ലോകത്തിലെ ഏറ്റവും പഴക്കം ചെന്ന മരം എവിടെയാണുള്ളത് എന്ന് ചോദിച്ചാൽ എന്തായിരിക്കും നിങ്ങളുടെ ഉത്തരം. കൂടാതെ എത്രയാവും അതിന്റെ പഴക്കം? ഇത്തരം സംശയങ്ങൾക്ക് തല്ക്കാലം വിട. അതെ, പുതിയ ചില കണ്ടെത്തലുകൾ പ്രകാരം ആ മരം ഒരുപക്ഷേ ചിലി -യിലായിരിക്കും എന്നാണ് ശാസ്ത്രജ്ഞർ ചൂണ്ടിക്കാണിക്കുന്നത്. 5000 വർഷത്തിലേറെ പഴക്കമുള്ള സൈപ്രസ് മരമാണ് ഇവിടെയുള്ളത് എന്നാണ് അറിയാൻ കഴിയുന്നത്.

​'ഗ്രേറ്റ് ​ഗ്രാൻഡ്ഫാദർ' എന്നാണ് ഇതിനെ വിളിക്കുന്നത്. ഈ പുരാതനവൃക്ഷത്തെ കുറിച്ച് ശാസ്ത്രജ്ഞർ കണ്ടെത്തിയതോടെയാണ് വാർത്തകളിലിടം നേടിയിരിക്കുന്നത്. എന്നാലും, ഈ മരത്തിന്റെ ശരിക്കും പ്രായം എത്രയാണ് എന്ന് കൃത്യമായി പറയുക സാധ്യമല്ല എന്നതും എടുത്തുപറയേണ്ടതാണ്. റോയിട്ടേഴ്‌സ് പറയുന്നതനുസരിച്ച്, പാരീസിലെ ക്ലൈമറ്റ് ആന്റ് എൻവയോൺമെന്റൽ സയൻസസ് ലബോറട്ടറിയിലെ ചിലിയൻ ശാസ്ത്രജ്ഞനായ ജോനാഥൻ ബാരിചിവിച്ച് ഈ മരത്തെ കുറിച്ചുള്ള പഠനത്തിന് നേതൃത്വം നൽകിയിരുന്നത് . അവർ വേർതിരിച്ചെടുത്ത സാമ്പിളും മറ്റ് ഡേറ്റിംഗ് രീതികളും സൂചിപ്പിക്കുന്നത് മരത്തിന് 5,484 വർഷം പഴക്കമുണ്ട് എന്നതാണ്.

കൂടാതെ 80 ശതമാനവും ഈ മരത്തിന് 50000 വർഷത്തിലേറെ പ്രായമാവാനുള്ള സാധ്യതയാണ് കാണിക്കുന്നത്. വെറും ഇരുപത് ശതമാനം മാത്രമാണ് മറിച്ചാവാനുള്ള സാധ്യത എന്നും അദ്ദേഹം ചൂണ്ടിക്കാണിക്കുന്നു. നിലവിൽ ലോകത്തിലെ തന്നെ ഏറ്റവും പ്രായമുള്ള മരം എന്ന റെക്കോർഡ് കാലിഫോർണിയയിലെ 4853 വർഷം പഴക്കമുള്ള ബ്രിസ്റ്റിൽ കോൺ പൈൈൻ മരത്തിനാണ് ഉള്ളത്. എന്നാൽ, അതിനേക്കാളും പഴക്കമുണ്ട് ഈ മരത്തിന് എന്നാണ് ബാരിചിവിച്ച് ചൂണ്ടിക്കാണിക്കുന്നത്.

അതേസമയം ഇത്രയധികം കാലങ്ങളെ അതിജീവിച്ച വൃക്ഷത്തിന്റെ നിലനിൽപ്പിൽ ശാസ്ത്രജ്ഞർ ആശങ്ക പ്രകടിപ്പിക്കുകയും ചെയ്യുന്നുണ്ട്. സന്ദർശകർ അതിന്റെ വേരുകളിൽ ചവിട്ടുകയും തൊലികളടർത്തിയെടുക്കുകയും മറ്റും ചെയ്യുന്നു എന്നാണ് അധികൃതർ പറയുന്നത്. യുഎസ്സിൽ പഴക്കം ചെന്ന നിരവധി മരങ്ങൾ നിലനിൽക്കുന്ന പ്രദേശങ്ങൾ രഹസ്യമാക്കി വച്ചിരിക്കുകയാണ്. ഇതുപോലെയുള്ള സന്ദർശകരുടെ പെരുമാറ്റത്തെയും മരത്തിന്റെ നിലനിൽപിനെ കുറിച്ചുള്ള ആശങ്കയും കണക്കിലെടുത്താണ് ഇത്തരത്തിൽ ചെയ്തത് തന്നെ.