്ഞിരിക്കുകയും ചെയ്തു.

കത്തിത്തലപ്പ്​ പൊട്ടി ബാലികയുടെ തലയോട്ടിയില്‍ കുരുങ്ങിക്കിടക്കുകയായിരുന്നുവെന്ന്​ പോസ്റ്റ്​മോര്‍ട്ടത്തിനിടെ കണ്ടെത്തി. കത്തിയുടെ ബാക്കിഭാഗം മൃതദേഹം ഉപേക്ഷിച്ച സ്​ഥലത്തിനടുത്ത കുളത്തില്‍ നിന്നായിരുന്നു കിട്ടിയത്.

ഈ മാസാദ്യമാണ്​ ലോകത്തെ ഞെട്ടിച്ച അരുംകൊല നടന്നത്​. ഇതിനുശേഷം ഈ കുട്ടിക്കൊലയാളിയെ ഏതുവിധം പരിഗണിക്കണമെന്നതിനെ ചൊല്ലി നിയമജ്​ഞര്‍ക്കിടയില്‍ ചര്‍ച്ച നടക്കുകയായിരുന്നു. ഒടുവില്‍ കഴിഞ്ഞ ദിവസം അവര്‍ തീരുമാനത്തിലെത്തി -'കിരാതമായ ക്രൂരത കണക്കിലെടുത്ത്​ ഫുച്ചിയെ മുതിര്‍ന്നയാള്‍ക്കു സമാനമായ രീതിയില്‍ പരിഗണിക്കണം'.

പ്രായപൂര്‍ത്തിയായില്ലെന്നതു കണക്കിലെടുത്ത്​ നേരത്തേ, 'സെക്കന്‍ഡ്​ ഡിഗ്രി' കൊലപാതകമായി പരിഗണിച്ചത്​ മാറ്റി മുന്‍കൂട്ടി ആസൂത്രണം ചെയ്​ത്​ നടപ്പാക്കിയ ക്രൂരമായ കൊലപാതകമെന്ന നിലയില്‍ മുതിര്‍ന്നവരുടെ കുറ്റകൃത്യത്തിന്​ സമാനമായി 'ഫസ്റ്റ്​ ഡിഗ്രി' കൊലപാതകമായി പരിഗണിക്കാന്‍ തീരുമാനിക്കുകയായിരുന്നു.

കുട്ടിക്കൊലയാളിയെന്നതു മാറി മുതിര്‍ന്ന കൊലയാളിയെന്ന നിലയിലാണ്​ ഫുച്ചി വിചാരണ നേരിടേണ്ടിവരിക. ഇതോടെ ജീവപര്യന്തം തടവുശിക്ഷയാണ്​ ഈ എട്ടാം​ഗ്രേഡ്​ വിദ്യാര്‍ഥിയെ കാത്തിരിക്കുന്നത്​. ഫുച്ചിയെ മുതിര്‍ന്നവര്‍ക്കായുള്ള ജയിലിലേക്ക്​ മാറ്റും.

'ഒരു 14കാരനെതി​െര ഫസ്റ്റ്​ ഡിഗ്രി കൊലപാതകക്കേസ്​ ചാര്‍ജ്​ ചെയ്യുന്നതില്‍ എനിക്കൊട്ടും സന്തോഷമുണ്ടായിരുന്നില്ല. എന്നാല്‍, എല്ലാ വസ്​തുതകളും സാഹചര്യങ്ങളും നിയമവശവും പരിശോധിച്ചശേഷം ഈ കൊലപാതകം മുതിര്‍ന്നവരുടേതിന്​ സമാനമായി കൈകാര്യം ചെയ്യണമെന്ന തീരുമാനത്തിലെത്താന്‍ എനിക്കും എക്​സിക്യൂട്ടിവ്​ ടീമിനും പ്രയാസവുമുണ്ടായിരുന്നില്ല' -സ്​റ്റേറ്റ്​ അറ്റോര്‍ണി ആര്‍.ജെ. ലാരിസ മാധ്യമപ്രവര്‍ത്തകരോട്​ പറഞ്ഞു. 'ഒരാ​െ​ള കൊല്ലുമെന്ന്​ അവന്‍ കൂട്ടുകാരോട്​ പറഞ്ഞിരുന്നു. മരക്കൂട്ടങ്ങള്‍ക്കിടയിലേക്ക്​ കൂട്ടിക്കൊണ്ടുപോയി കുത്തിക്കൊല്ലുമെന്നാണ്​ പറഞ്ഞതും. എന്നാല്‍, ആരെയാണെന്ന്​ പറഞ്ഞിരുന്നില്ല' -അറ്റോര്‍ണി പറഞ്ഞു.

മാതൃദിനത്തിലാണ്​ ഡര്‍ബിന്‍ ക്രോസിങ്ങിനടുത്തുള്ള കുളത്തിനരികില്‍​ ബെയിലിയുടെ മൃതദേഹം കാണപ്പെട്ടത്​. ഫുച്ചിയുടെ വീട്ടില്‍നിന്ന്​ ഒരു കിലോമീറ്റര്‍ പോലുമില്ല ഇവിടേക്ക്​. ബെയിലിയുടെ കുടുംബം അവളെ കാണാനില്ലെന്ന്​ പരാതിപ്പെട്ട്​ എട്ടുമണിക്കൂറിന്​ ശേഷമാണ്​ അയല്‍ക്കാരിലൊരാള്‍ മൃത​ദേഹം കണ്ടത്​. ഇതിനടുത്ത കുളത്തില്‍നിന്നാണ്​ കത്തി കണ്ടെടുത്തത്​. മെയ്​ പത്തിനാണ്​ ഫുച്ചി പിടിയിലായത്.