ഭർത്താവിനെ വെടിവെച്ചുകൊന്ന കേസിൽ അമേരിക്കൻ നോവലിസ്റ്റ് നാൻസി ക്രാംപ്റ്റൺ കുറ്റക്കാരിയെന്ന് കോടതി കണ്ടെത്തി. ജൂൺ 13-ന് ശിക്ഷ വിധിക്കും. യു.എസിലെ പോർട്ട്‌ലാൻഡ് കോടതിയാണ് 71-കാരി നാൻസി കുറ്റം ചെയ്തതായി കണ്ടെത്തിയത്. 2011ൽ നിങ്ങളുടെ ഭർത്താവിനെ എങ്ങനെ കൊല്ലാം’ എന്ന ലേഖനം ഇവർ എഴുതിയിരുന്നു.

2018-ലാണ് 63 കാരനായ പാചകവിദഗ്ധനായ ഭർത്താവ് ബ്രോഫിയെ നാൻസി വെടിവെച്ചുകൊന്നത്. 2018-ൽ അറസ്റ്റിലായ നാൻസി കസ്റ്റഡിയിൽ തുടരുകയാണ്. തെളിവുകളില്ലാതെ എങ്ങനെ കൊല നടത്താമെന്ന് വിശദീകരിക്കുന്ന ലേഖനം 2011ലാണ് പ്രസിദ്ധീകരിച്ചത്. കൊലപാതകത്തിനായി നാൻസി ഉപയോഗിച്ച തോക്ക് ഇതുവരെ കണ്ടെത്തായിട്ടില്ല. കൊലയ്ക്കു പിന്നിലെ കാരണവും ദുരൂഹമാണ്.

സാമ്പത്തിക പ്രശ്‌നങ്ങളും ലൈഫ് ഇൻഷുറൻസ് പോളിസി തുകയുമാണ് കൊലയിലേക്ക് നയിച്ചതെന്ന് സംശയിച്ചിരുന്നെങ്കിലും നാൻസി അത് നിഷേധിച്ചു.കൊലയ്ക്ക് ഉപയോഗിച്ച അതേ മാതൃകയിലുള്ള തോക്ക് നാൻസിയുടെ കൈവശമുള്ളതായി പോലീസ് കണ്ടെത്തിയിരുന്നു.

ബ്രോഫിയുടെ ജോലിസ്ഥലത്തിനടുത്തായി നാൻസി തോക്കുപിടിച്ച് നിൽക്കുന്നതായുള്ള വീഡിയോ തെളിവും പോലീസിന് ലഭിച്ചിരുന്നു. എന്നാൽ തോക്ക് നോവൽ എഴുത്തിന്റെ ഭാഗമായി സൂക്ഷിക്കുന്നതാണെന്നാണ് നാൻസിയുടെ വാദം. റോങ് നെവർ ഫെൽറ്റ് റൈറ്റ്, റോങ് ഹസ്ബന്റ്, റോങ് ലവർ എന്നിവയാണ് നാൻസിയുടെ നോവലുകൾ.