ഉക്രൈനില്‍ വീണ്ടും ആക്രമണം ശക്തമാക്കിയിരിക്കുകയാണ് റഷ്യ. ഫിന്‍ലാന്‍ഡും സ്വീഡനും നാറ്റോയില്‍ ചേരാന്‍ പ്രഖ്യാപിച്ചതിന് പിന്നാലെയാണ് റഷ്യയുടെ ഈ നീക്കം. നിലവില്‍ ഡോണ്‍ബാസില്‍ കനത്ത നാശനഷ്ടങ്ങള്‍ റഷ്യ ഉണ്ടാക്കിയെന്നുള്ള റിപ്പോര്‍ട്ടുകളാണ് പുറത്ത് വരുന്നത്. ഈ മേഖലയില്‍ അതിശക്തമായ വ്യോമാക്രമണവും കരാതിര്‍ത്തിയില്‍ നിന്നുള്ള ആക്രമണവും നടത്തിയെന്ന റിപ്പോര്‍ട്ടുകളാണ് പുറത്തു വരുന്നത്

ആക്രമണത്തില്‍ നിരവധി പൗരന്മാര്‍ കൊല്ലപ്പെട്ടുവെന്നും ഉക്രൈന്‍ പ്രസിഡന്റ് വൊളോഡിമിര്‍ സെലെന്‍സ്‌കി വ്യക്തമാക്കി. ഡോണ്‍ബാസിനെ ഒരു പ്രേത നഗരമാക്കി മാറ്റിയിരിക്കുകയാണ് റഷ്യ.. മാത്രമല്ല ലുഹാന്‍സ്‌ക് ഉടന്‍തന്നെ പിടിച്ചടക്കുമെന്ന് റഷ്യ പ്രഖ്യാപിച്ചു കഴിഞ്ഞു.

ഉക്രൈനിന്റെ ഉരുക്കുകോട്ടയായ മരിയുപോള്‍ തകര്‍ത്തതിന് പിന്നലെയാണ് ഇപ്പോള്‍ ഡോണ്‍ബാസിനേയും റഷ്യ ആക്രമിച്ച് കീഴ്‌പ്പെടുത്തിയിരിക്കുന്നത്. തുറമുഖ നഗരത്തില്‍ റഷ്യയ്ക്കു കീഴടങ്ങാതെ ചെറുത്തുനില്‍പിന്റെ തുരുത്തായിരുന്ന അസോവ്സ്റ്റാള്‍ ഉരുക്കുഫാക്ടറിയും റഷ്യ പിടിച്ചെടുത്തിരുന്നു.

വലിയ ആള്‍ നാശമാണ് ഇവിടേയും റഷ്യ ഉണ്ടായത്. ഈ പോരാട്ടത്തില്‍ ഗുരുതരമായി പരുക്കേറ്റ 53 സൈനികരെ റഷ്യന്‍ നിയന്ത്രണത്തിലുള്ള നൊവോയസോവ്‌സ്‌ക്  പട്ടണത്തിലെ ആശുപത്രിയിലേക്കാണു കൊണ്ടുപോയത്. റഷ്യയോടു കൂറുള്ള വിമതരുടെ നിയന്ത്രണത്തിലുള്ള ഒലെനിവ്ക  പട്ടണത്തിലേക്കാണ് ബാക്കി 211 പേരെ മാറ്റിയത്.

നിലവില്‍ 1,700 യുക്രൈന്‍ സൈനികര്‍ കീഴടങ്ങിയെന്ന റിപ്പോര്‍ട്ടുകളും പുറത്തു വരുന്നുണ്ട്. എന്നാല്‍, 2,000 പേരാണ് കീഴടങ്ങിയതെന്ന് റഷ്യ വ്യക്തമാക്കുന്നു. ഇനിയും ചോരപ്പുഴയൊഴുകാതെ പോരാട്ടം മതിയാക്കാന്‍ യുക്രെയ്ന്‍ സര്‍ക്കാര്‍ നിര്‍ദേശിച്ചതിനെ തുടര്‍ന്നാണു സേന പിന്‍മാറുന്നത്. 82 ദിവസം പൊരുതിത്തളര്‍ന്ന 264 യുക്രെയ്ന്‍ സൈനികരെ റഷ്യയുടെ സഹായത്തോടെ ഒഴിപ്പിച്ചു.

ഉക്രെയിന് കൂടുതല്‍ സഹായം എത്തിക്കാന്‍ പാശ്ചാത്യ രാജ്യങ്ങള്‍ ശ്രമിക്കുന്നുണ്ട്. 950 കോടി ഡോളര്‍ സഹായമായി നല്‍കുമെന്ന് ജി7 രാജ്യങ്ങള്‍ അറിയിച്ചു. ഉക്രൈയിനിലേക്കുള്ള ഭക്ഷ്യസഹായം തടയുന്ന റഷ്യയുടെ യുദ്ധക്കപ്പലുകളെ തകര്‍ക്കാന്‍ വേണ്ടി മിസൈലുകളും യു.എസ് നല്‍കിത്തുടങ്ങിയിട്ടുണ്ട്. ടാങ്കുകളും ഹോവിറ്റ്‌സറുകളും നല്‍കുമെന്നു ജര്‍മ്മനിയും പ്രഖ്യാപിച്ചിട്ടുണ്ട്.

അതേസമയം യുക്രെയ്‌നില്‍ വന്‍ തിരിച്ചടി നേരിടുന്ന റഷ്യന്‍ സൈന്യത്തിന്റെ പൂര്‍ണ നിയന്ത്രണം റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍ ഏറ്റെടുത്തതായി പാശ്ചാത്യ സൈനിക വൃത്തങ്ങളെ ഉദ്ധരിച്ച് രാജ്യാന്തര മാധ്യമങ്ങള്‍.

യുക്രെയ്ന്‍ അധിനിവേശം തുടങ്ങിയശേഷം ഏറെ നാളായി കൈവശം വച്ച ഹര്‍കീവ് അടക്കമുള്ള പ്രധാന നഗരങ്ങള്‍ കൈവിടുന്ന സാഹചര്യം ഉടലെടുക്കുകയും റഷ്യന്‍ അനുകൂല വിമതര്‍ക്കു സ്വാധീനമുള്ള യുക്രെയ്‌ന്റെ കിഴക്കന്‍ മേഖലയായ ഡോണ്‍ബാസില്‍ കനത്ത പ്രതിരോധം നേരിടേണ്ടി വരുകയും ചെയ്തതോടെ സൈന്യത്തിന്റെ ദൈംദിന കാര്യങ്ങളില്‍ വരെ പുട്ടിന്‍ ഇടപെടുന്നു.