സോവിയറ്റ് യൂണിയൻ തകർന്നടിഞ്ഞില്ലായിരുന്നെങ്കിൽ ഇന്ന് അമേരിക്കയ്ക്കും മുകളിൽ റഷ്യയെന്ന വൻശക്തി ഉണ്ടാകുമായിരുന്നു. അവിടെ ഏകാധിപതിയായ ഒരു പുതിയ ഹിറ്റ്‌ലർ വ്ലാദിമിർ പുടിൻ എന്ന പേരിൽ ജനിക്കുകയും ചെയ്യുമായിരുന്നു. 2000 മുതൽ ഈ ഒറ്റയാൻ റഷ്യയുടെ ഭരണ സംവിധാനത്തുണ്ട്. 2000 മുതൽ 2008 വരെ റഷ്യയുടെ പ്രസിഡണ്ടായും 2008 മുതൽ 2012 വരെ റഷ്യയുടെ പ്രധാനമന്ത്രിയായും പുടിൻ പ്രവർത്തിച്ചു. നീണ്ട വർഷക്കാലം ഇയാൾ റഷ്യൻ തെരുവുകളിൽ തന്റെ ഏകാധിപത്യത്തിന്റെ കഥകളെഴുതി.

പുടിനും പുടിന്റെ ഭരണവും കാമുകിയും ഒക്കെ വർത്തയാകുമ്പോൾ ഒപ്പം അദ്ദേഹത്തിന്റെ ചില അറിയാ കഥകളും പുറത്തുവരികയാണ്.പുട്ടിന് കായൽ തീരത്തുള്ള കാടിനു നടുവിലൊരു കൊട്ടാരമുണ്ടത്രെ..ആ കൊട്ടാരത്തിനു ചുറ്റും 7 കോടീശ്വര കൂട്ടുകാരും അവരുടെ കൊട്ടാരങ്ങളുമുണ്ട്. അവർ തമ്മിലെല്ലാം സാമ്പത്തിക ഇടപാടുകളുണ്ട്.റഷ്യ ഭരിക്കുന്നത് പുട്ടിൻ ഉൾപ്പെടെ ഈ 8 ദുഷ്പ്രഭുക്കൻമാർ ചേർന്നാണെന്നത് ഇപ്പോൾ പരസ്യമായ രഹസ്യമാണ്.

ആ കൂട്ടത്തിലൊരാളുണ്ട്– യൂറി കൊവാൽചുക്. പുട്ടിന്റെ ബാങ്കർ എന്ന് അറിയപ്പെടുന്നു. ഇണപിരിയാത്ത കൂട്ടുകാരാണത്രെ ഇരുവരും. യുദ്ധവും കൊല്ലും കൊലയുമൊക്കെ ഇരുവരുമാണ് ആലോചിച്ചു തീരുമാനിക്കുന്നത്.മോസ്കോയിൽനിന്ന് 2 മണിക്കൂർ അകലെ കോംസൊമോൽസ്കോയ തടാകത്തിന്റെ കിഴക്കൻ തീരത്ത് പുട്ടിൻ കൊട്ടാരം പോലൊരു രമ്യഹർമ്യം പണിതു. തടാകത്തിനു നടുവിൽ പെനിൻസുല പോലെ തള്ളി നിൽക്കുന്ന 250 ഏക്കർ പ്രദേശമാണിത്. കൂട്ടിന് 7 കൂട്ടുകാരും വീടുകൾ പണിതതോടെ അവരൊരു ഗ്രൂപ്പായി. ഒസിറൊ ഗ്രൂപ്പ്. ഒസിറൊ എന്നാൽ റഷ്യനിൽ തടാകം. വീടുകൾക്കരികെ മനോഹരമായ തടാകമുണ്ട്.

