സംസ്ഥാന സര്‍ക്കാര്‍ നടപ്പാക്കാനാവുന്ന കാര്യങ്ങള്‍ മാത്രമേ പറയൂവെന്ന് മുഖ്യമന്ത്രി പിണറായി വിജയന്‍. പറയുന്ന കാര്യങ്ങള്‍ നടപ്പിലാക്കുകയും ചെയ്യും. ജനത്തോട് കള്ളം പറയുന്ന സര്‍ക്കാരല്ല ഇടതുപക്ഷ സര്‍ക്കാരെന്നത് പിണറായിയുടെ വമ്പു പറച്ചില്‍ മാത്രമാകുമ്പോള്‍. അങ്ങ് പഞ്ചാഹില്‍ ചരിത്രം തിരുത്തിക്കുറിക്കുകയാണ് ആം ആത്മി സര്‍ക്കാര്‍.

കോണ്‍ഗ്രസ് സര്‍ക്കാരിന്റെ ജനവിരുദ്ധ നയമങ്ങള്‍ ഓരോന്നായി പൊളിച്ചെഴുതിയ ഭഗവന്ത് മന്‍ സര്‍ക്കാര്‍. സര്‍ക്കാര്‍ മേഖലയില്‍ കൂടുതല്‍ തൊഴിലവസരങ്ങള്‍ സൃഷ്ടിച്ചുകൊണ്ടാണാണ് അടുത്ത അഞ്ച് വര്‍ഷത്തെ ഭരണത്തിന് തുടക്കം കുറിച്ചിരിക്കുന്നത്. ഇതിന്റെ ഭാഗമായി സര്‍ക്കാര്‍ ജോലികളില്‍ 25,000 ഒഴിവുകള്‍ നികത്താനുള്ള തീരുമാനമാണ് ആദ്യമന്ത്രിസഭായോഗം കൈക്കൊണ്ടത്. ഇത് ജനങ്ങള്‍ക്കുള്ളൊരു നന്ദി പ്രകടനം കൂടിയായി മാറുകയാണ്.

കഴിഞ്ഞ ബുധനാഴ്ചയാണ് പഞ്ചാബ് മുഖ്യമന്ത്രിയായി ഭഗവന്ത് മന്‍ സത്യപ്രതിജ്ഞ ചെയ്തത്. ഇതിന് പിന്നാലെ ചേര്‍ന്ന ആദ്യ മന്ത്രിസഭാ യോഗമായിരുന്നു ശനിയാഴ്ചത്തേത്. സര്‍ക്കാര്‍ മേഖലയില്‍ നികത്തുന്ന ഒഴിവുകളില്‍ 10,000 എണ്ണം പോലീസ് സേനയില്‍ ആയിരിക്കും. ബാക്കിയുള്ളവ വിവിധ സര്‍ക്കാര്‍ വകുപ്പുകളിലായി വിഭജിച്ചിട്ടുണ്ട്.

മന്ത്രിസഭാ യോഗത്തിന് ശേഷം മുഖ്യമന്ത്രിയുടെ ഓഫീസ് ആണ് നിര്‍ണായക തീരുമാനം മാദ്ധ്യമങ്ങളെ അറിയിച്ചത്. സുതാര്യമായും, മെരിറ്റ് സംവിധാനത്തെ അടിസ്ഥാനമാക്കിയും, യുവാക്കള്‍ക്ക് സര്‍ക്കാര്‍ മേഖലയില്‍ കൂടുതല്‍ ജോലിസാദ്ധ്യതകള്‍ നല്‍കുന്നതിനുള്ള ചരിത്രപരമായ തീരുമാനം സര്‍ക്കാര്‍ കൈക്കൊണ്ടു എന്നായിരുന്നു ഭഗവന്ത് മന്നിന്റെ ഓഫീസ് അറിയിച്ചത്. ഇതുമായി ബന്ധപ്പെട്ടുള്ള വിജ്ഞാപനം ഉടന്‍ പുറപ്പെടുവിക്കും. ഇതിനായുള്ള നടപടികള്‍ പുരോഗമിക്കുകയാണെന്നും ഓഫീസ് വ്യക്തമാക്കി. ഇതിന് പുറമേ 2022 23 സാമ്പത്തിക വര്‍ഷത്തിലേക്കുള്ള വോട്ട് ഓണ്‍ അക്കൗണ്ട് അവതരിപ്പിക്കാനും മന്ത്രി സഭ അനുമതി നല്‍കി.

ഇന്നാണ് ഭഗവന്ത് മന്‍ മന്ത്രിസഭയിലെ പത്ത് ക്യാബിനറ്റ് മന്ത്രിമാര്‍ സത്യപ്രതിജ്ഞ ചെയ്ത് അധികാരമേറ്റത്. ഇതിന് ശേഷമായിരുന്നു ആദ്യ മന്ത്രിസഭായോഗം. പഞ്ചാബ് പോലീസില്‍ ഉള്‍പ്പെടെ നിരവധി ഒഴിവുകളാണ് ഉളളതെന്നും രാഷ്ട്രീയക്കാരുടെ വീടിന് കാവല്‍ നില്‍ക്കാന്‍ പോലീസ് പോയാല്‍ പിന്നെ സ്‌റ്റേഷനില്‍ ആരും ഇല്ലാത്ത അവസ്ഥയാണെന്നും ഭഗവന്ത് മന്‍ നേരത്തെ ചൂണ്ടിക്കാട്ടിയിരുന്നു.