സാമ്പത്തിക തകര്‍ച്ച മറികടക്കാന്‍ വാഹന നിയന്ത്രണങ്ങളുമായി ശ്രീലങ്കന്‍ സര്‍ക്കാര്‍. വാഹന നിയന്ത്രണം മാത്രമല്ല മറ്റു പല കടുത്ത നിയന്ത്രണങ്ങളിലേയ്ക്കും ശ്രീലങ്ക നീങ്ങുകയാണ് എന്നാണ് ലഭിക്കുന്ന സൂചനകള്‍. സാമ്പത്തികമായും വാണിജ്യപരമായും ആകെ തകര്‍ന്നിരിക്കുന്ന ശ്രീലങ്ക പൊതുജീവിതത്തില്‍ കടുത്ത നിയന്ത്രണങ്ങള്‍ വീണ്ടും കൊണ്ടുവരികയാണ്. കലാപങ്ങളെ തുടര്‍ന്ന് മാസങ്ങളോളം അടിയന്തിരാവസ്ഥയിലേക്കാണ് ശ്രീലങ്ക പോകേണ്ടിവന്നത്. പുതിയ പ്രധാനമന്ത്രിക്കും മന്ത്രിസഭയ്ക്കും കീഴില്‍ അടിയന്തിര നിയന്ത്രണങ്ങളാണ് വരുത്തുന്നത്. പൊതുഗതാഗതം ഗണ്യമായി വെട്ടിക്കുറയ്ക്കലാണ് ഇപ്പോള്‍ തീരുമാനിച്ചിട്ടുള്ളത്. കടുത്ത ഇന്ധന ക്ഷാമം കാരണമാണ് പൊതുഗതാഗതം നിയന്ത്രിക്കാനൊരുങ്ങുന്നത്.

കയറ്റുമതിയും വിനോദസഞ്ചാരവും തകര്‍ന്നിരിക്കുന്ന ശ്രീലങ്കയില്‍ ഭക്ഷ്യക്ഷാമവും ഇന്ധനക്ഷാമവും ഒരു പരിധി വരെ പരിഹരിക്കുന്നത് ഇന്ത്യയുടെ ഇടപെടലാണ്. വന്‍തോ തില്‍ സാധനങ്ങള്‍ക്ക് വില ഉയര്‍ന്നിരിക്കുന്നതിനാല്‍ പൂഴ്ത്തിവയ്പ്പു കൂടിയതോടെ സൈന്യമാണ് പൊതുവിതരണ സ്ഥലങ്ങളില്‍ കാവല്‍നില്‍ക്കുന്നത്.

'കടുത്ത ഇന്ധന ക്ഷാമമാണ് രാജ്യത്ത്. അതിനാല്‍ പൊതുഗതാഗത രംഗത്തെ പുന:ക്രമീകരണം വരുത്താന്‍ ഭരണകൂടം നിര്‍ബന്ധിതമായിരിക്കുന്നു. ജനങ്ങള്‍ക്ക് ജോലിക്കും വിദ്യാഭ്യാസത്തിനും തടസ്സമില്ലാത്ത തരത്തില്‍ വാഹന ഗതാഗതം പുന:ക്രമീകരി ക്കാനാണ് ഉദ്ദോശിക്കുന്നത്.' ഗതാഗത വകുപ്പ് മന്ത്രി ബന്ദുലാ ഗുണവര്‍ദ്ധനെ പറഞ്ഞു. ജനങ്ങളുടെ യാത്രാക്ലേശം പരിഹരിക്കാന്‍ റെയില്‍വേ സംവിധാനം കൂടുതല്‍ ഉപയോഗിക്കാന്‍ തീരുമാനിച്ചെന്നുമാണ് ഗുണവര്‍ദ്ധനെ പറയുന്നത്.