മറ്റു കൂട്ടുകാരിൽ ഒന്നാമനായിരുന്നു യൂറി കൊവാൽചുക്. വമ്പൻ ബിസിനസുകാർക്ക് പണം പലിശയ്ക്കു കൊടുക്കുന്ന ബിസിനസുണ്ട്. മറ്റുള്ളവർ ഇവരാണ്– വ്ളാഡിമിർ യാകുനിൻ, ആൻഡ്രേയ് ഫുർസെങ്കോ, സെർജി ഫുർസെങ്കോ. വിക്ടർ മ്യാചിൻ, വ്ളാഡിമിർ സ്മിർനോവ്, നിക്കളോയ് ഷമലോവ്. ഇവരാണ് റഷ്യൻ ഒളിഗാർക്കിയുടെ അടിസ്ഥാനം. അതിധനികരായ ഒരു ചെറിയ ഗ്രൂപ്പ് ഭരണം നിയന്ത്രിക്കുന്ന സമ്പ്രദായത്തെയാണ് ഒളിഗാർക്കി എന്നറിയപ്പെടുന്നത്. നൂറു കണക്കിനു കോടി ഡോളർ സമ്പാദ്യക്കാരായ ഇവരെല്ലാം തന്നെ ഒളിഗാർക്കുകളാണെന്നതിൽ സംശയമില്ല. പുട്ടിനും ഒളിഗാർക്കാണ്. ശതകോടീശ്വര ഭരണാധിപൻ!യൂറി കൊവാൽചുക്കിന് 150 കോടി ഡോളർ ആസ്തിയുണ്ടെന്നായിരുന്നു നേരത്തേ ഫോബ്സ് വിലയിരുത്തിയത്. അതായത്, 10,000 കോടി രൂപയിലേറെ!

കൂട്ടുകാർക്കെല്ലാം പണം കുന്നുകൂട്ടാൻ പുട്ടിൻ പലതരം സഹായങ്ങൾ ചെയ്തിട്ടുണ്ട്. കൊവാൽചുകിനെ 2002ൽ റഷ്യയിലെ ഏറ്റവും വലിയ ബാങ്കായ റോസിയ ബാങ്കിന്റെ ചെയർമാനാക്കി. ക്രൈമിയ ആക്രമിച്ച് കീഴടക്കിയപ്പോൾ അയാൾ അവിടെ വൈനറി വാങ്ങി. ബാൾട്ടിക ബ്രൂവറിയുടെ ഉടമയാണിന്ന്.

റഷ്യൻ മാധ്യമങ്ങളുടെ തലപ്പത്തും കൊവാൽചുക് തന്നെ. നാഷനൽ മീഡിയ ഗ്രൂപ്പ് എന്നൊരു കമ്പനിയുണ്ടാക്കി റഷ്യയിലെ മിക്ക മാധ്യമങ്ങളുടേയും ഉടമയായി. ഡിസ്ക്കവറി ചാനലുമായി റഷ്യയിൽ സംയുക്ത സംരംഭമുണ്ടാക്കി. സിഎൻഎന്നിന്റെ റഷ്യൻ വിഭാഗവും എൻഎംജിയുമായുള്ള സംയുക്ത സംരംഭമായി.

റഷ്യയിൽ സീരിയലുകളുടേയും സിനിമകളുടേയും സ്ട്രീമിങ് നെറ്റ്ഫ്ളിക്സുമായി ചേർന്നു നടത്തുന്നു. കാർട്ടൂൺ ചാനലും സ്വന്തമായുണ്ട്.പുട്ടിന് വിശ്വാസം കൊവാൽചുകിൽ മാത്രം. സ്വകാര്യ ഉപദേശകനുമാണ്. 2 വർഷം കോവിഡ് മൂലം സമൂഹത്തിൽ നിന്ന് അകന്നു നിന്ന പുട്ടിൻ ഒസിറൊയിലെ രഹസ്യ കൊട്ടാരത്തിലായിരുന്നു താമസം. ആകെ പരസ്പരം കാണുന്നത് ഇവർ രണ്ടു പേർ മാത്രം. പുട്ടിന്റെ കാമുകി അലീന കബിയേവയാണു മറ്റൊരാൾ.